Kûgwa kwa Njerusaremu
(2Karaaya 36:13-21; Njere 52:3b-11)
25
1 Kwoogu mwankaani wa kenda wa wathani bwa Sendekia, ntugû ya îkûmi ya mweri wa îkûmi, Nebukandinesa mûnene wa Mbabironi auma na njûûrî yake aithûkîra Njerusaremu, na aamba marema maake ome ya taûni na aaka nthingo cia kûmîkîîmba kûmîthiûrûkîîra, 2 na baakara bamîkîmbîîte mwanka mwanka wa îkûmi na ûmwe wa wathani bwa Sendekia. 3 Ntugû ya kenda ya mweri wa înnaa mwankaani ûyu, rîra yûûra rîarî rîthûûku mûno na antû bataarî na gîntû gîatigeere gîa kûrîa, 4 njûûrî ya Mbabironi yaunanga nthingo cia taûni. Kinya ûkeegua Ambabironi i bathiûrûkîrîîtie taûni, acikaarî baûrire bonthe ûtugû. Baûrire na kayîra ka mûnda wa ûnene, baakûrûkîîra mwîrîga ûra warî gatîgatî ka nthingo irî ciîrî, baûra beerekereete bwa kîbonde kîa Njorondani. 5 Îndî njûûrî ya Mbabironi yengana na mûnene Sendekia, bamûgwatîra rûtunguruuni akubî na Njeriko, na acikaarî baake bonthe banyagaara bamûrûûkîra. 6 Sendekia airwa kîrî mûnene Nebukandinesa naagu Ribura, na amûgiitîra îgamba noogo. 7 Baûraga nthaka cia Sendekia, Sendekia akîonaga. Baacooka baatûra Sendekia meetho, rîru bamûthaîka na nyororo cia rûthuku, na bamwira Mbabironi.Kwînyangua kwa Nyomba ya Mwathani
(Njere 52:12-23)
8 Ntugû ya mûgwanja mweri wa îtaano mwankaani wa îkûmi na kenda wa wathani bwa Nebukandinesa wa Mbabironi, Nebusarandani, mûtaari wa mûnene na mûtongoria wa njûûrî, aathûngîra Njerusaremu. 9 Abîîthia Nyomba ya Mwathani, gîkaro kîa mûnene, na nyomba cionthe cia Njerusaremu, aabîîthia nyomba yonthe îra yonekanaga îrî gîtûmi taûni înu. 10 Nabo acikaarî baake bomborania nthingo cia Njerusaremu.
11 Rîru Nebusarandani aathûkia antû bara baatigeere taûni barî atae, bara beenenkanîrîîte bongwa kîrî mûnene, na babu bangî bonthe abaira Mbabironi. 12 Îndî aatiga naagu Njunda bamwe ba bara baarî nkîa mûno, abaiga bamenyeera mîcabiibû na barîma mîndaani.
13 Ambabironi baunanga itugî bia rûthuku bira biarî mwîrîgaani wa Nyomba ya Ngai, nkaarî cia gûkururua ira ciarûthîîtwe na rûthuku, kîraî kînene gîa kîthiûrûûrî kîa rûthuku gîetagwa îria, bionthe bira biarî agu Nyomba ya Mwathani. Rîru baira rûthuku runthe Mbabironi. 14 Na baathûkia kinya iciko bia mûthanga na nyûngû cia kûruta muu kuuma kîthînjîrooni, na magati ma kûrûnga ntaambi cia taa, mbakûri ira cia kûbîîthîria macoco, na into bia rûthuku bira biatûmagîrwa ngûgîîni ya Nyomba ya Mwathani. 15 Kinya baathûkia tûbakûri na tûraî tûra twakamataga makara marî na mwanki, bionthe bira biarûthîîtwe na thaabu kana fetha.
16 Mûgana wa rûthuku kuuma itugîîni biîrî na îtangiini rînene na nkaarî cia gûkururua bira mûnene Soromoni aarûthîîte irî cia Nyomba ya Mwathani warî ûmûrito mûno ûtikîthimîka. 17 Itugî bibi biîrî i biaganeene, wa kîmwe kîarî na ûraaya bwa biiti mîrongo îîrî na mûgwanja gwîtia, na nkoobia ya rûthuku ya biiti mûgwanja na nucu yekîrwa îgûrû mûthiani. Kûthiûrûkîîria wa kîra nkoobia i kwarî na nyororo îgemeetue na kûngûmanga cia rûthuku.
Antû ba Njunda bairwa Mbabironi
(Njere 52:24-27)
18 Nkûrûki ya ûgu, Nebusarandani, mûtongoria wa njûûrî, aagwata Seraya Mûthînjîri ûra mûnene, Sefania ûra aarî mûthînjîri mûniini kî ûnene, na atongoria bangî bathatû ba gîtûmi Nyomba ya Mwathani. 19 Kuuma taûni aagwata mûtongoria ûra aathaga acikaarî, ataari bataano ba mûnene, mûniini wa mûtongoria wa njûûrî, ûra aarûgamîrîîte mantû mara maandîke ma njûûrî, na antû bangî mîrongo îthanthatû bara baarî wa gûku taûni. 20 Nebusarandani abaira kîrî mûnene wa Mbabironi, ûra warî taûni ya Ribura, 21 naagu Amathi. Abaûragîra bonthe naagu Ribura nthîgûrû ya Amathi. Kwoogu antû ba Njunda baataîgwa baarutwa nthîgûrû yao.
Ngendaria ngabana wa Njunda
(Njere 40:7-9; 41:1-3)
22 Mûnene Nebukandinesa wa Mbabironi atuîkithia Ngendaria, mwana wa Aikamu mwana wa nthaka ya Safani, mûnene wa Njunda, na amûtuîkithia mûrûngamîîri wa bara bonthe baatigirwe Njunda. 23 Rîra atongoria ba acikaarî na acikaarî baao beegiirue atî mûnene wa Mbabironi n'athuurîîte Ngendaria atuîka ngabana, baaya kîrî Gendaria naagu Misipa. Atongoria baba baarî Isumairi mwana wa Nethania, Njoanani mwana wa Karea, Seraya mwana wa Taniumethi, kuuma taûni ya Netofa, na Njaasania wa kuuma Maakathi. 24 Ngendaria abaa mûthiîtio abeera, “Bûtikamakeeni n'atongoria ba Mbabironi. Tûûraani nthîgûrû îno, rutîraani mûnene wa Mbabironi ngûgî, na mantû monthe magakara bwega kwenu.”
25 Îndî mweriini wa mûgwanja mwanka ûyu, Isumairi, mwana wa Nethania mwana wa nthaka ya Erisama, ûmwe wa mûciî wa wathani, aathi Misipa na antû îkûmi, baithûkîra Ngendaria na bamûûraga. Na aacooka aûraga Ayaundi na Ambabironi bara baarî oogo n'we. 26 Rîru Aisiraeri bonthe, itonga na nkîa, amwe na atongoria ba njûûrî, bauma agu baathi Miisiri, n'ûntû i bakuthûkaga Ambabironi.
Njeoyakini arekeerua kuuma nceera
(Njere 52:31-34)
27 Mwankaani wa mîrongo îthatû na mûgwanja mûnene Njeoyakini wa Njunda arî mûthaîke, mûnene Ebiri-Merondaki amwîgua kîao amûthaûra kuuma nceera ntugû ya mîrongo îîrî na mûgwanja ya mweri wa îkûmi na îîrîb mwanka wa mîrongo îthatû na mûgwanja kuuma Njeoyakini akûgwatwa airwa nceera. 28 Ebiri-Merondaki amûthûkia na kîao, na amûneenkera gîtî kîrî na gîtîîyo nkûrûki ya bira eere anene bara bangî aarî nabo ûkombooni Mbabironi. 29 Kwoogu Njeoyakini eetigîîrua kûruta nguo ciake cia nceera na kûrîîyagîra meethaani ya mûnene ûtûûro bwake bunthe. 30 Ûtûûrooni bwake bunthe mûnene namweyaga kîra eendaga wa kîra ntugû.