Sura anu rapakatu i santobu tau anu mepotuu si Kerisitu anu rasanga
toIbrani
Pepuua lolita
Anu mouki sura ei baria tainsani, lawi baria ia mouki sangana. Anu manoto tainsani: tau anu mouki sura ei iamo sadua tadulako nu topepotuu si Kerisitu anu manginsani mpuu isi nu Sura Podandi Sae, ai baria mbui sadua lako i sampulu rodua topeguru ni Pue Yesu (2:3).
Sura ei rapakatu i santobu tau anu mepotuu si Kerisitu anu rasanga toIbrani anu rapopesiasi sira nakenimpepotuura si Pue Yesu. Ria sira anu rakaisii lolita, anu ratarunggu, ai ria mbui sira anu rarampaki anu-anura (10:32-34; 13:3, 13). Nakeningkamapari etu, ria sira anu mapari rarara (12:12), ria anu bariamo sira maminggu (10:25), ria sira anu mopalengi pepotuura ai mesola i agamara anu ni banimpia.
Tunggaia nu topouki sura ei, rompangka. Anu kaisa, napakanotoka sira ka i Yesuna Ana ni Pue Ala anu melumbu kabose nu katuwuNa (1:1–10:18). I Yesu etu anu mangkeni Ngkora ni Pue Ala i manusia. Melumbu kabose nu katuwuNa lako i malaeka ai lako i nabi Musa (1:1–4:13). Iamo Tadulako Menomba Mabose anu melumbu kabose nu katuwuNa lako i tadulako-tadulako menomba agama Yahudi (4:14–10:18). Wule Ia ngkida dala bona dosata pensani teampuni ai pensani kita mansumba katuwu malompe anu baria mokasopoa.
Karompangkana, ia mokiraka sira lolita bona inee sira mopawia pepotuura si Pue Yesu (10:19–13:25). Sangangaa mampopandiri sira tau anu maroso pepotuura.
Isi nu Sura
1. I Pue Yesu iamo Ana ni Pue Ala anu melumbu kabosena katuwuNa (1:1–10:18)
a. Pepuua lolita (1:1-4)
b. I Yesu melumbu kabose nu katuwuNa lako i malaeka (1:5–2:18)
c. I Yesu melumbu kabose nu katuwuNa lako si nabi Musa (3:1–4:13)
d. I Yesu melumbu kabose nu katuwuNa lako i tadulako menomba agama Yahudi (4:14–7:28)
e. I Yesu melumbu kalompe nu pobagoNa lako i pobago nu tadulako menomba agama Yahudi (8:1–10:18)
2. Inee kita mopalengi pepotuuta (10:19–12:29)
a. Pepuua lolita (10:19-25)
b. Inee tatende pepotuuta (10:26-39)
c. Pandiri nu tau anu maroso pepotuura (11:1-40)
d. Tetida kita i rara nu kapari (12:1-17)
e. Petingai Ngkora ni Pue Ala! (12:18-29)
3. Patudu kasopoana (13:1-25)