I Yesu iamo Tadulako Menomba Mabose
5
1 Sadua-sadua Tadulako Menomba Mabose rapelisi lako i olo nu manusia, ai raongko bona mampopolumako bago ni Pue Ala. Tadulako Menomba Mabose iamo sadua tadulako agama anu mopasuru tau wori lau i lio ni Pue Ala. Bagona, mosusu binata popenomba ai popenomba anu ntanina anu rapopenomba si Pue Ala mosuru dosa. 2 Tadulako Menomba Mabose manusia mbui, ai maisi mbui kamaledena. Etumo mpane, pensani ia manoa i tau anu mobabei sala, lawi tau anu mobabei sala aretu baria rainsanira kamasalana babeiara. 3 Nakeningkamaledena, Tadulako Menomba Mabose etu baria wule mosusu popenomba mosuru dosa nu tau wori, agaiana dosana saduduana mbui. 4 Ai baria ria tau anu moongko wotona saduduana mewali Tadulako Menomba Mabose. Tau anu mewali Tadulako Menomba Mabose, i Pue Ala ngkida anu moongko ai anu moronde ia i bago etu, ewa anu mewali ni banimpia si Haruni.a5 Ewa etu mbui i Kerisitu, baria Ia moongko wotoNa saduduaNa mewali Tadulako Menomba Mabose. I Pue Alada anu moongko Ia, Naulika:
“Ikomo AnaKu,
I eo ei, Kupopewalimo Iko AnaKu.” (Dulua Petoia 2:7)
6 Ai i rara nu Sura Ngkora Magali, nauli mbui ni Pue Ala i AnaNa:
“Ikomo Tadulako Menomba duduuna i kasae-saeana,
ewa Tadulako menomba i Melkisedekb ni banimpia.” (Dulua Petoia 110:4)
7 I tempona mani i Yesu tuwu i rara dunia ei, meraroa Ia ai motumangi, mekakae Ia mampololita pamperadeNa si Pue Ala anu pensani mopawia Ia lako i kamate. Agaiana baria Ia mampeulai peundeaNa saduduaNa, batena mengkoru Ia i peundea ni Pue Ala. Etumo mpane, i Pue Ala mampetingai pamperadeNa. 8 Naudapae Ana ni Pue Ala Ia, mansumba mbui Ia kapari, ai i rara nu kapari etu, meguru Ia mengkoru si Pue Ala. 9 Ai nakenimpengkoruNa, mewali Ia Topesorema anu baria ria kamakuraNa, ai Ia anu mewali puu nu katesorema i ope-ope tau anu mengkoru si Ia. 10 Ai naongko Ia ni Pue Ala mewali Tadulako Menomba Mabose, ewa i Melkisedek ni banimpia.
Pepopainga kono i pepotuu
11 Poka-poka, kamonsona, maisi mani anu kupenoka kuulika komi kono si Yesu ai i Melkisedek, agaiana mapari mopakanotoka komi ope-ope etu, lawi komi ewa tau anu mengkadoio. Baria niunde mampetingai patuduku. 12 Kamonsona sangangaa mewali komi guru i Ngkora ni Pue, lawi masaemo komi meula si Pue Yesu. Agaiana paraluu mani komi meguru i tau ntanina, lawi baria mani komi manginsani puu nu patudu kono si Pue Ala. Mogaloda patudu anu baria mapari, baria mani nipeulai lompe, apa mani patudu anu mapari! Komi ewa analei: baria mani nibuku mangkoni pangkoni anu makoo, moparaluu mani komi susu. 13 Tau anu mampenoka mani susu, analei mani sira. Lempona, baria mani rainsanira mampopontani apa anu mamonso ai apa anu masala. 14 Pangkoni anu makoo, pangkoni nu tau anu manginaomo; lempona, nakeningkamanginaonamo nainsani mampopontani apa anu malompe ai apa anu madaa.