2 ANENE
Mantû ma îbuku rîrî
Wa ta 1 Anene, mwandîki wa îbuku rîrî atiiyîkeene, îndî nwa wîgue i kîroria kîmwe kîa bira biarî ûkombooni na nwa wîgue n'Esira kana Esekieri arî Mbabironi kana ûkeegua i Njeremia arî Miisiri. Mabuku mama waûmba kwîgua maandîkirwe gatîgatîîni ka mwanka wa 560 MKA na 538 MKA rîra Aisiraeri baacookire kuuma ûkombooni Mbabironi. Mbereeni îbuku rîa 1 Anene na 2 Anene rîarî îbuku rîmwe îndî nyumaani rîagaanua maita maîrî. Mabuku mamu marî maîrî meeyanaga ngono cia mantû mathingateene ma anene mwanya mwanya kwanjîîria kîrî mûnene Ndaundi mwanka îgiita rîra Isiraeri yaarî ûkombooni Mbabironi. Mabuku mama maarîîrîîtie kagiita ka mîanka magana mana, kuuma Soromoni agûtuîka mûnene ta mwankaani wa 971 MKA (1 Anene 2) mwanka rîra Njeoyakini mûnene wa Njunda aarekeerue kuuma nceera mwankaani wa 560 MKA (2 Anene 25).
Îbuku rîrî nwa rîgaanue maita maîrî:
1. Rûgono rwa nyumaani rwa Njunda na rwa Isiraeri kuuma cencarî ya kenda MKA mwanka kûgwa kwa Isiraeri mwankaani wa 722 MKA (Gîcu. 1-17).
2. Rûgono rwa Njunda kuuma mwanka wa 722 MKA mwanka kûgwa kwa Njunda na Njerusaremu mwankaani 586 MKA (Gîcu. 18-25).
Îbuku rîrî rîrîaria mantû ma mîgarûkîre îmînene îra yakarîkire rûgonooni rwa Isiraeri, ta gûtaîgwa na kwirwa ûkombooni Mbabironi. Wana kinya wegua Ngai n'abanenkereete nthîgûrû yao bongwa, abaruta nthîgûrû înu yao n'ûntû bwa kûrega kwathîka na baatua kûgonga mîbuanaano.
Wa mûnene na bwake na ngûgî îra îrûtîkîîte îraithanîîrîtue na baita yayo gîîkîrundu. Mantûûni mama monthe rîra kwarî na anene baakai beega na baingî bathûûku, kagiita ga ûkiri na ka ndûa, kagiita ka ûthii na mbere na ka wînyangia, Ngai nwa oonekanaga arî Ngai ûra aathanaga mantûûni monthe na ûra aatûmagîra anthû baake kûûyûria mîbango yake kîrî antû baake. Aathanaga na akeeyana ûkûrû gûkûrûkîîra iroria biake. Îbuku rîrî rîa 2 Anene i ngerekano îmbega ya gûtwonia ateeyanaga îkaanûkia ataambîîte gûkaanania bwega.
Gwookubî îbuku rîrî rîkari ûûgû:
Ûnene bûgaûkeene (1:1-17:41)
a. Kîroria Erisa (1:1-8:15)
b. Anene ba Njunda na Isiraeri (8:16-17:4)
c. Kûgwa gwa Samaria (17:5-41)
Ûnene bwa Njunda (18:1-25:30)
a. Kuuma Mûnene Esekia mwanka Mûnene Njosia (18:1-21:26)
b. Wathani bwa Mûnene Njosia (22:1-23:30)
c. Anene ba mûthia ba Njunda (23:31-24:20)
d. Kûgwa kwa Njerusaremu (25:1-30)