Mepotuu liliu kita ai tetida liliu kita i rara nu kapari
12
1 Poka-poka! Pensani tauli: mawori tau anu maroso pepotuura ni banimpia, motoleliki kita ai mampeita adiwa katuwuta. Kita ei ewa tau anu momberiri, etumo mpane kusuweki rarami bona tatende ope-ope anu paka mosomboki kita meula si Pue. Sangangaa tatende ope-ope anu mepakantimi, ai sangangaa tatende dosata anu mosomboki kita, ai tetida kita mangula dala anu napakanotokamo kita ni Pue Ala. 2 I rara pomberirita etu, petotokita batena si Yesu anu mobungkasimo dala nu pepotuuta duduuna baria ria kamakurana. I Yesu tetida liliu i rara kapari duduuna mamate i kau anu rapopombesape. KamateNa i kau anu rapopombesape etu mepakaea mpii, agaiana nauda ewa etu, Nasusu ngkida wotoNa rapaku i kau anu rapopombesape, lawi Napenoka mansumba katono anu i luwuna. Ei-ei rakiraka Ia pearia anu teadai mpii mbai i kuana ni Pue Ala, meparenta Ia simbela-mbela ai Pue Ala i suruga.3 Nikaendo poka, adiwa kaparina mpii naepe ni Yesu nakeni peewa nu tau anu madosa, mpane kasopoana rapopate Ia. Mewali poka, sangangaa nipekiri liliu etu bona ntena komi malede ai mapari rarami. 4 Lawi moewa mbui komi dosa, agaiana i rara pombealami moewa dosa, baria mani komi rapopate ewa i Yesu. 5 Ai sangangaa nikaendo patudu Ngkora ni Pue anu mopatudu komi ewa sadua tuama mopatudu anana, nauli:
“Anaku, nupairara lompe patudu ni Pue,
ai inee mapari raramu ane Nakambaroka iko.
6 Lawi i Pue Ala mokambaroka ope-ope tau anu Napokaasi,
ai mosepe ope-ope tau anu Napoana.” (Ayubi 5:17, Pepatudu ni Salomo 3:11-12)
7 Ane mansumba komi kapari sangangaa tetida komi, etu niimba sambua patudu ba pekambaroka lako i Tuamami anu i suruga. I Pue Ala mopatudu komi, ewa sadua tuama mopatudu ai mokambaroka anana. Lawi baria ria anakoi anu baria nakambaroka nu tuamana. 8 Ope-ope tau anu napoana ni Pue Ala, batena Nakambaroka. Mewali, ane rapana baria komi sambela nakambaroka ni Pue Ala, lempona baria mpuu komi anaNa. 9 Kita ope-ope rakambarokamo nu tuamata i dunia, ai tabila sira, apa mani i Tuamata anu i suruga. Ane Nakambaroka kita, sangangaa tapengkorui mpuu bona mansumba kita katuwu. 10 Tomanata i dunia mopatudu kita basangkia mpae ngkida kasaena, mangula apa anu malompe i petotokira. Agaiana i Pue Ala mopatudu kita, bona mansumba kita apa anu malompe. Nababei ewa etu bona magali kita ewa Ia. 11 Tongota rapatudu ba rakambaroka, baria kita matono, mapari rarata. Agaiana ane tapeulai patudu etu, ina manoto babeiata, ai ina malene rarata.
12 Etumo mpane, nipakaroso palemi anu malede ai paami anu morada-rada. 13 Sangangaa nipakanoto peulami si Pue, bona ane ria mani rangami anu bata-bata rarara baria sira ina manawu, agaiana maroso mpesola pepotuura, ewa tau anu mongguja baria tepalanggaru agaiana maosada ia.
14 Sangangaa nipari-pari mosintuwu ai ope-ope tau. Nipari-pari bona magali katuwumi, lawi tau anu baria magali katuwuna baria ina mangita i Pue. 15 Mainga-inga komi bona ntena ria sadua tau anu mopalengi pepotuura si Pue Ala ai mosapuaka asiNa. Mainga-inga komi, ntena ria sira tau anu dongka i olomi ewa owo anu ria rasuna, anu mopakasusa komi ai mopakarugi katuwu nu tau wori. 16 Mainga-inga komi bona ntena ria anu mobabei babeia anu merikati, ai baria moadai i Pue Ala, ewa i Esau ni banimpia, napobaluda pewati i katorapowutuna mpii i toina, nantolosi ngkida ai santabo pangkoni. 17 Niinsani mpuu tunturakana etu. Roo awetu, napenoka mansumba pewati katowutu lako i tuamana, agaiana bariamo pensani nasumba. Nauda motumangi ia mamperade pewati etu, bariamo ria dala mopakalompe kamasalana.
Petingai Ngkora ni Pue Ala
18 Poka-poka bariamo komi dongka si Pue Ala ewa toSaraeli ni banimpia. Dongka sira i apa anu pensani rapeita iamo Bulu Sinai. I tempora dongka i bulu etu, mangita sira apu ai rambu, gawu anu madedi mpii, ai pambui anu masimbuku mpii. 19 I tempora mangepe pomomoni nu tatamburu ai wotu ni Pue Ala anu mololita masisimbuku si sira maekamo sira. Mewali raperadera mpii bona wotu etu ineemo mololita si sira. 20 Lawi baria rabukura mampeulai parenta anu napadongka ni Pue Ala etu, Nauli, “Ima ngkida anu moturi bulu ei, sangangaa rawatui duduuna mamate, awetu mbui binata.” 21 Apa anu mewali i toSaraeli etu, mewulungati mpuu. Mogaloda i Musa, manguli mbui, “Maeka aku ai morada.”
22 Poka, baria komi dongka i bulu anu ewa etu. Agaiana ei-ei, dongka komi i Bulu Sion iamo kota Yerusale anu i suruga, anu napearii ni Pue anu tuwu, i se etu mbui ria malaeka i nsobuna anu mogulu sira i rara nu katono-tono. 23 Komi mbui dongkamo i pogulua nu tau sira anu raimba ana torapowutu ni Pue Ala anu teuki sangara i rara suruga. Komi mampombeliokamo i Pue Ala anu mobotusi kara-kara nu ope-ope tau. Komi ria simbela-mbela ai tanuana nu tau anu manoto babeiara ni banimpia ai anu rapakagali i petotoki ni Pue Ala. 24 Dongkamo komi si Yesu mampomberumpaka Ia, Topetongo-tongoi anu mopakaroso dandi ni Pue Ala anu mabou mampoliungi kabubu nu raaNa. Ai raaNa etu, mokiraka komi katongawaana pesarumakami anu melumbu kalompena lako i raa ni Habeli.
25 Etumo mpane sangangaa mainga-inga komi. Inee komi ria anu baria madota mampetingai i Pue Ala. ToSaraeli ni banimpia, baria sira mampotuu lolita ni Pue Ala anu mongkora si sira, ai batera rasuku. Apa mani kita anu mangepe lolita ni Pue Ala anu mongkora si kita lako i suruga. Ane baria kita mampotuu lolita ni Pue Ala, batena baria kita tepawia lako i pesukuNa. 26 I tempo ni Pue Ala mongkora i toSaraeli, wambaNa mampopogua-gua dunia. Agaiana ei-ei modandi Ia, Nauli “Sambela mani ina Kupopogua-gua baria wule dunia agaiana langi mbui.” 27 NgkoraNa anu manguli “sambela mani”, lempona: mopakanoto kaina Napopogua-guana ai Nagero mpuu sinangka anu Nateru ei, bona sinangka anu Nateru etu, apa anu pensani mogua-gua etu anu magero ai apa anu baria pensani mogua-gua, etudamo anu tetida.
28 Mewali poka, nakeningkamansumbatamo tibota i rara peparenta ni Pue Ala anu baria pensani mogua-gua, etumo mpane sangangaa tauli maisi kalompena si Pue Ala, ai sangangaa menomba mpuu kita si Ia mangula peundeaNa, tabila Ia ai mengkoru mpuu kita. 29 Lawi i Pue Ala anu tapenombai ewa apu anu mepakawuroto.