Pepotuu
11
1 Mepotuu lempona: apa anu tasarumaka si Pue Ala, tainsani batena mewali, naudapae baria mani taita apa anu tasarumaka etu. 2 Nakenimpepotuu nu ulububuta ni banimpia, napokatono sira ni Pue Ala. 3 Nakenimpepotuuta, tainsani langi ai dunia nateru ni Pue Ala ai NgkoraNa ngkida. Mewali, ope-ope anu taita, Nababei lako i apa anu baria pensani raita.Pepotuu ni Habeli, i Heno ai i Noho
4 Nakenimpepotuu ni Habeli, mosusu ia popenombana anu melumbu kalompena si Pue Ala, mpane lako i popenomba ni Kai, powutuna. Etumo mpane, popenombana etu nadoko ni Pue Ala ai Naimba ia manoto i petotokiNa. Mewali, naudapae mamatemo ia, agaiana nakenimpepotuuna, mewali ia pandiri si kita anu tuwu ei-ei.
5 Nakenimpepotuu ni Heno, naore tuwu-tuwu ia ni Pue Ala lau i suruga. Baria ria tau anu mansumba wotowatana. I rara nu Sura Ngkora Magali teuki: lako baria mani i Heno raore, napokatono ia ni Pue Ala. 6 Mewali tainsani mpuu: baria ria tau anu napokatono ni Pue Ala, ane baria mepotuu si Ia. Lawi tau anu dongka si Pue Ala, sangangaa napotuu i Pue Ala monso-monso ria, ai mowati ope-ope tau anu lako i rarara mpii mampenoka manginsani Ia.
7 Nakenimpepotuu ni Noho, mengkoru ia i parenta ni Pue Ala. Naulika ia ni Pue Ala, kaina riana anu ina mewali. Nauda baria mani naita pewalina, napeulaimo parenta ni Pue Ala ai nababeimo duanga mabose bona ia ai towawinena ai anana sira, tesorema sira lako i pesuku ni Pue Ala etu. Ai nakenimpepotuuna naimba ia ni Pue Ala manoto i petotokiNa. Agaiana ope-ope tau i dunia rasuku.
Pepotuu ni Burahima
8 Nakenimpepotuu ni Burahima, mampeulai ia parenta ni Pue Ala. Natudu ia ni Pue Ala lau i tana anu nadandika ni Pue Ala si ia ai i pemuleana bona mewali kirara. Nauda baria nainsani kaimbana lau, batena mangoka ia mangula parenta ni Pue Ala. 9 Kadongkana i tana etu, mepotuu liliu ia si Pue Ala. Ewa etu mbui i Isaki anana, ai i Yako tumpuna, modoko dandi ni Pue Ala etu. Agaiana nauda tana etu mewalimo kirara mangula dandi ni Pue Ala, meari sira i tana etu ewa torare. Meari ngkida sira i rara nu bambaru. 10 Lawi i Burahima tongona mampegia sambua kota anu maroso peongkoana, ai nawangu ni Pue Ala.
11 Nauda i Burahima matuamo ai towawinena malalo, batena ngkida napotuu kaina mansumbana pemuleana lako si Sara. Etu mewali lawi manoto i rara ni Burahima i Pue Ala batena mopabukei dandiNa.a 12 I tempo etu woto ni Burahima matuamo, bariamo nasarumaka kaina riana pemuleana. Agaiana nauda ewa etu, nakenimpepotuuna si Pue Ala, mewali maisi pemuleana anu baria pensani teimba kaworira. Kaworira ewa kaisi nu betue i langi ai wungi i wiwi nu tasi.
13 Ope-ope tau aretu mepotuu liliu sira duduura mamate, nauda baria mani sira mansumba apa anu nadandika sira ni Pue Ala. Pensani tauli, dandi etu raitara ngkaraomo ewa mewao-waomo ai rapotuura dandi etu batena mewali. Etumo mpane, rapangakura ewa tosandarena sira ai topolilo ngkida i dunia ei. 14 Lako i pololita nu tau aretu, tongawa si kita apa anu rasarumakara. Anu rasarumakara iamo tana anu pensani mewali tanara saduduara. 15 Baria tana anu rapalengira ni banimpia anu rasarumakara. Lawi ane rapana tana etu anu rasarumakara, keria mpuu tempora mesola i se etu. 16 Agaiana tana anu rasarumakara, iamo tana anu melumbu kalompena iamo suruga. Etumo mpane i Pue Ala baria Ia maea ane rapangakura ka Iana Pue Ala anu rapenombaira, lawi i Pue Ala mopatimamamo peariara.
17 Nakenimpepotuu ni Burahima, napeulai parenta ni Pue Ala, bona lau ia mosambale i Isaki ana saduduana napopenomba si Pue Ala, naudapae i Pue Ala modandimo si Burahima. 18 Naulimo ni Pue Ala si Burahima, “Lako i anamu i Isaki etu, ina mansumba iko pemuleamu mangula apa anu Kudandika iko.” 19 Napotuu mpii ni Burahima, i Pue Ala nabuku mopatuwu mpesola i Isaki lako i kamate. Ai pensani tauli, nasumba mpesolamo i Isaki nauda mamatemo.
Pepotuu ni Isaki, i Yako ai i Yusupu
20 Nakenimpepotuu ni Isaki i dandi ni Pue Ala i tempo anu ina mai, etumo mpane i Isaki mampopaingaka mpesola dandi etu si Yako ai i Esau i tempona mowati sira.
21 Nakenimpepotuu ni Yako, nauda ina mamatemo ia, mowati mani ia ana ni Yusupu anu rodua, ai mekakae si Pue Ala motumpa i wuntu lintokona.
22 Nakenimpepotuu ni Yusupu, nauda ina mamatemo ia, mampololita mani ia kaina lambuna pemulea nu toSaraeli lako i tana Masiri. Ai napeawilii kono i karapadiwakana wuku-wukuna luwu.
Pepotuu ni Musa
23 Nakenimpepotuu nu tomana ni Musa, baria sira maeka moliungi parenta nu datu toMasiri. Rawunira i Musa duduuna tinuwuna tolu mbula, lawi raita nu tomanana peraena.
24 Nakenimpepotuu ni Musa, i temponamo mabose, baria naunde rauli ana lako i ana towawine datu nu toMasiri. 25 Naunde mani mantodisa kapari simbela-mbela ai tau ni Pue Ala, mpanena tuwu i rara kamatono-tono anu sampalai ngkida, anu kasopoana mangkeni ia i rara dosa. 26 Naunde mani ni Musa rapakoi nakenimpepotuuna si Datu Topesorema anu ina mai, mpanena mansumba ia anu-anu, anu lako i tana Masiri, lawi mesarumaka liliu ia si Pue Ala bona nasumba surungina i luwuna.
27 Nakenimpepotuu ni Musa, napalengi tana Masiri, baria napokaeka karumpu datu nu toMasiri. Tetida liliu ia i tunggaiana, lawi ewa naitamo i Pue Ala anu baria raita. 28 Nakenimpepotuuna, moparia ia Eo Pasa nu toSaraeli, ai natudumo sira toSaraeli mosimpeka raa dimba i boboka nu tombira, bona ane moliu malaeka anu mepopate, anara anu torapowutu baria ina rapopate.
Pepotuu nu tau ntanina
29 Nakenimpepotuu nu toSaraeli ni banimpia, moweta sira Tasi Mawaaga ewa wule molumako i lorena. Ni tempo etu nawulai sira nu toMasiri, agaiana tongora moweta mewulai, mamate sira malinso. 30 Nakenimpepotuu nu toSaraeli motoleliki sira bente kota Yeriko i rarana pitu eona, duduuna magero bente etu. 31 Nakenimpepotuu ni Rahab, baria ia rapopate simbela-mbela ai tau anu baria sira mengkoru si Pue Ala. I Rahab etu, sadua towawine anu merikati babeiana. Agaiana i tempona basangkia toSaraeli lau mampendenga kota Yeriko, nadoko lompe sira i tombina, ai natulungi sira.
32 Maisi mani anu pensani kuulika komi, agaiana bariamo sondo tempoku motuntu kono si sira ope-ope, ewa i Gideo, i Barak, i Simson, i Yepta, i Daudi, i Semueli ai nabi-nabi ntanina. 33 Nakenimpepotuura,
mampopengkoru sira datu-datu,
meparenta sira i kanoto-notona,
modoko sira anu nadandika ni Pue Ala,
motuko sira nganga nu singa,
34 baria sira mamate i tempora ratende i rara apu anu mambugi mpii,
tepawia sira lako i tau anu mampenoka mampopate sira,
malede sira, agaiana mewali sira maroso mpii,
pebai sira mombeala,
monangi sira surudado nu iwalira.
35 Ria sira towawine, nakenimpepotuura rapatuwuka mpesola sira santombiara anu mamatemo.
Agaiana ria mbui sira anu baria raundera rapawia lako i karapopesiasira, raundera mani rapopesiasi duduura mamate, lawi mampenoka sira rapatuwu mpesola bona mansumba sira katuwu anu melumbu kalompena. 36 Ria sira anu rapakoi ai maruminsi karasepe-sepera, ria mbui sira anu rataka ai rante ai ratarunggu. 37 Ria sira anu rawatui duduuna mamate, anu rapua ai garagaji, ai anu rapopate ai guma. Ria sira anu tuwu mokakasaodamo, pesampira kolimba dimba ai kolimba nu towaudamo, mesiasi katuwura, rapopesiasi ai rarurugii sira. 38 Tuwu mokakasaodamo sira i pada lori ai i mungku-mungkuna, mentawuni sira i balamba-balamba watu. Kamonsona, dunia baria sintoto rapearii nu tau anu ewa etu kalompe nu rarara.