Patudu Kasopoana
13
1 Mombepokaasi liliu komi sadua ai sadua i rara nu popokami, i rara nu pepotuumi. 2 Ane ria torare anu dongka i tombimi, sangangaa nidoko lompe sira. Lawi ria sira tau ni banimpia anu mampotorare malaeka, agaiana baria rainsanira kamalaekana torarera aretu.3 Sangangaa nitulungi rangami anu i rara nu tarunggu. I potulungimi sira etu, nibabei ewa ratarunggu mbui komi simbela-mbela ai sira. Ai nitulungi sira tau anu rapopesiasi. I potulungimi sira etu, nibabei ewa rapopesiasi mbui komi simbela-mbela ai sira.
4 Ope-ope tau sangangaa mampeulai ada posamboko. Komi anu mosambokomo, inee komi mebualosi ai mobabei anu merikati. Lawi tau anu ewa etu babeiana, batena nasuku ni Pue Ala.
5 Inee komi wule mampekiri doi. Niposondoka apa anu ria si komi. Lawi ria lolita ni Pue Ala anu manguli:
“Baria iko Kupalengi,
baria iko Kupatumbeika.”
6 Etumo mpane maroso rarata, manguli:
“I Pue motulungi aku, baria aku maeka.
Baria kupokaeka apa anu rababeika aku nu tau.” (Dulua Petoia 118:6)
7 Sangangaa nikaendo liliu tadulakomi ni banimpia, anu mopadongkaka komi Ngkora ni Pue Ala. Nikaendo liliu adiwa polumako nu katuwura duduura mamate ai nipeulai pepotuura si Pue Ala. 8 I Yesu Kerisitu baria tebaliki; Ni banimpia, ei-ei, ai duduuna i kasae-saeana.
9 Mewali, inee komi mampeulai patudu anu ntanina anu mepakanawu, aginamo nikaendo asi ni Pue Ala lako i kabula raraNa si komi. Lawi etumo anu mopakaroso pepotuumi, baria i atura kono i pangkoni anu pensani rakoni ai anu baria pensani rakoni.
10 Si kita ria anu melumbu kamalompena lako i Atura ni Musa. Si kita riamo popenombata anu mosompo salata, ai tadulako menomba anu mampeulai Atura ni Musa, baria pensani ria kirara lako i popenombata etu. Ane si kita riamo potunua popenomba anu taposusui popenomba si Pue Ala.a 11 Ni banimpia, ane sambaa binata rasambale moampuni dosa, raana nakeni nu Tadulako Menomba Mabose i rara nu Lonta Magali Mpii, agaiana wotona anu mamatemo etu, rakeni lau i raoa nu bambarura mpane ratunu duduuna mewali awu. 12 Ewa binata anu rakeni ratunu i raoa nu bambarura, i Yesu mbui rakeni lau i raoa boboka bente nu kota mpane rapopate, bona raaNa mopakagali tauNa. 13 Mewali poka, aginamo lau kita si Yesu ai tapotuu Ia, naudapae kita rapapakoi nu tau ewa Ia. 14 Lawi i rara dunia ei, baria ria peariata anu takatetidai liliu. Mampegia mani kita peariata anu ina mai. 15 Mewali, nakeningka natongo-tongoita ni Yesu, tasusu liliumo popenombata i pangulita maisi kalompena si Pue Ala. Popenombata etu, iamo petoiata anu mopakabose sangaNa. 16 Inee kita mengkaroo mobabei babeia anu malompe. Ai sangangaa motulungi kita rangata, lawi etumo popenombata anu napokatono ni Pue Ala.
17 Nipeulaimo sawaa nu tadulakomi ai nipengkorui sira. Lawi sira anu mopakaroso pepotuumi, ai sira anu sangangaa mopadongka si Pue Ala kono i pobagora. Nipeulai sawaara bona matono sira mobago. Ane baria nipeulai sawaara, ina mapari rarara ai baria ria pobunduana si komi.
18 Kiperade bona nipekakaeka liliu kami. Kiinsani kabula raraki, lawi i pangka-pangkana kipenoka mobabei liliu anu manoto. 19 Ai aku, kuperade mpuu bona nipekakaeka aku bona maliga mesola mampomberumpaka mpesola komi.
Pekakae kasopoana ai kaopea nu sura
20 Mekakae aku si Pue Ala puu kalompe nu katuwu anu mopatuwu mpesolamo i Pue Yesu lako i kamate. NakeningkamateNa etu, ei-ei mewalimo Ia Toporewu anu melumbu kalompena, kita iamo dimba-dimbaNa. KamateNa etu mbui mopakanoto dandi anu baria mokasopoa anu nababei ni Pue Ala si kita. 21 Kuperade bona i Pue Ala mopasondoi komi i sinangka-nangkana anu malompe bona pensani komi mobabei peundeaNa. Kuperade bona nakenimposintuwuta ai i Yesu Kerisitu, i Pue Ala mobago i rarata duduuna kita ei Napokatono mpuu. Tetoiamo i Yesu Kerisitu duduuna i kasae-saeana. Amin.
22 Poka-poka, kuperade bona nipetingai mpuu patuduku ei, lawi suraku ei marede ngkida.
23 Bona niinsani mbui: pokata i Timotiu rapawiamo lako i tarunggu. Ane dongka ia i se ei, simbela-mbela kami lau mosondaki komi.