Aasi mûnene wa Njunda
(2Karaaya 28:1-27)
16
1 Mwankaani wa îkûmi na mûgwanja wa wathani bwa mûnene Peka mwana wa Remaria, mûnene wa Isiraeri, Aasi mwana wa Njothamu atuîka mûnene wa Njunda. 2 Aasi aarî na ûkûrû bwa mîanka mîrongo îîrî, na aathana arî Njerusaremu mîanka îkûmi na îthanthatû. Ataathingata njîra imbega cia ûyûûe Ndaundi, bantû a ûûgû, aarûthire bûra bûtaarî bwega meethooni ma Mwathani Ngai wake. 3 Aathingatire njîra inthûûku cia anene ba Isiraeri, na kinya n'arutîîre ngai cia ûrongo mwana wake kîrî kîgongwana gîa kûbîîthua. Aathiingatire mîtugo îmîthûûku ya antû bara Mwathani aarî akûruta nthîgûrû îra Aisiraeri baarî akubî kûthûngîra. 4 Gûntûûni gwa kûgongera ngai cia ûrongo, irîmaani, na rungu rwa mîtî yonthe îmînene, Aasi aarutîra igongwana na aabîthîria macoco noogo.5 Mûnene Resini wa Aramu na Peka mwana wa Remaria, mûnene wa Isiraeri, baithûkîra Njerusaremu na bamîkîmba, îndî bataûmba gûtura Aasi. 6 Îgiitaani warîru, Resini mûnene wa Endomu aagîa na inya aathûkia kaîrî taûni ya Erathi, na eengatia antû ba Njunda bara baatwîre ku. Aendomu bathi batûûra ku, na i ku batwîre wana îmunthî. 7 Aasi aatûma atûmwa kîrî Tigirathi-Pireseri, mûnene wa Asîîria, na ntûmwa îno, “Ndî mûruti ngûgî waku wîrutîrîte. Ncû ûntuunyûkie kuuma kîrî Anene ba Aramu na Isiraeri, bara bakûmbithûkîra.” 8 Aasi aathûkia fetha na thaabu kuuma Nyomba ya Mwathani na kîgîînaani kîa nyomba ya mûnene na aatûma kîrî kîewa kîrî mûnene wa Asîîria. 9 Mûnene wa Sîîria Tigirathi-Pireseri, agîcookeria Aasi n'ûntû bwa gûkaya wake, aumagarûka na njûûrî yake kûrûa na Ndamasiki, amîgwata, aûraga mûnene Resini, na aathûkia antû abaira Kiri barî agwate.
10 Rîra mûnene Aasi athiire Ndamasiki kûrîîkana na mûnene Tigirathi-Pireseri wa Asîîria, oona kîthînjîro noogo na aatûmanîra Uria Mûthînjîri wa Ngai ngerekano înu yongwa, atakûbîtia bûra yakari. 11 Kwoogu Uria mûthînjîri wa Ngai aaka kîthînjîro gîkari ta kîo kîongwa, na akîrîîkia mbere Aasi acooka. 12 Agûcooka kuuma Ndamasiki, Aasi oona kîthînjîro i kîarî kîrîîkie na aathi kûrutîra igongwana oogo. 13 Kwoogu aaruta igongwana biake bia kûbîîthua na bia irio, etûura igongwana bia biakûnyua na amincîria nthakame ya kîgongwana gîa ngwatanîro kîthînjîrooni. 14 Kîthînjîro kîa rûthuku kîra kîathûrîrîtwe Mwathani, kîarî gatîgatî ga kîthînjîro gîku kîyerû na Nyomba ya Mwathani kîathiyangua n'Aasi bwa îgûrû ya kîthînjîro gîku kîyerû. 15 Rîru eera Uria mûthînjîri wa Ngai, “Tûmîra kîthînjîro gîkî kînene n'ûntû bwa igongwana bia kûbîîthua bia rûkîîrî na igongwana bia ûgoro bia irio, na n'ûntû bwa igongwana bia mûnene na bia antû bia kûbîîthua na bia irio, na igongwana bia biakûnyua bia antû. Ûmince nthakame ya igongwana bia kûbîîthua na igongwana bira bingî îgûrû rîakîo. Îndî ûntigîre kîthînjîro kîa rûthuku kaingo ngîtûmîra kûringia.” 16 Uria aarûtha bûra mûnene Aasi aamwathîîte.
17 Mûnene Aasi aaruta nkaarî cia rûthuku ira ciatûmagîrwa Nyomba ya Mwathani na aaruta mbakûri ira ciarî îgûrû rîacio. Na kinya aaruta îtangi rîa rûthuku kuuma mîgongooni ya ndegwa îkûmi na ciîrî cia rûthuku, na arîaigîîra îgûrû rîa rwara rwarûthîîtwe na iiga. 18 Na n'ûntû bwa gûkenia mûnene wa Asîîria, Aasi aatharia îrema rîra rîatumagîrwa ntugû ya Sabatû n'ûntû bwa kûgonga na ainga njîra ya mwanya îra mûnene wa Njunda aatûmagîra kûthi Nyomba ya Ngai.