Sura anu rapakatu i santobu tau anu mepotuu si Kerisitu anu rasanga
toIbrani
Ngkora ni Pue Ala anu napadongka nu AnaNa
1
1 Ni banimpia, mawori mbela i Pue Ala mololita i nabi-nabi bona pololitaNa etu rapadongkara i ulububuta, ai mawori mpangka dala Napake mopatudu sira. 2 Agaiana ei-ei i kasopoa dunia, lolita ni Pue Ala napadongkaka kita nu AnaNa. Mampoliungi AnaNa etumo, i Pue Ala moteru dunia ai langi. AnaNa etumo anu Napakanoto motumpui sinangka-nangkana anu ria. 3 Lako si Ia tongawa peawa ni Pue Ala. Lako si Ia mangita kita pangkeniaka ai kuasa ni Pue Ala. Ia anu mokadipuraka sinangka-nangkana anu ria ai pololitaNa anu makuasa. Awetu Ia roomo mobakosi dosa nu manusia, mengkaoremo Ia lau i suruga momeso i pomesoa anu melumbu mpii kateadaina simbela-mbela ai i Pue Ala, anu melumbu kamakuasaNa.I Yesu melumbu kabose nu katuwuNa lako i malaeka
4 AnaNa etu, Nakiraka kuasa anu melumbu lako kuasa nu ope-ope malaeka, ai sangaNa anu nakira ni Pue Ala, melumbu katebilana mpane lako i sanga anu rakiraka malaeka sira. 5 I Pue Ala baria sambela mopadongka lolita ei i malaeka, Nauli:
“Ikomo AnaKu,
i eo ei Kupopewalimo Iko AnaKu.” (Dulua Petoia 2:7)
Ai i Pue Ala baria mbui mololita i sadua malaeka ewa ei:
“Aku ina NapoTuama,
ai Ia ina KupoAna.” (2 Semueli 7:14)
6 I tempo ni Pue Ala motudu AnaNa anu torapowutua mai i dunia, ewa ei pololitaNa:
“Ope-ope malaeka ni Pue Ala sangangaa menomba si Ia.” (Dulua Petoia 97:7)
7 Agaiana kono i malaekaNa sira, ria teuki ewa ei:
“I Pue Ala mampopewali malaeka-malaekaNa, mewali ewa pambui,
ai toperora-toperoraNa ewa mbugi nu apu.” (Dulua Petoia 104:4)
8 Agaiana kono i AnaNa, nauli ni Pue Ala, ewa ei:
“O Pue Ala, kadatuaMu baria ina mokasopoa,
peparentaMu iamo peparenta anu manoto.
9 Mangunde Iko kamanoto ai mokasisi anu madaa,
etumo mpane Aku, i Pue Ala, PueMu, mampelisi Iko,
bona modoko Iko kateadai anu moparia katono,
melumbu lako i rangaMu sira.” (Dulua Petoia 45:7-8)
10 I Pue Ala mololita mbuimo i AnaNa, Nauli ewa ei:
“O Pue! Ikomo anu moteru dunia ai langi,
lako baria mani Nuteru sinangka-nangkana.
11 Ope-ope etu ina mapaia, ai ina mausa ewa sampi;
agaiana Iko batena ria liliu.
12 Sambela tempo, dunia ai langi ina Nupuko-puko ewa badu mpane ratende.
Mpane Nupasuru ai dunia ai langi anu mabou.
Agaiana Iko baria ina tebaliki,
katuwuMu baria ina mokasopoa.” (Dulua Petoia 102:26-28)
13 Ai i Pue Ala baria sambela mololita i sadua malaeka ewa anu Napadongka i AnaNa, ewa ei:
“Pomesomode mbai i kuanaKu,
duduuna Kupopengkoru
sira ope-ope iwaliMu si Iko” (Dulua Petoia 110:1)
14 Ane awetu, malaeka aretu apa sira? Sira aretu iamo tudua ni Pue Ala anu lako i suruga. Natudu sira bona motulungi tau anu ina Nasorema.