Mûnene Esekia wa Njunda
(2Karaaya 29:1-2; 31:1)
18
1 Mwankaani wa îthatû wa wathani bwa Osea mwana wa Era, mûnene wa Isiraeri, Esekia mwana wa Aasi atuîka mûnene wa Njunda. 2 Aarî na ûkûrû bwa mîanka mîrongo îîrî na îtaano rîra aatuîkire mûnene, na aathana arî Njerusaremu mîanka mîrongo îîrî na kenda. Gina eetagwa Abi mwarî wa Sakaria. 3 Athingatîîrîîte ngerekano ya kîûyûe mûnene Ndaundi, n'arûthire bûra bwakenagia Mwathani. 4 N'enyangiirie gûntû gwa kûgongera ngai cia ûrongo, aunaanga itugî bia maiga, na aatemanga mîbuanaano ya ngai ya mûka Asera. Na aacooka aunanga njoka ya rûthuku îra Musa aarûthîîte, îra yetagwa Neusitani. N'ûntû mwanka kagiitaani gaku antû ba Isiraeri i baabîîthîîtie macoco n'ûntû bwa kûmîtîîya. 5 Esekia n'ewatîîtie Mwathani, Ngai wa Isiraeri. Njunda îtaaro yîthîrwa na mûnene ûngî ta we, mbere kana nyuma ya îgiita rîake. 6 Naarî mwîtîgua kîrî Mwathani na ataarega kûmwathîkîra. N'amenyeere mûno aiga maathana mara Mwathani aanenkereete Musa. 7 Kwoogu Mwathani naarî amwe n'we, na n'aûmbanire mantûûni mara monthe aarûthire. N'athiire kînyume na mûnene wa Asîîria na aarega kûmwathîkîra. 8 N'aturire Afirisiti, na aithûkîra taûni ciao, kuuma taûni îra niini mwanka taûni îra nene, amwe na Gasa na ntûûra ira imîthiûrûkîrîîte.9 Mwankaani wa îna wa wathani bwa Esekia, ûra warî mwanka wa mûgwanja wa wathani bwa Osea mûnene wa Isiraeri, mûnene Sarimanesa wa Asîîria aithûkîra Isiraeri na aakîîmba Samaria. 10 Mwankaani wa îthatû wa gûkîmbwa, Samaria yagwatwa. Ûyû nuu warî mwanka wa îthanthatû wa wathani bwa Esekia, na mwanka wa kenda wa wathani bwa Osea. 11 Mûnene wa Asîîria aathûkia Aisiraeri abaira Asîîria barî abungwa na agaiga bamwe batûûra taûni ya Araa, bamwe akubî na muuro wa Abori rûteere rwa Ngosani, na bangî taûni cia Mendia.
12 Samaria yagwatirwe n'ûntû Aisiraeri bataathîkîra Mwathani Ngai wao, îndî bauna kîrîîkanîro kîra aarûthîîte nabo na baarega kwathîkîra mawatho monthe mara meeyanîîtwe i Musa, mûruti ngûgî wa Mwathani. Batamathikîîria na batamaathîkîra.
Asîîria baamakia Njerusaremu
(2Karaaya 32:1-19; Isa 36:1-22)
13 Mwankaani wa îkûmi na îna wa wathani bwa mûnene Esekia, Senakeribu, mûnene wa Asîîria, aithûkîra taûni ira mbirigîre cia Njunda na abatura. 14 Esekia aatûmana ntûmwa îno kîrî Senakeribu mûnene wa Asîîria, ûra warî Rakisi, “I ndûthîîte mabîtia, itû rekana na kûmbithûkîra, na nkaarîa kîra ûgeetia.” Îcookio rîa mûnene rîarî Esekia nwa mwanka amûtûmîre kiro ngiri îkûmi cia fetha na kiro ngiri îmwe cia thaabu. 15 Esekia amûtûmîra fetha cionthe cia Nyomba ya Mwathani na cia kîgîîna kîa nyomba ya mûnene. 16 Rîru Esekia mûnene wa Njunda aarûmûra thaabu îra yarî mîrangooni ya Nyomba ya Mwathani na thaabu îra we wengwa aakunîkîrîte n'yo itugî bia mîrango, na aatûma cionthe kîrî Senakeribu mûnene wa Asîîria.
17 Mûnene wa Asîîria aatûmana njûûrî înene kuuma Rakisi kwithûkîra Esekia Njerusaremu, yatongoreetue n'atongoria bathatû bara banene. Rîra baakinyire Njerusaremu, barûngama bantû ara nguo ibûûragîrwa, akubi na mûtaro ûra wareetaga rûûyî kuuma kîriani kîa bwa îgûrû. 18 Rîru batûmana mûnene Esekia, na atongoria bathatû baake baathi kûrîîkana nabo. Atongoria baba baarî, Eriakimu mwana wa Irikia, ûra warî mûrûgamîîri wa gîkaro kîa mûnene, Sebuna, mwandîki wa kooti, na Njoa mwana wa Asabu, ûra aarî mûmenyeeri wa mantû mara maandîke. 19 Ûmwe wa atongoria ba Asîîria abeera,
“Mûnene n'akwenda kûmenya i mbi îtûmîîte Esekia eegua arî na kwîbîtîgia.” 20 Aûria, “I bûkûthûgaania mîgambo nwa îthûkie kaanya ga ûtea na inya ya njûûrî? N'ûû bûkûthûgaania akabûteethia îîndî n'ûntû bûkûûmîria Asîîria kîongo? 21 Ka bûkwîrîgîîra Miisiri îbûteethia? Îndî bûbu i ta gûtûmîra rûthanje rûrî mûkwayû. Rûra rûkaunîka na rwenithie njara yaku. Ûgu i bu mûnene wa Miisiri akari rîra muntû nwa ûrîkû amwîrîgîîrîîte.
22 Mûnene wa Asîîria aathi na mbere, ‘Kana bûkambîîra bwîrîgîîrîîte Mwathani Ngai wenu?’ Kana i gûntû gwake kûtheru na ithînjîro bira Esekia eenyangiirie, rîra eerire Njunda na Njerusaremu bagongere kîthînjîrooni gîonka kîra kîrî Njerusaremu? 23 Ncûûni îndî, tûgwatanîre na mwathi wakwa, mûnene wa Asîîria, na ngakûnenkera mbaraathi ngiri ciîrî wegua ûkoona antû ba kûgana ba gûcithiithia! 24 Wana woû mûnene ûtiganaana na mûtongoria wa Asîîria ûra mûniini, kinya ûkeegua n'wîrîgîîrîîte Amisiri bagûtûmîra nkaarî cia ndûa na athiithia ba mbaraathi! 25 Ûrîthûgaania mbithûkîrîîte nthî yaku ntarî na ûteethio bwa Mwathani? Mwathani wengwa n'we ambîîrire miithûkîre na mîînyangie.”
26 Rîru Eriakimu mwana wa Irikia, Sebuna, na Njoa beera mûtongoria, “Twarîrie na rwaria rwa Kîaramu, mûnene. I tûgûkîmenya. Menya waria Kîîyaundi, n'ûntû antû bonthe bara barî rûthingooni i bagûkîmenya.”
27 Acookia, “Ûrîthûgaania i kîrî woû na mûnene waku bwinka mûnene antûmîîte mbwîra mantû mama monthe? Arî, kinya i nkwarîria antû bara bakari nthî rûthingoni, bara bakaarîa mai maao na banyue maumago maao, wa ta bûra wana woû ûkarûtha.”
28 Rîru mûtongoria arûngama na augîîria na Kîîyaundi, “Thikîîriani bûra mûnene wa Asîîria akuuga! 29 N'akûbûkaania bûtikaareke Esekia abwenia. Esekia atibwonokia kuuma njaraani cia mûnene. 30 Na bûtikeende abûgarûra abwîra bwîrîgîîre Mwathani. Bûtikaathûgaanie kana Mwathani akabwonokia, kana agiria njûûrî yetû ya Asîîria îgwata taûni yenu. 31 Bûtikaathikîîrie Esekia. Mûnene wa Asîîria arîbwatha buumagare ome ya taûni na bwînenkanîre kîrî mûnene. Rîru bwinthe bûkaûmba gwîtîgîîrua kûrîa ncabiibû kuuma mîcabiibûûni yenu yongwa, na nkûyû kuuma mîtîîni yenu, na bûnyue rûûyî kuuma ithimaani bienu biongwa. 32 Na mûnene akaaya abwire nthîgûrû îra îkari ta yenu yongwa, îra îrî na irio na ndibei, nthîgûrû îrî na mîgaate na mînda ya mîcabiibû, nthîgûrû ya mîceituuni, na kinya ûkî. Rîru bûgaatûûra îndî bûtiikua. Bûtikaareke Esekia abûta akîbwîraga Mwathani akabûtuunyûkia. 33 Ka ngai cia nthîgûrû ira ciingî ciaro cionokia nthîgûrû ciao kuuma kîrî mûnene wa Asîîria? 34 I kû irî îndî, ngai cia Amathi na Aripandi? Irî kû ngai cia Sefaribaimu, Ena, na Iba? Kûrî we woonokia Samaria? 35 I rî îmwe ya ngai cia nthî ino cionthe yaaro yonokia nthîgûrû ciao kuuma kîrî mûnene wetû? Aabu i mbi îgûtûma bûthûgaania Mwathani aûmba kwonokia Njerusaremu?”
36 Antû baakira ki, wa ta bûra Esekia aabeerîîte barûthe. Bataaria nwa mûgambo. 37 Rîru Eriakimu mwana wa Irikia mûrûngamîîri wa nyomba ya mûmene, Sebuna mwandîki, na Njoa mwana wa Asabu mûmenyeeri wa mabuku, baatembûranga nguo ciao na baathi kîrî mûnene na bamwîra bûra mûtongoria wa Asîîria augire.