I Pue Yesu iamo Tadulako Menomba Mabose
8
1 Eimo puu nu patuduki: Ria mpuu Tadulako Menomba Mabose anu meparenta i suruga simbela-mbela ai i Pue Ala, anu melumbu kabosena. 2 Mampopolumako Ia bagoNa mewali Tadulako Menomba Mabose, i Lonta Magali i bambaru ni Pue Ala i suruga. Bambaru etu nawangu ni Pue Ala, baria nawangu nu manusia.3 Ope-ope Tadulako Menomba Mabose anu ntanina, rapakanoto bona mosusu binata ai popenomba anu ntanina si Pue Ala. Ewa etu mbui, i Yesu Tadulako Menomba Mabose sangangaa ria popenombaNa si Pue Ala. 4 Ane rapana i Yesu ria mani i dunia, baria Ia mewali tadulako menomba, lawi riamo sira tadulako menomba anu mosusu popenomba si Pue Ala, mangula Atura ni Musa. 5 Bago nu tadulako menomba aretu, mewali pandiri si kita, kono i apa anu napobago nu Tadulako Menomba Mabose i suruga. Etumo mpane lako baria mani nawangu ni nabi Musa Bambaru Penombaa ni banimpia, i Pue Ala manguli ewa ei, “Nukaendo! Ope-ope etu sangangaa nubabei mangula apa anu rapopeitaka iko i wongko bulu!” 6 Agaiana ei-ei, i Yesu modokomo bago mewali Tadulako Menomba Mabose anu melumbu kalompena mpane lako i bago nu tadulako menomba anu i dunia ei, lawi i Yesu saduduaNa mewali topetongo-tongoi i dandi ni Pue Ala anu mabou i manusia. Etumo mpane, melumbu kalompena mpane lako i dandi anu masae.
7 Ane rapana baria ria kamakurana dandi anu masae etu, kebariamo paraluu moparia dandi anu mabou. 8 Nakeningkabariana rabukura mampeulai dandi anu masae etu, nasalai sira ni Pue Ala, Nauli:
“Petingai! Sambela tempo ina Kuparia dandi anu mabou i toSaraeli,
ai i toYehuda.
9 DandiKu anu mabou,
baria ewa dandiKu anu Kuparia i ulububura ni banimpia, i tempora Kunini mensuwu lako i tana Masiri.
Nakeningkabariara tetida i dandiKu,
etumo mpane bariamo sira Kuhaile.
10 Mewali, eimo dandiKu anu ina Kuparia i toSaraeli i eo anu ina mai:
AturaKu ina Kuboli i rara nu pampekirira
ai Kuuki i rarara.
Ina mewali Aku Pue Ala anu rapenombaira,
ai sira ina mewali tauKu.
11 I tempo etu, bariamo sira paraluu mopatudu
pokara ba singka rangara bona rainsanira Aku.
Lawi ope-ope sira ina manginsani Aku,
malompe anakoi ewa etu mbui tomana,
malompe anu kokoi katuwuna ewa etu mbui anu mabose katuwuna.
12 I tempo etu, ina Kuampuni salara,
ai bariamo ina Kukaendo dosara.” (Yeremia 31:31-34)
13 Mewali, i rara Ngkora ni Pue Ala ni mpongone, i Pue Ala mampololita kono i dandiNa anu bou. DandiNa anu mabou etu, mopasuru dandiNa anu masae. Lempona, dandiNa anu masae etu, bariamo ina rapopolumako.