Kamate ni Yesu mosuru dosata
10
1 Atura ni Musa etu wule mewali ewa pandiri si kita kono i apa anu malompe, anu ina mai. Lako i Atura etu, taita wule mewao-wao ngkida, baria lensena mpii. Mangula Atura ni Musa etu, nauda pae-paena sira tau mosusu binata anu simbela ai popenombara ni pae naliuna, bona mogompilisi sira i Pue Ala, popenombara etu baria mampopewali sira manoto i petotoki ni Pue Ala. 2 Ane rapana tau aretu tebakosi mpuu sira lako i dosara, bariamo sira ina mangkeni popenombara, lawi rainsanira dosara teampunimo duduuna i kasae-saeana ai bariamo ina mapari pampekirira nakeningkamadosara. 3 Agaiana baria ewa etu. Lako i popenombara anu rakenira pae-paena, rakaendora liliu kamadosara. 4 Lawi raa japi tuama ai raa nu towau tuama baria pensani moparisi dosara.5-6 Etumo mpane i kamai ni Yesu Kerisitu i dunia ei, Naulika i Pue Ala ewa ei:
“Baria Nuperade popenomba binata ai popenomba ntanina,
agaiana wotoKu saduduaKuda anu Nupasilolonga,
ai baria Nuunde popenomba anu rasuwe ba binata anu rasambale
bona moparisi dosa nu tau.
7 Etumo mpane Kuuli: ei Aku Pue Ala,
mai Aku mobabei peundeaMu,
ewa anu teuki i rara nu Sura Ngkora Magali kono i wotoKu.” (Dulua Petoia 40:7-9)
8 Naudapae ope-ope popenomba etu rapopenomba mangula Atura ni Musa, agaiana Nauli ni Kerisitu, “Baria Nuunde popenomba anu rasuwe ai popenomba binata anu rasambale bona moparisi dosa.” 9 Roo awetu, Nauli mbui, “O Pue Ala, eimo Aku, mai Aku mobabei peundeaMu.” Mewali i Pue Ala moparisi sinangka popenomba anu masae etu, Napasuru ai popenomba anu mabou iamo woto ni Kerisitu. 10 I Yesu Kerisitu mobabei mpuumo peundea ni Pue Ala: Nasusumo wotoNa Napopenomba si Pue Ala. PopenombaNa etu sambela ngkida Nasusu, mopakagali kita lako i dosata duduuna i kasae-saeana.
11 Eo-eona ope-ope tadulako menomba agama Yahudi mampopolumako bagora, ai mosusu liliu sira popenombara ewa saweweina, anu baria pensani moparisi dosa. 12 Agaiana i Kerisitu, sambela ngkida Ia mosusu wotoNa rapopate moampuni dosa nu manusia. Awetu roomo Ia mosusu popenombaNa, mengkaoremo Ia lau i suruga, rakiraka Ia pomesoa anu melumbu mpii kateadaina mbai i kuana ni Pue Ala, ai meparenta Ia simbela-mbela ai i Pue Ala. 13 Ei-ei i Kerisitu, mampegia mani Ia impia tempo ni Pue Ala mampopengkoru ope-ope iwaliNa si Ia. 14 Mewali, nakeningkasambelana ngkida Ia mampopenomba wotoNa, etumo mpane Napopewali sira tau anu Napakagalimo, bariamo ria kamakurara duduuna i kasae-saeana.
15 Kono i patudu etu, napakanotomo nu Inosa Magali. Naulika kita ewa ei:
16 “Eimo dandiKu anu ina Kuparia i toSaraeli,
anu ina Kupariaka sira i eo-eo anu ina mai.
AturaKu ina Kuboli i rarara
ai Kuuki i rara nu pampekirira.”
17 Roo awetu, Nauli mbui:
“Dosara ai salara bariamo ina Kukaendo.” (Yeremia 31:33,34)
18 Mewali, nakeningkateampuninamo dosata ai salata, bariamo paraluu takeni binata anu rapopate tapopenomba bona teampuni kita lako i dosata.
19 Etumo mpane poka-poka! Nakeningkamate ni Yesu, ei-ei pebaimo kita mesua i rara Lonta Magali Mpii. 20 Nabungkasikamo kita ni Yesu dala anu mabou anu mangkeni kita i katuwu anu baria mokasopoa. Ai dala anu Nabungkasikamo kita etu, bariamo moliu i rindi bana, agaiana mampoliungimo wotoNa saduduaNa. 21 I Yesumo anu mewali Tadulako Menomba Mabose, anu makuasa mokadipuraka sinangka-nangkana i Tombi ni Pue Ala. 22 Etumo mpane, maimo kita mogompilisi i Pue Ala, lako i kabula nu rarata ai pepotuuta anu maroso. Lawi rarata anu madaa Napakagalimo ai raaNa, ai wotota rariumo ai ue tanda ka Nabakositamo lako i dosata. 23 Sangangaa mesarumaka liliu kita si Yesu, ai inee kita maeka mopangaku ka Iana pesarumakaata, lawi i Pue Ala anu modandimo etu, batena mopabukei dandiNa si kita. 24 Sangangaa mombehaile kita ai mombesuweki mporara kita, bona mombepokaasi kita lako i rarata mpii ai mobabei liliu kita apa anu malompe. 25 Mewali, inee tapakarao wotota lako i pogulu-guluta menomba, ewa anu nababei nu basangkia dua tau sira. Sangangaa mogulu kita bona mombepakaroso mporara kita, pelumbunamo i tempo ei, lawi tainsani bariamo masae ina dongka i Pue.
26 Lawi ane taepemo ai tainsanimo pepatudu anu mamonso lako si Pue Ala, agaiana taoaka mobabei liliu dosa, bariamo ria popenomba binata anu rapopate, anu pensani moparisi dosata. 27 Ane ewa etu babeiata, manotomo i tempo ni Pue Ala mobotusi kara-kara nu tau anu meewa si Ia, ina mansumba kita pesukuNa anu maruminsi pepakaekana, iamo apu anu mepakawuroto. 28 Ni banimpia, ane ria sadua tau anu baria mampeulai Atura ni Musa, ai ria sira rodua ba tolu dua tau anu mosabiki kamonso nu kamasalana, baria ria karaampunina, batena rasuku mamate ia. 29 Pelumbunamo tau anu mopapakoi Ana ni Pue Ala. Lawi raulira baria ria pobunduana raa ni Yesu anu mopakaroso dandi ni Pue Ala, ai anu mopakagali sira. Mopapakoi mbui sira Inosa Magali anu mopatongawa kamaasi ni Pue Ala. 30 Lawi tainsani i Pue Ala anu manguli:
“Akumo anu mosurungi, ai Akumo anu mesuku.”
Ai teuki mbui:
“I Pue anu ina mobotusi kara-kara nu tauNa.” (Pepopainga 32:35,36)
31 Mepakaeka mpuu, ane mansumba kita pesuku ni Pue anu tuwu.
32 Sangangaa nipepekiri adiwa katuwumi ni banimpia i tempomi mani lako mepuu mepotuu si Pue Yesu. I tempo etu, narumpa komi maisi kapari. Agaiana nauda ewa etu, batena tetida liliu pepotuumi si Yesu. 33 Ria lako i olomi anu rapapakoi ai rapopesiasi komi i lio nu tau wori. Ria mbui komi meula mantodisa pantodisa nu pokami sampepepotuu anu rapopesiasi. 34 Nipokaasi sira tau anu ratarunggu. Ane anu-anumi rarampaki, manoa komi ai baria nipopari rara, lawi niinsani kariana anu rapasilolongaka komi anu melumbu kalompena ai anu baria mokasopoa.
35 Mewali, inee mpuu nipawia pepotuumi etu, lawi ane mepotuu liliu komi, ina mabose surungina anu nisumba. 36 Naudapae ba apa anu mewali, sangangaa tetida komi, ai nipeulai liliu peundea ni Pue Ala bona mansumba komi apa anu Nadandika komi. 37 Bariamo masae, ina tepabukeimo Ngkora ni Pue Ala anu manguli:
“Saudidamo tempona, Ia anu ina dongka etu, ina dongkamo,
Tempona dongka baria ina teginsu.
38 Tau anu manoto
ina tuwu sira i rara mpepotuura.
Agaiana ane ria sira anu baria tetida i rara mpepotuura,
baria sira Kupokatono.” (Habaku 2:3-4)
39 Agaiana kita ei poka, baria kita tau anu baria tetida i pepotuuta, ai baria kita tau anu ina rapakaropu. Agaiana kita ei, iamo tau anu mepotuu si Pue Ala anu Nasorema.