<<    <     2 Anene     17     >    >> 
Mûnene Osea wa Isiraeri
17
1 Mwankaani wa îkûmi na îîrî wa wathani bwa mûnene Aasi wa Njunda, Osea mwana wa Era aatuîka mûnene wa Isiraeri, na aathana arî Samaria mîanka kenda. 2 Eeyîria Mwathani, îndî ti mûno ta anene bara baathanîîte Isiraeri mbere yake. 3 Mûnene Sarimanesa wa Asîîria amwithûkîra. Osea eenenkanîra kîrî Sarimanesa na aatua kûmûrutîra ûgooti kîra mwanka. 4 Îndî mwanka ûmwe, Osea aatûma atûmwa kîrî So mûnene wa Miisiri akîmûrombaga ûteethio, na aatiga kûrîa ûgooti bwa kîra mwanka kîrî mûnene wa Asîîria. Rîra Sarimanesa aamenyire ûgu, agwata Osea na amwingîra nceera.
Kûgwa kwa taûni ya Samaria
5 Rîru Sarimanesa mûnene wa Asîîria aithûkîra Isiraeri na akîîmba Samaria. Mwankaani wa îthatû wa gûkîîmbwa, 6 ûra warî mwanka wa kenda wa wathani bwa Osea, mûnene wa Asîîria agwata taûni ya Samaria, aira Aisiraeri Asîîria barî mîgwate. Aagaiga bamwe taûniini ya Araa, bangî akubî na muuro wa Abori gîteere kîa Ngosani, na bangî taûniini cia Mendia.
7 Samaria yagwîre n'ûntû Aisiraeri i beeyîîrie Mwathani Ngai wao, ûra aabatunyûkîîtie kuuma kîrî mûnene wa Miisiri na n'abarutîîte wathooni bwa Faraû wa Miisiri. I baarombire ngai ciingî, 8 bathingata mîtugo ya antû bara Mwathani engatîîtie mbere antû baake bagîkinya, na bagwata mîtugo îra yareteetwe n'anene ba Isiraeri. 9 Na njîra ya witho, Aisiraeri barûtha mantû mara mataarî meega kîrî Mwathani Ngai wao. Baaka gûntû gwa kûgongera ngai cia ûrongo taûniini ciao, kuuma ntûûra îra niini mwanka taûni îra nene mbirigîre na nthingo. 10 Tûrîmaani tunthe na rungu rwa mîtî îmînene, bagaiga itugî na mîbuanaano ya ngai ya mûka Asera, 11 na baabîîthîria macoco îgûrû rîa ithînjîro bionthe bia ngai inu cia ûrongo, bathingatîîte mîtugo ya antû bara Mwathani arutarutîîte bauma nthî înu. I baûkiirie mûthûûro wa Mwathani n'ûntû bwa mîkarîre yao îmîthûûku, 12 na baarega kwathîkîra watho bwa Mwathani bwa kûrega kûgonga ngai cia mîbuanaano.
13 Mwathani n'atûmîîte atûmwa baake na iroria gûkaania Isiraeri na Njunda, abeera, “Rûkîraani njîra cienu inthûûku na bwathîkîre maathana maakwa, mara marî wathooni bûra ndaanenkeere biûyûyû bienu na bûra ndeeyanire kîrî biû gûkûrûkîîra aruti ngûgî baakwa, iroria.” 14 Îndî bataathîka. I baûmiirie biongo ta biûyûyû biao, bara bateetîgîîtie Mwathani Ngai wao. 15 I baaregire gwîtîgia mawatho maake, bataagaiga kîrîîkanîro kîra aigîîte na biûyûyû biao, na baaregana na gûkaanania gwake. Baagonga mîbuanaano ya ngai cia mana wana bo bongwa baatuîka ba mana. Na baathingata mîtugo ya antû bara babathiûrûkîrîte, na kwoogu barega kwathîkîra Mwathani bûra aabeerîîte batikaabatuatie.
16 Baunanga mawatho monthe ma Mwathani Ngai wao na barûtha tûyaû twîrî twa cuuma twa kûgonga, baacooka baarûtha mûbuanano wa ngai ya mûka Asera, baagonga nthata, na baatûmîkîra ngai ya Mbaari. 17 I baarutire nthaka na aarî baao ta igongwana bia kûbîîthua kîrî ngai cia ûrongo. Baathi kwona ariingia na bara beeranaga mbaati ya muntû, na beenenkanîra cwe kûrûtha mara mathûûku mbere ya meetho ma Mwathani, na n'ûntû bwa ûgu, i baûkiirie mûthûûro wake. 18 Mwathani athûûra n'ûntû bwa Isiraeri na abarutaruta meethooni maake. I mwîrîga wa Njunda unka watigirwe.
19 Wana kinya antû ba Njunda bataathîkîra mawatho ma Mwathani Ngai wao, n'ûntû i baathingatire mîtugo îra yareetirwe n'antû ba Isiraeri. 20 Mwathani aarega Aisiraeri bonthe, abaa îkaanûkia amwe na kûbanenkanîra njaraani cia anthû bathûûku na kwoogu abarutaruta kuuma meethooni maake.
21 Nyuma ya Mwathani akûgiita Isiraeri kuuma wathaniini bwa nciarwa cia Ndaundi, Aisiraeri baathuura Njeroboamu mwana wa Nebati atuîka mûnene. Njeroboamu aatûma batiganîria Mwathani na abatongoria meeyiani mathûûku. 22 Aisiraeri bathingata Njeroboamu na bathi na mbere kûrûtha meeyia monthe mara aarûthîîte, 23 mwanka Mwathani abarutaruta mbere ya meetho maake, ta bûra aarî akûbakaania gûkûrûkîîra aruti ngûgî baake iroria. Kwoogu antû ba Isiraeri bataigwa bairwa nthî ya Asîîria, ara batwîre kinya îmunthî.
Asîîria batûûra Isiraeri
24 Mûnene wa Asîîria aaruta antû kuuma taûni cia Mbabironi, Kutha, Aba, Amathi, na Sefaribaimu, na abaira taûniini cia Samaria, bantû a Aisiraeri babu batairwe. Baathûkia beegwatîra taûni ino na baatûûra ku. 25 Rîra baatûûrire ku rîrî rîa mbere, batagonga Mwathani, na kwoogu Mwathani aatûma Cimba ira ciaûragire bamwe baao. 26 Mûnene wa Asîîria eerwa antû bara airire taûniini cia Samaria batamenyaga bûra ngai wa nthî înu eendaga barûtha, kwoogu ngai înu n'yatûmire cimba ira ciabaûragaga. 27 Kwoogu mûnene wa Asîîria aathana auga, “Cookiani ûmwe wa athînjîri bara twareetire barî agwate, agatûûre noogo kaingo arutana antû bûra ngai ya nthî înu yeendaga barûtha.” 28 Kwoogu Mûthînjîri ûmwe Mûisiraeri bara baareeteetwe kuuma Samaria aathi gûtûûra Betheri ara aarutanire antû bûra baûmba kûgonga Mwathani.
29 Îndî antû bara baatûûrire Samaria baathi na mbere kûrûtha ngai ciao cia mîbuanaano, na baciaiga gûntû gwa kûgongera kûra Asamaria baakîîte. Wa kîra gîkundi mwanya gîkarûtha ngai cia mîbuanaano taûniini ira baatûûraga. 30 Antû ba Mbabironi baarûtha mîbuanaano ya ngai yeetagwa Sukothi-Mbenothi. Antû ba Kutha baarûtha mîbuanaano ya ngai yeetagwa Nerigari, antû ba Amathi baarûtha mîbuanaano ya ngai yeetagwa Asima. 31 Antû ba Aba baarûtha mîbuanaano ya ngai yeetagwa Nibuasi na Taritaki. Antû ba Sefaribaimu baaruta aana baao barî igongwana bia kûbîîthua kîrî ngai cietagwa Andiramereki na Anamereki. 32 Antû baba i bagongaga Mwathani, îndî kaîrî i baathuurire antû ba mîthemba yonthe kuuma kîrî bo baruta ngûgî ta athînjîri ba gûntû kûra kûgongagîrwa ngai cia ûrongo na bacirutîra igongwana noogo. 33 Kwoogu bagonga Mwathani, îndî kaîrî i baagongire ngai ciao kûringana na wîthîre bwa nthî ira baumîîte. 34 Nwa bamenyagîîra wîthîre bûbu wana îmunthî tûrî. Batigongaga Mwathani kana baathîkîra mawatho na maathana mara aanenkeere nciarwa cia Njakubu, ûra eetire Isiraeri. 35 Mwathani n'arûthîîte kîrîîkanîro nabo na abaatha, “Bûtikagonge ngai ciingî, bûtigaciîndamîîre kana bûcirutîra ngûgî kana bûcirutîra igongwana. 36 Bûmbathîkagîre, Mwathani, ûra aabûrutire Miisiri na kûûmbana kûnene na inya. I niû bûkendamagîîra na kûndutîra igongwana. 37 Nwa mwanka rîonthe bwathîkîre mawatho na maathana mara ndaabwandîkîîre. Bûtikaagonge ngai ciingî, 38 na bûtikaariganîrue i kîrîîkanîro kîra ndaarûthire naabi. Bûtikaagonge ngai ciingî 39 îndî bûmbathîkîre, Mwathani Ngai wenu, na nkabûtunyûkia kuuma kîrî anthû beenu.” 40 Îndî antû babu batathikîîria, baathi na mbere kûthingata wîthîre bwao bwa tene.
41 Kwoogu antû babu bagonga Mwathani na kaîrî bagonga ngai ciao cia mîbuanaano, na mwanka îmunthî nciarwa ciao bathiyaga mbere kûrûtha woogu.