Bambari katesorema
2
1 Etumo mpane, nakeningkamakuasa ni Pue Yesu, sangangaa kalalaua tapakalompe mpii pangulata patudu anu mamonso anu taepemo, bona ntena kita mopalengi pepotuuta. 2 Lawi ane Atura ni Musa anu rapadongkamo nu malaeka i ulububuta baria ria katebalikina. Ima ngkida anu baria mampetingai ai mampeulai atura etu, ina mansumba ia pesuku anu sintoto ai babeiana, 3 pelumbunamo pesuku ni Pue Ala si kita ane baria kita mohaile bambari katesorema anu melumbu mpii kuasana lako i Atura ni Musa. Lawi mpolinguruna, etu napadongkamo ni Pue Yesu saduduaNa, ai tau sira anu mpolinguruna mangepe lolita ni Yesu ni banimpia mopakanotoka kita kamonsona bambari etu. 4 Ai i Pue Ala mopakaroso mpii kamonsona Bambari anu rapadongkara, ai mobabei sira maisi mpangkana tanda kuasa ai tanda anu mewulii. Ai maisi mpangkana kapande anu nakiraka sira nu Inosa Magali, mangula peundeaNa.I Yesu mewali manusia bona mosorema kita
5 Baria malaeka-malaeka anu ina mansumba kuasa lako si Pue Ala, bona moparenta dunia ai langi anu bou, anu tapololita ei-ei. 6 Agaiana i rara nu Sura Ngkora Magali ria anu manguli ewa ei:
Apada manusia mpane Nukaendo?
Apada manusia mpane Nukadipuraka?
7 I tempona i dunia ei, saudi tepaiwoi ia lako i malaeka.
Nukiraka ia pomesoa anu meawa ai teadai.
8 Nupopengkoru sinangka-nangkana si Ia. (Dulua Petoia 8:5-7)
Mewali, anu tabasa ni mpongone: i Pue Ala mokira kuasa i manusia bona mokuasai sinangka-nangkana. Lempona, baria ria sampangka anu baria nakuasai nu manusia, nauda ei-ei baria mani taita manusia mokuasai sinangkana. 9 Agaiana ei-ei, tongawamo kamakuasa ni Yesu. I tempoNa tuwu i dunia ei, saudi tepaiwoi Ia lako i malaeka. Nakeningkabula rara ni Pue Ala, mamate Ia mosuru dosa nu manusia, ai mampoliungi kamateNa etu, ei-ei i Pue Ala mampopewali Ia Datu anu meawa ai teadai.
10 I Pue Ala moteru sinangka-nangkana mangula tunggaiaNa. Napakanoto, bona i Yesu mewali Topesorema anu baria ria kamakuraNa, nakeningkamapari anu Natodisa duduuna mamate. I Pue Ala mobabei ewa etu, bona mawori tau anu tesorema mansumba katuwu anu meawa simbela-mbela ai i Yesu. Lawi Iamo anu mobungkasika tau dala bona pensani rasorema.
11 I Yesu mopakagalimo manusia. I Yesu ai manusia anu magalimo aretu, sadua ngkida Tuamara. Etumo mpane i Yesu baria maea manguli ka Napopokara. 12 Nauli ni Yesu si Pue Ala, ewa ei:
“Ina Kubambari i poka-pokaKu kono si Iko.
I pogulu-guluara, modulua Aku motoia Iko.” (Dulua Petoia 22:23)
13 Nauli mbui ni Yesu:
“PesarumakaaKu, i Pue Ala ngkida.”
Mpane nauli mbui ni Yesu:
“Eimo Aku,
simbela-mbela ai tau anu Nupoanamo sira anu Nususukamo Aku.” (Yesaya 8:17,18)
14 Tau anu Napoanamo sira aretu, wule manusia biasa anu pensani mamate. Etumo mpane i Yesu mewali mbui manusia biasa ai tuwu ewa manusia, bona nakeningkamateNa, mogero Ia kuasa Datu nu Seta anu mokuasai kamate. 15 Mampoliungi kamate ni Yesu etu, Napawia sira lako i kaekara kono i kamate, lawi ni banimpia nakuasai sira nu kaekara kono i kamate. 16 Mewali, tongawamo baria malaeka anu Natulungi ni Pue Yesu, agaiana pemulea ni Burahimada. 17 Etumo mpane i pangka-pangkana, i Yesu sangangaa mewali manusia anu simbela ewa poka-pokaNa sira, bona pensani Ia mewali Tadulako Menomba Mabose, anu matundu ai buke pepokaasi. Ai mampopolumako liliu Ia bagoNa bona teampuni dosa nu manusia. 18 Lawi Yesu saduduaNa mangepekamo kapari tempoNa rakelo, etumo mpane pensani Ia motulungi tau anu rakelo.