6
1 Etumo mpane, inee wule tasola-sola mopatuduka puu nu patudu kono si Kerisitu. Sangangaa tapaliliu kaliliuana patudu etu, bona kalalaua maroso pepotuumi si Kerisitu. Agaiana tau anu lako mepotuu si Pue Ala, sangangaa rapatuduka sira puu nu patudu etu iamo: kono i pampenonsoira babeiara anu madaa, kono i puu nu pepotuu si Pue Ala, 2 kono i basangkia mpangkana periu, poongkora palera mowati tau, kono katuwu mpesola nu tomate, ai posuku tau anu madaa babeiara duduuna i kasae-saeana. 3 Mewali ane nakiraka mani kita ni Pue Ala tempo, tapapulomo patudu-patudu anu kaliliuana.4 Lawi tau anu raoakara mopalengi pepotuura, bariamo sira pensani ranini mpesola bona menonso sira lako i dosara. Lawi ni banimpia, manginsanimo sira patudu anu mamonso kono i Pue Ala, modokomo sira pewati ni Pue Ala, ai rarara nakuasaimo nu Inosa Magali; 5 ai rainsanira mboto kalompena Ngkora ni Pue Ala, ai kuasa ni Pue Ala anu ina tongawa i eo-eo anu ina mai. 6 Agaiana batena ngkida mopalengi sira pepotuura, tau aretu bariamo sira pensani ranini mpesola bona menonso sira lako i dosara. Nakenimposapuakara i Pue Yesu, sira ewa tau anu mopaku mpesola Ana ni Pue Ala, ai mopakoi Ia i lio nu tau wori. 7 Tau anu mepotuu si Pue Ala, simbela ewa tana anu paka mansumba uda ai anu nakatuwui nu tuda-tuda, anu mobundu i topobonde. Tana etu nawati ni Pue Ala. 8 Agaiana, ane tau anu raoakara mopalengi pepotuura, sira simbela ewa tana anu wule nakatuwui ngkida nu dono ai dui, baria ria pobunduana. Kasopoana, nagane ni Pue Ala, ai ope rasuwe.
9 Agaiana komi poka anu kipokaasi, nauda ewa etu pololitaki, kiinsani baria komi ewa tana anu nagane ni Pue Ala. Kiinsani kariana wuami anu melumbu kalompena, iamo pepotuumi ai babeiami anu sintoto i tau anu mansumba katesorema lako si Pue Ala. 10 I Pue Ala batena manoto. Baria ina malipa raraNa bagomi anu nipobago lako i rarami anu buke asi. Manoto nipokaasi i Pue Ala, lawi mawori mbela komi motulungi pokami sampepepotuu anu mewalimo tau ni Pue Ala, malompe i tempo anu naliu, ewa etu mbui ei-ei. 11 Agaiana kiperade mpuu poka bona nipari-pari mopaliliu babeia anu ewa etu duduuna i kasopoana, bona nisumba mpuu apa anu nisarumaka lako si Pue Ala. 12 Inee komi ria anu malose. Agaiana nipeulaimode pandiri nu tau anu modokomo apa anu Nadandikamo sira ni Pue Ala, lawi mepotuu sira si Ia, ai manoa sira mampegia apa anu Nadandikamo sira.
Dandi ni Pue Ala baria tebaliki
13 Ni banimpia i Pue Ala modandi si Burahima. DandiNa etu Napakaroso ai sumpaNa, mokabelai Ia sangaNa saduduaNa, lawi baria ria anu melumbu kabose nu katuwuna mpane lako Ia.
14 Nauli, “Batena ina Kuwati iko ai
Kupakaisi pemuleamu
duduuna mawori mpuu sira.” (Pewalina 22:17)
15 I Burahima mampegia i rara nu kamanoana duduuna mansumba ia apa anu Nadandika ia ni Pue Ala.
16 Pandirina, ane ria sadua tau anu mosumpa, mokabelai sanga nu tau ntanina anu melumbu kabose nu katuwuna mpane lako si ia, sumpana etu mopakaroso pololitana bona ntena ria anu pebai mosapuaka. 17 Ewa etu mbui i Pue Ala: i popadongkaNa dandiNa si Burahima ai i pemuleana, Napenoka mopakaroso rarara bona rainsanira kabariana tebaliki tunggaiaNa si sira. Napakaroso dandiNa etu ai posumpaNa. 18 Ane i Pue Ala modandimo ba mosumpamo, batena Napabukei. PololitaNa anu rompangka etu baria ria katebalikina. Nakenimpesarumakata liliu si Pue Ala anu mopakaroso rarata mampegia apa anu tasarumaka si Ia. 19 Pesarumakata etu anu mopakaroso katuwuta bona ntena marugi pepotuuta simbela ewa besi popotaha nu kapala tasi.a I rara Tombi ni Pue Ala, ria rindi bana anu mosomboki kita mesua i Lonta Magali Mpii. Agaiana kita, nakenimpesarumakata etu baria ria anu mosomboki kita mesua i lonta etu bona dongka i lio ni Pue Ala, 20 lawi i Yesu moilodomo mesua i se etu, mewali Tadulako Menomba Mabose duduuna kasae-saeana, ewa i Melkisedekb ni banimpia. I Yesumo anu mobungkasika kita dalata bona tapeulai.