Manase mûnene wa Njunda
(2Karaaya 33:1-20)
21
1 Manase aarî na ûkûrû bwa mîanka îkûmi na îîrî agîtuîka mûnene, na aathana arî Njerusaremu mîanka mîrongo îtaano na îtaano. Gina eetagwa Ebusiba. 2 Manase aathingatîîrîîte mîtugo îmîthûûku ya antû ba nthîgûrû ira Mwathani engatîîtie mbere antû baake bakinya, eeyîria Mwathani. 3 Aaka kaîrî gûntû gwa kûgongera ngai cia ûrongo kûra îthe Esekia aarî akwînyangia. Aaka ithînjîro bia Mbaari na aarûtha mûbuanaano wa ngai ya mûka Asera, ta bûra mûnene Aabu wa Isiraeri aarûthîîte. Manase n'agongaga kinya nthata cia îgûrû. 4 Aaka ithînjîro Nyomba ya Mwathani, bantû ara Mwathani augîîte i ku akaagongagîrwa. 5 Ndeeni ya biarago biîrî bia Nyomba ya Ngai aaka ithînjîro bia kûgongera nthata cia îgûrû. 6 Aaruta mwana wake arî kîgongwana gîa kûbîîthua. N'arûthaga mantû ma ûringia na kûringa biama na kûthi kwona bara boonagîra antû mantû na kwaria na irundu bia bara bakuû. N'eyîîrie Mwathani na aatûma athûûra. 7 Aathûngîria mûbuanaano wa ngai ya mûka Asera ûra aarûthîîte Nyomba ya Mwathani ndeeni, bantû ara Mwathani aarîîtie mantû ma ku kîrî Ndaundi na mwana wake Soromoni, “Aaga Njerusaremu, ndeeni ya nyomba îno ya Mwathani, i bantû ara nthuurîîte kuuma mbarî cionthe cia mîîrîga îkûmi na îîrî ya Isiraeri eegua arî bantû ara nkaagongagîrwa. 8 Na ûkeegua antû ba Isiraeri bakaathîkîra maathana maakwa monthe na bamenyeere watho bunthe bûra mûruti ngûgî wakwa Musa aabeere, rîru ntiireka barutwa nthîgûrû îra ndaanenkeere biûyûyû biao.” 9 Îndî antû ba Njunda bataathîkîra Mwathani, na Manase abatongoria kûrûtha meeyia manene nkûrûki ya mara maarûthirwe i mîgongo îra Mwathani engatiirie mbere antû baake baaya.10 Mwathani augîîte gûkûrûkîîra aruti ngûgî baake iroria, 11 “Mûnene Manase n'arûthîîte mantû mama mathûûku, mantû mathûûku nkûrûki ya mara Akanaani baarûthîîte, na gûkûrûkîîra mîbuanaano yake îra arûthîîte n'atongoretie antû ba Njunda kûrûtha meeyia. 12 Kwoogu niû, Mwathani Ngai wa Isiraeri, nkaareeta kînyamaara kîrî Njerusaremu na Njunda mwanka muntû ûra ûkeegagua mantû mamu akamaka. 13 Ngakaanûkia Njerusaremu wa ta bûra ndaarûthire Samaria na wa ta bûra ndaarûthire Aabu mûnene wa Isiraeri na antû baake. Ngaciata antû baume Njerusaremu, mmîtherie îthere ta mbakûri î nthambie na yakuîkwa. 14 Ngaatiganîria antû baakwa bara bagaatigara barî mwoyo, na mbanenkanîre kîrî anthû baao, bara bakabatura na batae into bia nthîgûrû yao. 15 Nkarûtha mantû mama kîrî antû baakwa n'ûntû i bambîyîrîîtie, na baarurumûkia mûthûûro wakwa kuuma rîra biûyûûyû biao biaumire Miisiri mwanka îmunthî.”
16 Nkûrûki ya ûgu, Manase aûraga antû baingî mûno batarî na mabîtia mwanka barabara cia Njerusaremu ciaûyûra nthakame. Na aarûthîîte woogu aatongoria antû ba Njunda kûrûtha mantû maathûûku na baarûtha mantû maathûûku mbere ya Mwathani.
17 Mantû mangî monthe mara Manase aarûthire, amwe na meeyia mara aarûthire, maandîkîîtwe mabukuuni ma ngono cia Anene ba Njunda. 18 Manase akwire na aathikwa mûndaani wa gîkaro kîa mûnene, mûnda ûra mbereeni warî wa Usa, na mwana wake Amoni aatuîka mûnene.
Amoni mûnene wa Njunda
(2Karaaya 33:21-25)
19 Amoni aarî na ûkûrû bwa mîanka mîrongo îîrî na îîrî agîtuîka mûnene wa Njunda, na aathana arî Njerusaremu mîanka îîrî. Gina aarî Mesuremethi, mwarî wa Arusi wa kuuma taûni ya Njotiba. 20 Wa ta îthe Manase, n'eeyîîrie Mwathani. 21 Aakoobiirie mîtugo ya îthe, na aagonga ngai cia mîbuanaano îra îthe aagongaga. 22 Aaregana na Mwathani, Ngai wa booyûûe, na aarega kwathîkîra maathana ma Mwathani.
23 Atongoria ba mûnene Amoni bamûbîndîra njûri na bamûûragîra gîkarooni gîake kîa ûnene. 24 Antû ba Njunda nabo baûraga bara baûragire Amoni na baatuîkithia mwana wake Njosia mûnene.