Njosia mûnene wa Njunda
(2Karaaya 34:1-2)
22
1 Njosia aarî na ûkûrû bwa mîanka înaana agîtuîka mûnene wa Njunda, na aathana arî Njerusaremu mîanka mîrongo îthatû na ûmwe. Gina aarî Njendinda, mwarî wa Andaya, wa kuuma taûni ya Mbosikathi. 2 Njosia n'aarûthire bûra kûbatîîrue mbere ya Mwathani, aathingatire njîra cionthe cia ûyûûe Ndaundi, atakwathûkîra bwa ûrîo kana bwa ûmotho.Îbuku rîa watho rîonekana
(2Karaaya 34:8-28)
3 Mwankaani wa îkûmi na înaana ya wathani bwake, mûnene Njosia aatûma Safani mwana wa Asaria mwandîki na n'ûyûûe wa Mesuramu, Nyomba ya Mwathani na watho bûkuuga, 4 “Îthi kîrî Irikia Mûthînjîri ûra mûnene wa Ngai akûnenkere ntûmwa îgûtarîîria mûgana wa mbia ira athînjîri ba Ngai beethîranîîtie kuuma kîrî antû, na ira ciareetirwe Nyomba ya Ngai. 5 Ûmwîre acinenkanîre kîrî antû bara barûngamîrîîte ngûgî ya gûcookeeria Nyomba ya Mwathani. Na antû babu nabo barîe aruti ngûgî bara bagûcookeeria Nyomba ya Mwathani, 6 mabundi ma mbaaû, aaki na mabundi ma maiga. Na bagûre mbaaû na maiga macae magûtûmirwa gûcookeeria Nyomba ya Mwathani. 7 Antû bara barûngamîrîte ngûgî înu n'antû eetîgua mûno, kwoogu gûtirî na gîtûmi gîa kûbeera boonanie bûra batûmîrîte mbia.”
8 Safani aira ntûmwa ya mûnene kîrî Irikia, na Irikia amwîra n'aroonire îbuku rîa watho Nyomba ya Mwathani. Irikia amûneenkera îbuku, na Safani arîthooma. 9 Rîru aacooka kîrî mûnene amwîra, “Aruti ngûgî baaku bakûthûkia mbia ira iraarî Nyomba ya Mwathani na bagûcinenkanîra kîrî antû bara baarûngamîrîîte waki.” 10 Na kinya amwîra, “Ndî na îbuku aaga rîra Irikia anenkeere.” Rîru Safani athoomera mûnene rîo nainya.
11 Rîra mûnene egiirue mara maarî îbukuuni rîru, aatembûranga nguo ciake. 12 Aaruta watho bûbû kîrî Irikia mûthînjîri wa Ngai, kîrî Aikamu mwana wa Safani, kîrî Akibori mwana wa Mikaya, kîrî Safani mwandîki, na Asaya, mûruti ngûgî wa mûnene, abeera, 13 “Îthiini bûmbûûrîrie Mwathani bantû akwa na antû ba Njunda mantû meegiî îbuku rîrî. Mwathani n'athûûri i tiû n'ûntû biûyûyû bietû bataathîkîra biugo bia îbuku rîrî na bataarûtha bûra îbuku rîrî rîkuuga nwa mwanka kûrûthwe.”
14 Kwoogu Irikia, Aikamu, Akibori, Safani, na Asaya baathi kwona mwekûrû eetagwa Urunda, kîroria gîatûûraga rûteere rûra rûûngî rwa Njerusaremu. Mûrûme wake Sarumu, mwana wa Tikiba nthaka ya mwana wa Arasi, n'we warûgamîrîte ndwambambio cia Nyomba ya Mwathani. Bamûtarîîria bûra gwakarîkîîre, 15 na abeera bacooke kîrî mûnene na bamwîre 16 ntûmwa kuuma kîrî Mwathani, îkuuga, “Ngakaanûkia Njerusaremu amwe na antû baayo, wa ta bûra kwandîkîîtwe îbukuuni rîra mûnene athooma. 17 I bantiganîrîtie na barutîra ngai ciingî igongwana, na kwoogu baarurumûkia mûthûûro wakwa na mara monthe barûthîîte. Mûthûûro wakwa n'ûkîrîîte Njerusaremu, na ûtiigwîrîîra.
18 “Na mantûûni ma mûnene wengwa, ûûgû i bu niû Mwathani Ngai wa Isiraeri nkuuga, n'ûntû bwa biugo bira wîgîîtue, 19 werira na wenyiithia mbere yakwa. Watembûranga nguo na warîra ûkîminûkaga, rîra wegiirue bûra ndaamakiirie Njerusaremu nkîendaga kûmînenkera îkaanûkia amwe na antû baayo. I ndarabaangîîte kûmîtuîkithia bantû aarume na îganjo. Îndî îîndî nkwîgua îromba rîaku. 20 Kwoogu îkaanûkia rîra ndarabangîîte kûreetera Njerusaremu rîtiiya mwanka nyuma ya gûkua gwaku. Ngagwîtîgîîria ûkue na ûkiri.” Kwoogu bacookia îcookio rîake kîrî mûnene Njosia.