2 Anene 19

Mûnene Esekia aûria mataaro ma kîroria Isaya

(Isa 37:1-7)

1 Rîra mûnene Esekia eegiirue mantû mamu, aatembûranga nguo ciake, eekîra nguo cia nkunia aathi Nyomba ya Mwathani. 2 Aatûma Eriakimu mûrûngamîîri wa gîkaro kîa mûnene, Sebuna mwandîki, na athînjîri bara banene kîrî kîroria Isaya mwana wa Amoci. Wanabo beekîrîte nguo cia nkunia. 3 Abatûma kîrî Isaya na ntûmwa îkuuga, “Îmunthî i ntugû ya kînyamaara, kûgondokerwa na tûrî na îgi. Tûkari ta mwekûrû arî akubî kûgîa na mwana, îndî atirî na inya ya kûrûtha bu. 4 Mûnene wa Asîîria n'atûmîîte mûtongoria wake ûra mûnene aaya kûrumanga Ngai ûra atûûraga mwoyo. Mwathani Ngai waku aroîgua irumi bibi na agakaanûkia bara baariirie bio. Kwoogu romba Mwathani n'ûntû bwa antû beetû bara barî mwoyo.” 5 Rîra Isaya aagwatire ntûmwa ya mûnene Esekia, 6 aacookia, “Mwathani arîkwîra ûtikaareke Asîîria babûmakia na biugo na kûrumanga Mwathani, bakiugaga atî Mwathani atiûmba kûbwonokia. 7 Thikîîriani! Nkamwîkîra kîrundu kîna ndeeni yake na rîra akeegua mantû mana acooke bwa nthîgûrû yake, i rîo nkaamûûragîra noogo na rûûyiû.”

Asîîria baatûma kîmakania kîîngî

(Isa 37:8-20)

8 Rîra mûtongoria wa njûûrî egiirue atî mûmene wa Asîîria n'arî akuuma Rakisi, aamûthingatire amwîthîra akîrûaga na taûni ya Ribuna. 9 Nguutû ciakinyîîra Asîîria ikiugaga, njûûrî ya Amisiri, îtongoreetue i mûnene Tiriaka wa Ethiopia, i baayîîte kûbaithûkîra. Rîra mûnene egiirue ûûgû, aatûma barûa kîrî mûnene Esekia wa Njunda, 10 akîmwîraga, “Ngai ûra wîtîgîîtie n'we ûkwîrîîte ûtiigwa njaraani ciakwa? Îndî ûtikaareke bûbu bûkweneeria. 11 Namma n'wîgîîtue bûra mûnene wa Asîîria arûthîîte nthîgûrû ira ciingî, aciînyangîîtie cwe. I ka ûkûthûgaania ûkaamonyia? 12 Biûyûûyû biakwa bienyangiirie taûni cia Ngosani, Arani, na Resebu, na baûraga antû ba Endeni bara batûûraga Terasari, na gûtirî ngai wao nwa ûmwe ûkîûmba kûboonokia. 13 Barîkû anene ba taûni cia Amathi, Aripandi, Sefaribaimu, Ena na Iba?”

Îromba rîa Esekia

14 Mûnene Esekia aathûkia baarûa kuuma kîrî atûmwa na amîthooma. Rîru aathi Nyomba ya Mwathani, amîaigîîra mbere ya Mwathani îrî ntambûrûkie. 15 Rîru aaromba, “Îî Mwathani, Ngai wa Isiraeri, gîtî gîaku kîa ûnene kîrî îgûrû rîa biûmbe bira birî na Mathabu. Woû wenka ûrî Ngai, na wathaga ma ûnene monthe ma nthîgûrû. N'waûmbire îgûrû na nthîgûrû. 16 Îîndî Mwathani, raitha wone bûra gûgûkarîka kîrî tiû. Thikîîria mara monthe Senakeribu akuuga agîkûruma, Ngai ûra atûûraga mwoyo. 17 Twinthe itwiyî, Mwathani, anene ba Asîîria i beenyangîîtie nthîgûrû inyingî, baatuîkithia nthîgûrû inu maganjo. 18 Babîîthia ngai ciao ira itaarî ngai cia mma, îndî i mîbuanaano ya mîtî na maiga birûthîîtwe na njara cia antû. 19 Îîndî, Mwathani Ngai wetû, tûtuunyûkie kuuma njaraani ciao, kaingo mîgongo yonthe ya nthîgûrû îmenya i woû wenka, Mwathani, ûrî Ngai.”

Ntûmwa ya Isaya kîrî mûnene

(Isa 37:21-38)

20 Rîru Isaya mwana wa Amoci atûmana ntûmwa kîrî Esekia amwîra, “Ûûgû i bu Mwathani Ngai wa Isiraeri akuuga, ‘I mbîgîîtue îromba rîaku îgûrû rîa Senakeribu mûnene wa Asîîria.’ 21 Ûûgû i bu Mwathani arîîtie kîînyume nwe, ‘Mwarî bikira wa Sayuuni n'agûkûbûthîîria na gûkûnyûrûnta. Mwarî wa Njerusaremu n'akwinainia kîongo wa bûra naawe gugîîtie. 22 Ûrîthûgaania n'ûû we ûrarumangaga na gûcambia? N'ûrambagîrîîte gîtîîyo, Ûra Mûtheru wa Isiraeri. 23 Watûmire atûmwa baaya gwînkumîria atî bûrî na nkaarî cia ndûa, i bwacindire irîma bira biraaya mûno bia Rebanoni. Na bwekumia atî naagu ibwarîîkire mîthithinda îra mîraaya na mîtarakwa îra mînyongooroku na atî n'wakinyire mûthitûûni gatîgatî. 24 Wekumia atî n'wenjire ithima na wanyua rûûyî nthîgûrû i ngeni na atî magûrû ma acikaarî imaakinyangîre miuro ya Miisiri îrî mîbwethu.

25 “‘Ûteegua kana i ndaabangire mama monthe karaaya na îîndî i ndîîkîîtie kûmarûtha? I ndakweere inya ya kûgarûra taûni îra mbirigîre îtuîka maganjo. 26 Antû bara baatwîre noogo bataarî na inya, baarî baamaku na baarigicanu. Baakari ta nyaki kîeniini kana îria riumîîte rûûgûrû rwa nyomba îra îrûngûraga mbere îkûra.

27 “‘Îndî imbiyî mantû maaku monthe, bûra ûrûthaga na kûra ûthiiyaga. Imbiyî bûra ûnthûûraga. 28 I ngwatîîte ntheto cia mûthûûro ûyu na wîkumia bûbu waku, na kwoogu ngeekîra ndwano nyiûrû yaku na gacuuma kanyua gaaku, na ngûcookie nyuma na barabara wa îra waayire n'yo.’ ”

29 Rîru Isaya eera mûnene Esekia, “Rûrû i ru rwano rwa bûra gûgaakara. Mwanka ûyû na ûyu gûngî ûkeethîrwa ûrî na mpîndî cia kîthaka cionka cia kûria, îndî mwanka ûra ûkaathingatîîra ûkaûmba kwanda mpîndî ciaku na ûcikethe, na wande mûnda wa mîcabiibû na ûrîe ncabiibû. 30 Bara batigeere Njunda bakaanaanûka ta mîtî îra yiiraga mîri yaayo kûraaya nthî na îgaciara matunda. 31 Gûkeethîrwa kûrî na antû Njerusaremu na kîrîmaani kîa Sayuuni bara bagaatûûra n'ûntû Mwathani n'erutanîrîtie kûrûtha ûntû bûbû.

32 “Ûûgû i bu Mwathani augîîte mantû ma mûnene wa Asîîria, ‘Atithûngîra taûni îno kana amîgera mûgwî. Gûtirî acikaarî barî na rong'o bakaaya akubî na taûni, na gûtirî ithûmba bia gûtûmîra bakîmithûkîra bigaakwa kûmîthiûrûûkîra. 33 Agacooka na njîra wa îra aayire n'yo, atakûthûngîra taûni îno. I niû Mwathani nkuuga. 34 Nkaarwîrîîra mûciî ûyû na ncurigîîrie, n'ûntû bwa gîtîîyo gîakwa ningwa na n'ûntû bwa wîrane bûra ndeerîîre mûruti ngûgî wakwa Ndaundi.’ ”

35 Ûtugû bûbu Mûraîka wa Mwathani aathi kambîîni ya Asîîria na aûraga acikaarî ngiri îgana rîa mîrongo înaana na bataano. Rûûni rware rûgûtema, bagîûkîîra agu noogo antû babu bonthe bamaami bonthe barî bakuû! 36 Rîru Senakeribu agiita mwoyo na aambûra marema maake acooka Asîîria na aathi gûtûûra taûniini ya Ninebe. 37 Ntugû îmwe, rîra aagongaga arî nyomba ya ngai wake Nisiroki, barî na nthaka ciake, Andiramereki na Sareseri, bamûûraga na ndûyiû ciao, na baûrîra nthîgûrû ya Ararati. Esarandoni ûmwe wa nthaka ciake, aatuîka mûnene bantû aake.