Njosia aathiria kûgonga kwa ngai cia ûrongo
(2Karaaya 34:3-7, 29-33)
23
1 Kwoogu mûnene Njosia eeta akûrû bonthe ba Njunda na Njerusaremu, 2 eetia Nyomba ya Mwathani barî na antû ba Njunda na ba Njerusaremu, amwe na athînjîri ba Ngai na iroria na antû bonthe kuuma ûra mûniini mwanka ûra mûnene. Aathooma bakîîgagua mîgambo yonthe îra yarî îbukuuni rîa kîrîîkanîro, rîra rîethîrîîtwe Nyomba ya Mwathani. 3 Aarûngama akubî na gîtugî na aarûtha kîrîîkanîro na Mwathani gîa kûmwathîkîra, kwaiga mawatho maake na maathana na nkoro yake na mwoyo, na kwîmenyeeria kûrûtha mantû mara magwatithanîîtue na kîrîîkanîro, ta bûra mandîkîîtwe îbukuuni rîru. Na antû bonthe barîkanîra kwaiga kîrîîkanîro.4 Rîru eera Irikia mûthînjîri wa Ngai, aniini ba mûthînjîri, na akaria bara baarî wîraani mwîrîgaani wa kûthûngîra Nyomba ya Ngai, barute into bionthe kuuma Nyomba ya Ngai bira bitûmagîrwa kûgonga Mbaari, bia ngai ya mûka Asera na nthata cionthe cia îgûrû. Mûnene abîîthîria into bibi bionthe ome ya taûni ya Njerusaremu akubî na kîbonde kîa Kindironi, na muu wabio wairwa Betheri. 5 Aaruta ûbicini athînjîri bara banene ba Njunda baathûrîîtwe ba kûruta igongwana ithînjîrooni bia ngai cia ûrongo ndeeni ya taûni ya Njunda na gûntû kûmwe akubî na Njerusaremu. Aaruta athînjîri bonthe bara baarutire igongwana kîrî Mbaari, kîrî riûa, mweri, na nthata ira nene na nthata i niini. 6 Aaruta mûbuanaano wa ngai ya mûka Asera kuuma Nyomba ya Mwathani, bamîruta ome ya taûni ya Njerusaremu baira kîbondeeni kîa Kindironi, na baubîîthîria noogo. Baathia muu wayo waatuîka rûgûûnkû, na baumiinca ara kwarî na nthiko cia kûthika antû bonthe. 7 Eenyangia ûtûûro kûra wakaragwa i marwaya ma arûme Nyomba ya Mwathani. Agu noogo eekûrû batumagîra nguo ira ndaaya ciatûmagîrwa kûgonga ngai ya mûka Asera. 8 Areeta Njerusaremu athînjîri bonthe bara baarî taûni cia Njunda na kunthe nthîgûrû înu, aathûûkia ithînjîro ara baarî bakûrutîra igongwana kuuma Ngeba mwanka Beeriseba. Kinya aunanga ithînjîro bira biarî mwîrîgaani ûra wakîîtwe i Njosua ngabana wa taûni, ûra warî njara ya kîmotho ya mwîrîga ûra mûnene muntû akîthûngîra taûni. 9 Athînjîri babu bateetîgîîrua kûruta ngûgî Nyomba ya Mwathani, îndî bakîrîa mûgaate ûtarî mwimbithie ûra warî wa athînjîri babu bangî.
10 Kaîrî mûnene Njosia eenyangia kîthînjîro gîa Tofethi, bantû a kûgongera ngai cia mîbuanaano kîbondeeni kîa mwana wa Inomu, kaingo gûtethîrwa na muntû ûkûruta nthaka kana mwarî wake arî kîgongwana gîa kûbîîthua kîrî ngai Moreki. 11 Na aaruta mbaraathi ira anene ba Njunda baathûrîîte n'ûntû bwa kûgonga riûa, ira ciaigagwa kîaragooni nyomba ya Mwathani, akubî na nyomba ya Nathani-Mereki. Aabîîthia na mwanki nkaarî cia ndûa ira ciathûrîrîtwe riûa. 12 Mûnene Njosia aunanga ithînjîro bîra anene ba Njunda baakîîte rûûgûrû akubî na kanyomba ka îgûrû ka Aasi, amwe na ithînjîro bira biakîîtwe i mûnene Manase biaragooni biîrî bia Nyomba ya Mwathani. Aaragania ithînjîro tûcuncî tûcuncî na abigera kîbondeeni kîa Kindironi. 13 Njosia eenyangia gûntû kûra gûkîîru gwa kûgongera kûra mûnene Soromoni aarî agwaka uumîîrooni bwa riûa bwa Njerusaremu, bwa iti ya kîrîma kîa mîceituuni n'ûntû bwa ûgongi bûrî na mûgiro. Aakîrîîte Asitorethi ngai ya mûka wa Sindoni, Kemosi ngai wa Moabu, na Mirikomu ngai wa Aamoni. 14 Mûnene Njosia aunanga itugî bia mîbuanaano bia maiga tûcuncî tûcuncî, agiitanga mîbuanaano ya ngai ya mûka Asera, na nthîgûrû ara biarûngi aakunîkîra na maîndî ma antû.
15 Njosia acooka eenyangia gûntû gwa kûgongera naagu Betheri kûra gwaakîîtwe i mûnene Njeroboamu mwana wa Nebati, ûra aatongoriirie Isiraeri kûrûtha meeyia. Njosia oomborania kîthînjîro, aunanga maiga ma kîo tûcuncî tûcuncî, na amathia matuîka tîîri na aacooka abîîthia mûbuanano wa Asera. 16 Rîru Njosia ariûngariûngia meetho oona nthiko agu rûteere rwa karîma. Aathana maîndî maukûrwe kuuma nthikooni na mabîîthîrue kîthînjîrooni. Na njîra îno n'aûmbire kûthûûkia kîthînjîro na njîra ya gûgîîkîra mûgiro, na aûyûria bûra kîroria kîagweteete tene mbereeni. Mûnene Njosia aathiûrûûkia meetho oona nthiko ya kîroria kîra kîagweteete mantû mama. 17 Aûria, “Iiga rîîra ria nthiko nkwona i rîambi?” Antû ba Betheri baacookia, “I nthiko ya kîroria kîra kîaumîîte Njunda na kîagweta mantû mama warûtha kîrî kîthînjîro gîkî.” 18 Njosia abeera, mîtigeeni îkari woogu îkari. “Maîndî maake matikaarutwe agu marî.” Kwoogu maîndî maake mataaringithua, na kinya ma kîroria kîra kîaumîîte Samaria.
19 Ndeeni ya taûni cionthe mûnene Njosia eenyangia gûntû gwa kûgongera Ngai cia ûrongo kûra gwakîîtwe n'anene ba Isiraeri, bara nthûti îmwe baûkiirie mûthûûro wa Ngai. Aarûthîîre ithînjîro bibu wa ta bûra aarûthîîte Betheri. 20 Aûragîra athînjîri bonthe ba antû bara bagongaga ngai cia ûrongo bantû ara aûkîîru a kûgongera, na abîîthia maîndî ma antû îgûrû rîa wa kîra kîthînjîro. Rîru aacooka Njerusaremu.
Njosia aakûngwîra Pasaka
(2Karaaya 35:1-19)
21 Mûnene Njosia aatha antû bakûngwîre Pasaka n'ûntû bwa gûtîîya Mwathani Ngai wao, ta bûra kwandîkîîtwe îbukuuni rîa kîrîîkanîro. 22 Gûtirî Pasaka ta îno yaaro îkûngwîrwa i mûnene nwa ûmwe wa Isiraeri kana Njunda, kuuma îgiita rîra agiiti magamba baathaga nthîgûrû. 23 Îndi mûthiani, mwankaani wa îkûmi na înaana wa wathani bwa Njosia, Pasaka yakûngwîrwe Njerusaremu.
Mîgaruko îîngî îra yarûthirwe i Njosia
24 N'ûntû bwa kûûyûria mawatho mara maandîke îbukuuni rîra Irikia, Mûthînjîri ûra mûnene oonire nyombaani ya Mwathani, mûnene Njosia aaruta kuuma Nyomba ya Mwathani bonthe bara baaragia na akuû, bara boonagîra antû mantû, ngai cionthe cia mîciî, ngai cia mîbuanaano, na into bingî bia kûgonga ngai cia ûrongo. 25 Gûteethîrwa na mûnene ta we mbereeni, ûra warutîîre Mwathani ngûgî na nkoro yake yonthe, mathûgaania, na inya akîathîkagîra mawatho monthe ma Musa. Kana kwîthîrwa kûrî na mûnene ta we kaîrî Nyumaani.
26 Amwe na ûgu mûthûûro ûmûthûûku wa Mwathani nwaûkîîrue îgûrû rîa Njunda n'ûntû bwa mantû mara mûnene Manase aarûthîîte. 27 Mwathani auga, “Nkaarûtha kîrî Njunda wa ta bûra ndarûtha kîrî Isiraeri. Nkarutaruta antû ba Njunda kuuma ûthiûni bwakwa, na nkaarega Njerusaremu, taûni îra ndaathuurire, na Nyomba ya Mwathani, bantû ara ndaugîîte noogo mbagîrîte kûgongagîrwa.”
Mûthia wa wathani bwa Njosia
(2Karaaya 35:20-36:1)
28 Mantû mangî mara Njosia aarûthire mandîkîîtwe mabukuuni ma ngono cia anene ba Njunda. 29 Îgiitaani rîru Njosia aarî mûnene, Neko mûnene wa Miisiri eetia bwa muuro wa Yufîrîti gûteethia mûnene wa Asîîria. Mûnene Njosia aumagarûka kûrûa n'we îndî mûnene Neko amuumîîra na amûûragîra naara Megindo. 30 Atongoria baake beekîra mwîrî wake nkaarîîni ya ndûa na baukamata kuuma Megindo baucookia Njerusaremu, ara aathikirwe nthikooni cia ûnene. Antû ba Njunda bathuura mwana wake Njeoaasi na bamwîtûûrîria maguta atuîka mûnene.
Njeoaasi mûnene wa Njunda
(2Karaaya 36:2-4)
31 Njeoaasi aarî na mîanka mîrongo îîrî na îthatû rîra atuîkire mûnene wa Njunda, na aathana arî Njerusaremu mîeri îthatû. Gina aarî Amutari, mwarî wa Njeremia wa kuuma taûni ya Ribuna. 32 N'eyîîrie mbere ya Mwathani wa ta bûra booyûûe baarûthire. 33 Wathani bwake bwakinyire mûthia rîra Neko mûnene wa Miisiri aamûgwatire na amûthaîka nceera naara Ribura, nthîgûrû ya Amathi. Mûnene Neko aatûma Njunda îrîa kiro ngiri ithatû na magana mana cia fetha na kiro mîrongo îthatû na inya cia thaabu irî ûgooti. 34 Mûnene Neko atuîkithia Eriakimu mwana wa Njosia mûnene wa Njunda bantû a îthe Njosia, na aagarûra riîtwa rîa Eriakimu rîatuîka Njeoyakimu. Îndî Neko aira Njeoaasi Miisiri, na gûku i ku akwirîîre.
Njeoyakimu mûnene wa Njunda
(2Karaaya 36:5-8)
35 Mûnene Njeoyakimu ekiire antû ûgooti kûringana na ûtonga bwao, kaingo aûmba kwîthîrania mbia ira ciendekanaga cia kûrîa ûgooti bûra bwetagua i mûnene wa Miisiri.