Tadulako menomba i Melkisedek
7
1 I Melkisedek etu, iamo datu i kota Salem ni banimpia, ai ia mbui sadua tadulako menomba anu mampopolumako bago penomba si Pue Ala anu makuasa i sinangka-nangkana. I pesola ni Burahima lako i pombealana monangi basangkia datu, i Melkisedek lau mampomberumpaka ia ai mowati ia. 2 Roo awetu, i Burahima mokiraka sampulu parasee lako i anu-anuna si Melkisedek, anu nasumba i rara pombealaa.Melkisedek, lempona “Datu anu manoto”. Kota Salem, lempona “lompe nu katuwu”. Mewali, nakeningka rapodatuna i kota Salem, etumo mpane rasanga mbui ia “Datu anu mangkeni lompe nu katuwu,”. 3 Kono si Melkisedek ei, baria ria anu motuntu kono i tuamana ba tinana ba pemuleana. Baria ria anu teuki kono i pepuaa nu katuwuna ba i kasopoa nu katuwuna. Pensani tauli: i Melkisedek etu, simbela ai Ana ni Pue Ala, lawi ia tadulako menomba duduuna i kasae-saeana.
Melumbu kabose nu katuwu ni Melkisedek mpane lako i Burahima ai tadulako-tadulako menomba
4 Mewali, i tunturakana etu tainsani kabose nu katuwu ni Melkisedek. Etumo mpane i Burahima tuama nu ulububuta, mobila i Melkisedek ai mokiraka ia sampulu parasee lako i anu-anuna, anu nasumba i rara pombealana. 5 Mangula Atura ni Musa, ope-ope toSaraeli sangangaa mokiraka sampulu parasee lako i pesumbaara i pemulea ni Lewi anu mewali tadulakora menomba, naudapae simbela-mbela sira pemulea ni Burahima. 6 I Melkisedek, baria pemulea ni Lewi. Agaiana nauda ewa etu, mansumba mbui ia sampulu parasee lako si Burahima. Ai nauda i Burahima anu mansumba dandi ni Pue Ala, baria i Burahima anu mowati i Melkisedek, agaiana i Melkisedekda anu mowati i Burahima. 7 Ai tainsani mpii: tau anu rawati tepaiwoi katuwuna lako i topewati. Mewali, melumbu kabosena katuwu ni Melkisedek mpane lako i Burahima.
8 Tadulako menomba aretu, anu mansumba mpuu sira sampulu parasee manusia biasa mbui sira anu pensani mamate. Agaiana i Melkisedek, anu mansumba sampulu parasee lako si Burahima, baria ria rasumba teuki i rara nu Sura Ngkora Magali kono i kamatena. Mewali, tongawa tuwu liliu ia. 9 Mewali pensani rauli, pemulea nu toLewi anu sangangaa modoko sampulu parasee lako i toSaraeli. Agaiana toLewi mokiraka mbui sira sampulu parasee, lako i apa anu radokora etu si Melkisedek mampoliungi i Burahima, 10 i tempo ni Melkisedek momberumpa ai i Burahima ni banimpia, naudapae ni tempo etu i Lewi baria mani rapoanaka, agaiana pensani rauli riamo ia i rara woto ni Burahima ulububuna.
I Yesu mewali Tadulako Menomba Mabose ewa i Melkisedek
11 I tempona pemulea ni Lewi mewali sira tadulako menomba, Atura ni Musa rakiraka toSaraeli. Agaiana tadulako-tadulako menomba toLewi aretu, baria rabukura mampopolumako bagora i kanoto-notona i apa anu sangangaa rapobagora. Etumo mpane i Pue Ala moongko tadulako menomba anu ntanina ewa i Melkisedek, bariamo lako i pemulea ni Haruni toLewi. 12 Mewali, ane pemulea ni Lewi anu mewali sira tadulako menomba, rapasuru ai sadua tadulako menomba anu baria pemulea ni Lewi, Atura ni Musa sangangaa rapasuru mbui. 13 Anu ratunggai ei, iamo Pueta i Yesu Kerisitu: baria Ia lako i pemulea ni Lewi, ai baria mani ria mogalo sadua lako i ulububu ni Yesu etu, anu mewali tadulako menomba. 14 Ope-ope kita tainsanimo, Pueta i Pue Yesu anu motumpui kita, rapoanaka lako i pemulea ni Yehuda, baria lako i pemulea ni Lewi. Ai i rara nu Atura ni Musa, baria ria anu teuki kono i pemulea ni Yehuda mewali tadulako menomba.
15 Sinangka anu rapololita ei manoto mpiimo, i kateongkona sadua tadulako menomba ntanina, ewa i Melkisedek. 16 Mewali Ia tadulako menomba baria mangula atura-atura nu manusia, agaiana mangula kuasaNa anu tongawa i rara nu katuwuNa anu baria mokasopoa. 17 Lawi i rara nu Sura Ngkora Magali, teuki ewa ei:
“Ikomo Tadulako Menomba duduuna i kasae-saeana
anu ewa i Melkisedek.” (Dulua Petoia 110:4)
18 Atura anu masae etu bariamo rapopolumako, lawi bariamo mobundu. 19 Lawi nakenimpangulata Atura ni Musa etu, baria mangkeni kita mewali manoto i petotoki ni Pue Ala. Etumo mpane Atura etu, rapasuru ai dala anu mabou. Ane tapeulai dala etu, mewali pesarumakaata kapensanita dongka si Pue Ala.
20 Dala anu bou etu, iamo i Yesu anu mewali Tadulako Menomba mangula sumpa ni Pue Ala. Lawi tadulako menomba anu ntanina, baria sira raongko mewali tadulako menomba mangula sumpa ni Pue Ala. 21 Tempo ni Yesu raongko mewali Tadulako Menomba, i Pue Ala modandi anu Napakaroso ai sumpaNa, Nauli:
“Aku ei i Pue Ala, mosumpa Aku,
apa anu Kuuli ei, baria ina Kubaliki:
Ikomo Tadulako Menomba duduuna i kasae-saeana.” (Dulua Petoia 110:4)
22 Mewali, ai sumpa ni Pue Ala etu, mopakanoto si kita ka i Yesuna katongawaana podokota dandi anu mabou.
23 Ria mbui sampangka posisalana, kono i tadulako-tadulako menomba lako i pemulea ni Lewi iamo: mawori sira ai tau biasa ngkida sira, anu batera mamate. Mewali ane mamate sadua, napasuru nu tosaduana. 24 Agaiana i Yesu anu mewali Tadulako Menomba Mabose, tuwu liliu Ia. Etumo mpane, karapotadulakoNa menomba etu baria melimba i tosaduana. 25 Etumo mpane, Nabuku mosorema kita ai mokiraka kita katuwu malompe anu baria ria kamakurana, asala mampoliungi i Yesu Kerisitu, dongka kita si Pue Ala. Lawi tuwu liliu Ia mopadongka pamperadeta si Pue Ala.
26 Mewali, i Yesu iamo Tadulako Menomba Mabose anu motulungi kita. Magali katuwuNa, baria ria salaNa ai kamakuraNa. Nauda Ia mewali manusia, agaiana baria Ia madosa ewa manusia. Naongkomo Ia ni Pue Ala lau i suruga, mpane Nakiraka pomesoa anu melumbu kateadaina lako i sinangka-nangkana anu ria i suruga. 27 I Yesu baria ewa tadulako menomba mabose anu ntanina, anu sangangaa mosusu popenomba i eo-eona. Eo-eona tadulako menomba aretu sangangaa mosusu popenombara, mpolinguruna popenomba anu mosuru dosara saduduara, ai roo awetu popenomba anu mosuru dosa nu tau wori. Agaiana i Yesu mosusu popenombaNa si Pue Ala, sambela ngkida duduuna i kasae-saeana. Etu Nababei i tempoNa mosusu wotoNa saduduaNa rapopate. 28 Tau anu mewali Tadulako Menomba Mabose mangula Atura ni Musa, tau anu malede, lawi manusia biasa ngkida sira. Agaiana roo Atura ni Musa etu, i Pue Ala modandi Napakaroso ai sumpaNa, ai mangula dandiNa etu. Naongkomo AnaNa anu baria ria kamakurana etu, mewali Tadulako Menomba Mabose, duduuna kasae-saeana.