Kwayua na kworua kwa Esekia
(Isa 38:1-8, 21-22; 2Karaaya 32:24-26)
20
1 Ntugûûni inu Esekia aayua becû akua. Kîroria Isaya mwana wa Amoci aathi kîrî we amwîra, “Mwathani arîkwîra ûbanganie mantû ma mûciî waku, n'ûntû ûgaakua, ûtiibua.” 2 Esekia aagarûra ûthiû bwake eerekera rûthingo na aromba Mwathani, akiugaga, 3 “Ririkana, Mwathani, bûra ngûtûmîkîrîte na wîtîgio na wathîkî, na rîonthe i ngereetie kûrûtha bûra wendaga ndûtha.” Anjîîria kûrîra na kûminûka.4 Isaya aatiga mûnene, îndî mbere athiria gûkûrûka kîarago gîa ûkaro bwa mûnene, Mwathani amwîra 5 cooka kîrî Esekia, mwathi wa antû ba Mwathani, na ûmwîre, “Niû, Mwathani, Ngai wa ûyûûgu Ndaundi, nkwîgua maromba na ndoona meethori maaku. Ngakworia, na ntugû ithatû ûkaathi Nyomba ya Mwathani. 6 Ngaatûma ûtûûra mîanka yîîngî îkûmi na îtaano. Ngakwonokia amwe na taûni îno ya Njerusaremu kuumania na mûnene wa Asîîria. Ngaakaria taûni îno, n'ûntû bwa gîtîîyo gîakwa ningwa na n'ûntû bwa wîrane bûra ndaarûthire kîrî mûruti ngûgî wakwa Ndaundi.”
7 Rîru Isaya eera amenyeeri ba mûnene beekîre nkûyû irî nkime yoteeni rîra Esekia aarî na rio, na akaabua. 8 Mûnene Esekia aûria, “I mbi îkeegua îrî kîonanîîria atî Mwathani akamboria na nyuma ya ntugû ithatû nkaûmba kûthi Nyomba ya Mwathani?”
9 Isaya acookia, “Mwathani agakûnenkera rwano rwa kwonania akagaiga wîrane bwake. Îîndî, wenda wona kîrundu kîîthîrwa kîrî makinya îkûmi mbere kana i gîcooka nyuma makinya îkûmi?”
10 Esekia acookia, “N'ûntû bûûthû gûtûma kîrundu kîthi mbere makinya îkûmi! Kîrûthe gîcooke nyuma makinya îkûmi.”
11 Isaya aromba Mwathani, na Mwathani aatûma kîrundu gîcooka nyuma makinya îkûmi ngaatiini ira ciarûthîîtwe i mûnene Aasi.
Atûmwa kuuma Mbabironi
(Isa 39:1-8)
12 Kagiitani gaku mûnene wa Mbabironi, Merondaki-Barandani, mwana wa Barandaani, akwîgua mûnene Esekia n'arî ûmwayie, amûtûmîra baarûa na kîegwa. 13 Esekia athookia atûmwa babu na aboonia ûtonga bwake bwa fetha na thaabu, tûnyamû twa kûnunkia irio bwega na mîtaa, na mathaga ma njûûrî yake. Gûtirî gîntû gîatigwa atabooneetie kîandaani kana bantû angî ûneeni bwake bira ataboonia. 14 Rîru kîroria Isaya aathi kîrî mûnene Esekia amûûria, “I kû antû baba baumîîte na n'ata bakwîrire?” Esekia acookia, “Baumîîte nthî ya kûûraaya mûno, ya Mbabironi.” 15 Kîroria Isaya amûûria, “I mbi boonire ndeeni ya gîkaro kîa mûnene?” Mûnene acookia, “Boonire bionthe. Gûtirî nwa kîmwe kîrî kîandaani ntiraboonia.”
16 Rîru Isaya eera Esekia, “Thikîîria kiugo kîa Mwathani. 17 Kagiita i kaayîîte rîra gîntû kîonthe kîrî gîkarooni gîaku kîa ûnene, na gîntû kîonthe kîra biûyûûyû bienu biagaiga mwanka îmunthî, bigaakamatwa biirwe Mbabironi. Gûtirî gîntû gîgaatigwa. 18 Bamwe ba nciarwa cienu ciongwa bakaathûkua na bakabwe kaingo baruta ngûgî nyomba ya mûnene wa Mbabironi.”
19 Riru Esekia eera Isaya, “Kiugo kîa Mwathani gîku waria i kîega.” N'ûntû aathûgaanagia “Ga gûtakîîgua kûrî na ûkiri na ûkaria ûtûûroni bwake bunthe?”