4
1 Mewali, dandi ni Pue Ala anu ni banimpia mewali mani si kita duduuna ei-ei, bona pensani kita mansumba pengkarooa simbela-mbela ai Pue Ala. Etumo mpane sangangaa mainga-inga mpuu kita, bona ntena ria sadua lako i olota anu baria mansumba apa anu Nadandi etu. 2 Lawi kita ei, rapadongkaka mbui kita Bambari Malompe, ewa toSaraeli ni banimpia. Agaiana Bambari Malompe etu, baria mobundu si sira, lawi rapetingaira ntoo ngkida, baria rapotuura. 3 Agaiana, batena ngkida kita anu mepotuu anu mansumba pengkarooa simbela-mbela ai i Pue Ala. Tainsani etu lako i Ngkora ni Pue Ala anu manguli,“Marumpu Aku, ai Kusumpa, Kuuli:
Baria sira ina mesua i pearia anu masana anu Kupasilolongamo, bona mengkaroo sira simbela-mbela ai Aku.” (Dulua Petoia 95:11)
I Pue Ala mongkora ewa etu, naudapae pengkarooa etu roomo Napasilolonga i tempoNa moteru dunia ei. 4 Lawi ria teuki i rara Sura Ngkora Magali anu mokabelai eo kapitu ewa ei,
“I eo kapitu, i Pue Ala mengkaroo lako i ope-ope bagoNa.” (Pewalina 2:2)
5 Teuki mbui i Sura Ngkora Magali ewa ei:
“Baria sira ina mesua i pengkarooa anu Kupasilolongamo etu, bona mengkaroo sira simbela-mbela ai Aku.” (Dulua Petoia 95:11)
6 Sira anu mpolinguruna mangepe Bambari Malompe, baria sira mesua i pengkarooa simbela-mbela ai i Pue Ala, lawi baria sira mangula parentaNa. Agaiana tunggaia ni Pue Ala, sangangaa ria tau anu mesua i pengkarooa etu. 7 Etumo mpane, i Pue Ala mopakanoto eo anu ntanina bona manusia pensani mesua i pengkarooa simbela-mbela ai Ia. Eo anu Napakanotomo etu, Nauli, “Eo ei”. Basangkia atu mpae karoo nu toSaraeli meari i pada lori, i Pue Ala mongkora si Datu Daudi Nauli:
“I eo ei, ane niepe wotu ni Pue Ala,
inee nipakakoo rarami.” (Dulua Petoia 95:7-8)
8 Ane rapana nakenimo sira ni Yosua mesua i pengkarooa anu nadandikamo sira ni Pue Ala, i Pue Ala bariamo ina mampololita mani kono i eo anu ntanina. 9 Mewali, ria mani tempo i tau ni Pue Ala bona mansumba eo pengkarooa ewa pengkarooa ni Pue Ala i eo kapitu. 10 Lawi ane mengkaroo kita simbela-mbela ai i Pue Ala, lempona, mengkaroo mbui kita lako i bagota ewa i Pue Ala mengkaroo lako i bagoNa i eo kapitu. 11 Mewali poka, sangangaa tapari-pari mesua i pengkarooa simbela-mbela ai i Pue Ala. Inee komi ewa toSaraeli sira ni banimpia anu baria mesua i pengkarooa etu, lawi baria sira madota mangula parenta ni Pue Ala.
12 Ngkora ni Pue Ala iamo lolita anu tuwu ai anu makuasa, melumbu kataruna mpane lako i guma anu momata mpotimali. Guma pensani metosu dongka i timbuku nu wukuta. Ewa etu mbui Ngkora ni Pue Ala metosu dongka i pekirita ai i rarata. Etumo mpane pensani moparesa pekirita ai tunggaia nu rarata. 13 Baria ria sampangka anu tewuni i petotokiNa. Sinangkana anu ria tongawa ai mabaa si Ia. Ai si Ia, sangangaa tapangaku ope-ope babeiata.
I Yesu iamo Tadulako Menomba Mabose
14 Mewali, ria si kita sadua Tadulako Menomba Mabose anu melumbu mpii kabose nu katuwuNa: iamo i Yesu Ana ni Pue Ala. Mengkaoremo Ia lau i suruga, i lio ni Pue Ala. Etumo mpane sangangaa tapakaroso pepotuuta ai tapangaku liliu ka i Yesuna Pueta. 15 Tadulako Menomba Mabose etu, manginsani kamaledeta. Nainsani mpuu, lawi rakelo mbui Ia i sinangka-nangkana simbela ewa kita, agaiana baria Ia manawu i rara nu dosa. 16 Etumo mpane, ineemo kita maeka mogompilisi i Pue Ala, i kadera kadatuaNa anu i suruga bona modoko kita pewatiNa ai kamaasiNa lako i kabula nu raraNa anu baria sambela mawewe.