24
1 Kagiitani ka wathani bwa Njeoyakimu, mûnene Nebukandinesa wa Mbabironi aithûkîra na aatûra Njunda, na bantû a mîanka îthatû Njeoyakimu aatiindîkîîrua kîa inya kûmwathîkîra. Îndî nyumaani amûûmîria kîongo. 2 Mwathani aatûma njûûrî irî na mathaga ya kuuma Mbabironi, Aramu, Moabu, na Amoni. Mwathani abatûma benyangia Njunda, wa ta bûra Mwathani augîîte gûkûrûkîîra aruti ngûgî baake, iroria. 3 Bûbû bwatuîkîkire kûringana na watho bwa Mwathani, atî akarutaruta antû ba Njunda kuuma meethooni maake n'ûntû bwa meeyia mara mûnene Manase aarî akûrûtha, 4 na mûno n'ûntû bwa nthakame ya antû batarî na mabîtia îra etûûrire Njerusaremu. Mwathani atikîûmba kûmûrekera meeyia mamu.5 Mantû mangî mara Njeoyakimu aarûthire maandîkîîtwe mabukuuni ma ngono cia anene ba Njunda. 6 Njeoyakimu aakua, na mwana wake Njeoyakini aatuîka mûnene bantû aake.
7 Mûnene wa Miisiri na njûûrî yake bataumagarûka ome ya Miisiri kaîrî, n'ûntû mûnene wa Mbabironi n'we aathaga mîanka yonthe îra yarî ya Miisiri, kuuma muurooni wa Yufîrîti kûthi mwankaani wa bwa îgûrû wa Miisiri.
Njeoyakini mûnene wa Njunda
(2Karaaya 36:9-10)
8 Njeoyakini aarî na mîanka îkûmi na înaana agîtuîka mûnene wa Njunda, na aathana arî Njerusaremu bantû a mîeri îthatû. Gina aarî Neusita, mwarî wa Erinathani wa kuuma Njerusaremu. 9 Njeoyakini n'eyîîrie Mwathani wa ta bûra îthe Njeoyakini aarûthire.
10 N'îgitaani rîa wathani bwake rîra njûûrî ya Mbabironi, îkîathagwa n'atongoria ba mûnene Nebukandinesa, baithûkîre na baakîîmba Njerusaremu. 11 Îgiitaani rîru rîa gûkîmbwa Nebukandinesa wengwa aaya Njerusaremu.
12 Njeoyakini mûnene wa Njunda, barî na gina, nthaka ciake, atongoria baake, na atongoria ba gîkaro kîa mûnene, baûkîîria njara kîrî Ambabironi. Mwankaani wa înaana wa wathani bwa mûnene Nebukandinesa agwata Njeoyakini ta mûbungwa, 13 na aakamata igîîna bionthe bia Nyomba ya Mwathani na bia gîkaro kîa mûnene abiira Mbabironi. Wa ta bûra Mwathani aarî akuuga mbere, Nebukandinesa aûraganga into bionthe bia thaabu bira mûnene Soromoni aarûthîîte bia gûtûmîrwa Nyomba ya Ngai. 14 Nebukandinesa agwata antû ba Njerusaremu batuîka atae, amwe na atongoria bonthe, ncamba cionthe cia ndûa, mabundi na aturi, bonthe barî amwe baarî antû ngiri îkûmi. Na aatiga antû wa bara baarî nkîa gûku Njunda.
15 Nebukandinesa aira Njeoyakini Mbabironi arî mîgwate, amwe na gina wa Njeoyakini, eekûrû baake, atongoria baake, na atongoria bara bangî bonthe abaruta Njerusaremu abaira Mbabironi. 16 Nebukandinesa aira antû bonthe Mbabironi bara baarî gîtûmi na ncamba cia ndûa, bonthe baarî ngiri mûgwanja. Kinya aathûkia antû ngiri îmwe baarî ûtea, amwe na aturi, bonthe baarî na mîîrî îrî na inya yûmba kûruta ngûgî ya acikaarî ba ndûa.
17 Nebukandinesa aatuîkithia Matania ûra aarî îthe mwanake wa Njeoyakini mûnene wa Njunda na aagarûra riîtwa rîake rîatuîka Sendekia.
Sendekia mûnene wa Njunda
(2Karaaya 36:11-12; Njere 52:1-3a)
18 Sendekia aarî na mîanka mîrongo îîrî rîra atuîkire mûnene wa Njunda, na aathana arî Njerusaremu mîanka îkûmi na ûmwe. Gina aarî Amutari, mwarî wa Njeremia wa kuuma taûni ya Ribuna. 19 Mûnene Sendekia eeyîria Mwathani wa ta bûra mûnene Njeoyakimu aarûthîîte. 20 Mwathani athûûra mûno n'antû ba Njerusaremu na Njunda mwanka abarutaruta meethooni maake na abaira ûkombooni.
Sendekia aûmîria mûnene wa Mbabironi kîongo.