Tombi penombaa i dunia ai i suruga
9
1 I rara dandi ni Pue Ala anu masae, ria atura-atura menomba i rara Bambaru Penombaa anu rababei nu manusia. 2 I rara nu Bambaru Penombaa etu, ria roogu lonta. Lonta anu mpolinguruna rasanga Lonta Magali. I rara lonta etu, ria pearia nu sulo, meja pearia roti, ai roti anu rapopenomba si Pue Ala.* 3 I sambali rindi bana Lonta Magali etu, ria lonta karooguna anu rasanga Lonta Magali Mpii.* 4 I lonta etu, ria meja potunua dupa* anu rababei lako i bulawa, ai ria mbui sambua peti anu rasanga Peti Podandi.* I sumalele nu peti etu, ralapisi ai bulawa. I rara nu peti etu, ria kawali bulawa anu raisii ai roti anu rasanga manna, ria lai ni Haruni anu ni banimpia motumbe, ai ria mbui roogu watu anu tepoukii sawaa sampulu anu lako si Pue Ala. 5 I wongko nu peti etu, ria rombua watutau anu mokapi rapopombeliora, rasanga kerub. Kerub aretu, mewali tanda kariana i Pue Ala i se etu. Kapi nu kerub aretu, teona mobobongi petuko nu peti etu. Petukona etu, iamo poampunia dosa. Agaiana ei-ei ope-ope anu rapololita ni mpongone, baria tabuku mampololita dongka i ntangangaiana.*6 Ewa etumo karababeina Bambaru Penombaa ni banimpia. Eo-eona tadulako menomba mombesambei sira mesua i Lonta Magali, mampopolumako bagora. 7 Agaiana anu pensani mesua i rara Lonta Magali Mpii, batena ngkida Tadulako Menomba Mabose. Ai wule sambela ngkida ia mesua i rarana sampae, ai ane mesua ia, sangangaa mangkeni ia raa nu binata napopenomba si Pue Ala, bona napopoparisi dosana saduduana ai dosa nu tauNa anu baria raoakara. 8 Kono i ada penomba etu, Inosa Magali mopaguru kita ewa ei: ane ria mani Lonta Magali, baria mani tebungkasi dala i tau ntanina mesua i rara Lonta Magali Mpii etu. 9 Ope-ope etu mewali ngkora pandiri si kita anu tuwu ei-ei. Lempona: baria pensani tapakagali rarata i petotoki ni Pue Ala, i posusuta binata ai popenomba ntanina si Ia. 10 Lawi dala menomba etu, wule mampololita kono i apa anu pensani rakoni ai anu rainu ngkida, ai mawori mpangka dala bona mopakagali wotota. Ope-ope atura etu wule rapopolumako sampalai ngkida, lako baria mani sinangka-nangkana napakabou ni Pue Ala.
I Yesu iamo topetongo-tongoi lako i dandi anu mabou
11 Agaiana ei-ei, dongkamo i Kerisitu mewali Tadulako Menomba Mabose, anu mangkeni katuwu malompe anu ria ei-ei.a Mesua Ia i rara Bambaru Penombaa i suruga, anu melumbu kalompena ai anu melumbu kamagalina, lako i Bambaru Penombaa anu nawangu nu manusia ni banimpia. Lawi Bambaru Penombaa anu napesuangi ni Kerisitu etu, baria rababei nu manusia; lempona baria lako i dunia ei. 12 I tempo ni Kerisitu mesua i Lonta Magali Mpii, baria Ia mangkeni raa dimba tuama ba raa ana japi, agaiana raaNa saduduaNa. PesuaNa etu sambela ngkida, lawi nakeningkaraaNa saduduaNa anu Nakeni mesua etu, Napawia kita lako dosata duduuna i kasae-saeana.
13 Mangula Atura ni Musa, woto nu tau anu makeraki,b sangangaa rasimpe ai raa nu dimba ai japi tuama ai awu nu ana japi anu ratunu rapopenomba etu. Etu rababei bona wotora magali mpesola. 14 Mewali, ane raa ai awu pensani mobakosi woto nu tau anu makeraki, pelumbunamo raa ni Kerisitu! Nakeningkamakuasa nu Inosa Magali anu ria liliu duduuna i kasae-saeana, i Kerisitu mosusu wotoNa saduduaNa si Pue Ala, bona rapopate mewali popenomba anu baria ria kamakurana. RaaNa etu, mobakosi rarata lako i sinangka babeiata anu mangkeni kita i kamate, bona pensani kita menomba si Pue anu tuwu.
15 Etumo mpane, i Kerisitu mewali Topetongo-tongoita ai i Pue Ala i dandi anu mabou, bona ope-ope tau anu naronde ni Pue Ala, mansumba sira pewati anu baria mokasopoa, mangula apa anu nadandika sira ni Pue Ala. Pewati etu rapandiri ewa sosora anu tadoko. Ope-ope etu pensani mewali nakeningkamate ni Kerisitu; ai kamateNa etu mopawia tau lako i kamadosara anu rababeira i tempona dandi anu masae rapopolumako mani.
16 Lawi ane ria sura peawili, sangangaa ria katongawaana ane topeawili etu mamatemo. 17 Sura peawili etu, pensani tepake ane topeawili etu mamatemo. Lawi, sura peawili baria mani pensani rapake ane topeawili etu, tuwu mani. 18 Etumo mpane, dandi anu masae sangangaa rapakaroso ai raa binata anu rapopenomba. 19 Awetu i Musa roomo mopadongka sinangka parenta anu ria i rara Aturana i ope-ope toSaraeli, naalamo raa ana japi ai raa nu dimba tuama nagalo ai ue. Roo awetu, naala mbui owo hisop ai wulu dimba anu mawanta, mpane naeme i raa etu napoposimpe Sura Atura ni Pue Ala ai i tau wori. 20 Tongo ni Musa mobabei etu, nauli, “Eimo raa anu mopakaroso dandi ni Pue Ala si komi, ai etu sangangaa nipeulai.” 21 Ewa etu mbui, i Musa mosimpeka raa i Bambaru Penombaa ai i sinangka parewa anu rapake menomba si Pue Ala. 22 Kamonsona mangula Atura ni Musa, ina ope-ope i pangka-pangkana sangangaa rabakosi ai raa binata anu rasambale. Ane baria ria raa, dosa baria teampuni.
23 Ane Bambaru Penombaa anu i dunia ei ai anu-anu, anu ria i rarana, ope-ope etu mewali ewa pandiri si kita kono i apa anu ria i suruga. Ope-opena aretu sangangaa rabakosi ai raa. Agaiana ane Tombi Penombaa anu i suruga, sangangaa ria popenomba anu melumbu kalompena. 24 Lawi Tombi Penombaa anu napesuangi ni Kerisitu, baria tombi anu rababei nu manusia. Tombi Penombaa etu iamo suruga. Ai i Kerisitu mesua mpuu Ia i suruga. Ei-ei, mewalimo Ia topetongo-tongoita ai i Pue Ala. 25 Ane Tadulako Menomba Mabose agama Yahudi, pae-paena ia mesua i rara nu Lonta Magali Mpii, mangkeni raa binata anu rapopenombara. Agaiana i Kerisitu, baria mawori mbela Ia mesua mosusu wotoNa si Pue Ala. 26 Lawi ane rapana ewa etu, mawori mbela Ia sangangaa mantodisa kapari duduuna mamate, mepuu lako i pewalina dunia ni banimpia. Agaiana sambela ngkida Ia, mosusu wotoNa rapopate mosorema kita. 27 Mangula tunggaia ni Pue Ala, sambela tempo manusia sangangaa mamate, ai roo awetu sangangaa rabotusi kara-karara. 28 Ewa etu mbui, sambela ngkida i Kerisitu mosusu wotoNa mewali popenomba si Pue Ala mosuru dosa nu tau wori, ai sambela tempo, mai mpesola Ia i dunia ei. KamaiNa etu, bariamo Ia mosuru dosa. Agaiana mai Ia mosorema tau anu mampegia kadongkaNa.