Sura ni Suro Paulu anu napakatu si
Pilemo
1
1 Sura ei lako si aku i Paulu, anu ratarunggu nakenimpobagoku mopadongka bambari kono si Yesu Kerisitu, ai lako si Timotiu, pokata sampepepotuuta. Kipakatu sura ei si iko Pilemo, pokaki sampopobago anu kipokaasi. 2 Kipakatu mbui si Apia, pokata towawine anu tapokaasi, ai si Arkipus pokata anu sampopobago i rara mpopari-pariki mopadongka Ngkora ni Pue Ala, ai i ope-ope jumaa anu mogulu i tombimu. 3 Maisi tabea, kisarumaka i Pue Ala Tuamata ai i Pue Yesu Kerisitu ina mowati komi lako i kabula nu raraNa, ai mokiraka komi kalompe nu katuwu.I Paulu motoia i Pilemo nakeningkabose nu asina ai karoso nu pepotuuna
4 I rara nu pekakaeku, kukabelai liliu iko poka, ai kuuli maisi kalompena si Pue Ala. 5 Lawi kuepemo bambari, adiwa karoso nu pepotuumu si Pue Yesu ai kabosena asimu i ope-ope tau ni Pue Ala. 6 Mekakae aku bona popokata i rara pepotuu si Kerisitu, ina motambai liliu ka tainsanina ope-ope pewati anu nakiramo ni Pue si kita, nakenimposintuwutamo ai i Kerisitu. 7 Matono mpuu aku ai tepalindo raraku nakeningkabosena asimu etu Pilemo, lawi iko anu mopakaroso rara nu ope-ope tau ni Pue Ala.
Pamperade ni Paulu si Pilemo kono i Onesimus
8 Pokaku Pilemo! Kamonsona, pensani iko kuparentai mobabei apa anu sintoto, lawi nakiraka aku ni Kerisitu kuasa etu. 9 Agaiana kukaendo kabosena asimu, etumo mpane baria iko kuparentai. Kupadongka ngkida pamperadeku si iko. Aku i Paulu, anu matuamo anu tongoku ratarunggu nakenimpobagoku si Yesu Kerisitu. 10 Kuperade bona nudoko lompe kowo anaku ei, i Onesimus. Kupoanamo ia, lawi tongoku ratarunggu i se ei, aku anu mopaguru ia bona mepotuu si Pue Yesu. Mewali, aku anu napotuama i rara nu pepotuuna. 11 Ane ni banimpia, baria ia mobundu si iko Pilemo. Agaiana ei-ei, mobundu mpii si iko, ai baria wule si iko ngkida, agaiana si aku mbui.
12 Mewali ei-ei, anaku anu kupokaasi ei, kutudu mesola mpesola si iko. 13 Ane wule peundeaku kuula, kuombo mani ia meari simbela-mbela ai aku i kota ei, lawi kuimbamo pasurumu anu motulungi aku tongoku ratarunggu nakenimpobagoku mobambari Bambari Malompe. 14 Agaiana baria aku madota moombo ia i se ei, ane baria iko saduduamu anu manguli. Peundeaku bona apa anu nubabei, nubabei mpuu lako i raramu. Lawi baria kuunde mopari-pari iko mampeulai peundeaku. 15 Pekiri, pogaami anu sampalai ei, tunggaia ni Pue bona pensani ia mesola si iko duduuna i kasae-saeana. 16 Ai ei-ei i Onesimus etu, bariamo nuimba wule ewa batuamu. Ei-ei sangangaa nuimba mbui ia ewa pokamu sampepepotuumu anu nupokaasi. Ane kupokaasi ia, pelumbunamo iko. Sangangaa nupokaasi ia malompe i kamanusiana, ewa etu mbui i rara sanga ni Pue.
17 Mewali, ane nuimba aku rangamu anu sampepepotuu, kuperade bona nudoko mpesola i Onesimus ewa ka nudokoku. 18 Ane ria salana ba indana si iko, aku anu mokolo. 19 Anu kuuki ei, kuuki ai paleku: aku i Paulu ina mobaiari ope-ope indana. (Baria iko paraluu kupopaingaaka ka akuna anu mopadongkaka iko Bambari Malompe. Mewali, nakeningkamansumbamu katuwu malompe, moinda mbui iko si aku.)
20 I Pilemo pokaku sampepepotuu i rara ni Pue, kuperade bona nudoko mpesola i Onesimus, etumo anu mopakatono raraku si Kerisitu. 21 Kuuki sura ei, lawi kupotuu ka nupabukeina pamperadeku, ai kuinsani ka nubabeina melumbu lako i pamperadeku.
22 Ai kuperade mbui bona nupasilolongaka aku paturuaku i rara nu tombimu, lawi kusarumaka i Pue Ala ina mosonoi pekakaemi, bona tepawia aku lako i tarunggu ei, duduuna pensani komi kusondaki.
Tabea kasopoana
23 I Epafras, anu ria simbela-mbela ai aku i rara nu tarunggu nakenimpobagona mopadongka bambari kono si Yesu Kerisitu, mopakatu mbui tabeana. 24 Tabea mbui lako i pokaku sira anu sampopobago, iamo i Markus, i Aristarkus, i Demas ai i Lukasi. 25 Kuperade bona i Pueta Yesu Kerisitu mowati komi ope-ope.