I Yesu melumbu kabose nu katuwuNa mpane lako i nabi Musa
3
1 Poka-poka anu mewalimo tau ni Pue Ala anu Narondemo! Nipairara kaimana i Yesu. Iamo tudua ni Pue Ala ai Tadulako Menomba Mabose anu tapotuu. 2 I Yesu matundu mampopolumako bago anu natuduka Ia ni Pue Ala. Simbela ewa i Musa ni banimpia, matundu mampopolumako bagona mokadipuraka Tombi ni Pue Ala. 3 Sintoto mpuu i Yesu, mansumba pebila anu melumbu lako si Musa. Simbela ewa sadua tau anu mowangu tombi, sangangaa melumbu karabilana mpane lako i tombi anu nawangu. 4 Ope-ope tombi, batena ria anu mowangu. Agaiana anu mobabei sinangka-nangkana, batena i Pue Ala ngkida. 5 I Musa mewali sadua tudua anu matundu, mampopolumako bagona mokadipuraka tombi ni Pue Ala. Apa anu napobago ni Musa etu, mewali sambua tanda kono i apa anu ina Nababei ni Pue Ala i tempo anu ina mai. 6 Agaiana i Kerisitu, baria wule topobago. I Kerisitu iamo Ana ni Pue Ala anu matundu mampopolumako bagoNa ewa sadua tadulako, anu mokadipuraka tombi ni Pue Ala. Kita eimo tombi ni Pue Ala, asala maroso liliu pepotuuta ai pebai kita mampololita kono pesarumakata si Pue Yesu.Inee tapakakoo rarata i peronde ni Pue Ala
7 Mewali, sangangaa nipetingai lompe patudu nu Inosa Magali anu teuki i rara Ngkora Magali, ewa ei:
“I eo ei, ane niepe wotu ni Pue Ala,
8 inee nipakakoo rarami ewa ulububumi ni banimpia.
Ulububumi aretu meewa sira i Pue Ala,
i tempora mampetandaka kasabaraNa i pada lori.
9 Nauli ni Pue Ala:
‘Ulububumi mampetandaka kasabaraKu,
nauda mangita sira tanda kuasa,
anu Kubabeika sira i rarana iba mpulu mpae kasaena.’
10 Etumo mpane marumpu Aku si sira, Kuuli:
‘Baria tetida rarara,
ai baria sira madota mampeulai peundeaKu.’
11 Marumpu Aku, ai Kusumpa, Kuuli:
‘Baria sira ina mesua i pearia anu masana, anu Kupasilolongamo bona mengkaroo sira simbela-mbela ai Aku.’” (Dulua Petoia 95:7-11)
12 Poka-poka, mainga-inga komi bona ntena komi ria anu madaa rarami ai baria ria pepotuumi, mpane bariamo komi meula si Pue Ala anu tuwu! 13 Aginamo mombepakaroso mporara komi eo-eona, ntena ria komi anu napakanawu nu dosa, duduuna makoo rarami. Mombepakaroso mporara komi, tongomi mani tuwu i tempo anu rauli “eo ei,” lempona, lako ria mani tempomi. 14 Lawi kita ei mosintuwu ai i Kerisitu, asala apa anu tapotuu lako i mpolinguruna, tapatoro liliu lako i rarata anu baria bata-bata duduuna i kasopoana. 15 Inee malipa rarata apa anu tabasa ni mpongone, anu teuki ewa ei:
“I eo ei, ane niepe wotu ni Pue Ala,
inee nipakakoo rarami
ewa ulububumi ni banimpia.” (Dulua Petoia 95:7-8)
16 Kamonsona imada sira tau arei, anu mangepemo sira wamba ni Pue Ala, agaiana kasopoana meewa sira si Ia? Sira aretu iamo tau anu natadulakoi ni Musa, mensuwu lako i tana Masiri. 17 Sira aretumo anu paka moparia karumpu ni Pue Ala i rarana iba mpulu mpae kasaena. Etumo mpane mamatemo sira i pada lori nakeningkamadosara. 18 I Pue Ala mosumpa, ewa ei, “Baria sira ina mesua i pearia anu masana anu Kupasilolongamo bona mengkaroo sira simbela-mbela ai Aku.” Imada anu Natunggai ni Pue Ala? Anu Natunggai iamo sira anu moewa Ia. 19 Mewali tainsani, kabariara pensani mesua i pearia anu masana anu Napasilolongamo ni Pue Ala, lawi baria sira mepotuu si Pue Ala.