Usia mûnene wa Njunda
(2Karaaya 26:1-23)
15
1 Mwankaani wa mîrongo îîrî na mûgwanja wa wathani bwa mûnene Njeroboamu wa baîrî mûnene wa Isiraeri, Asaria mwana wa Amasia aatuîka mûnene wa Njunda. 2 Aarî na ûkûrû bwa mîanka îkûmi na îthanthatû agîtuîka mûnene, na aathana arî Njerusaremu mîanka mîrongo îtaano na îîrî. Gina eetagwa Njekoria wa kuuma Njerusaremu. 3 Aarûthire bûra kûbatîîrue mbere ya Mwathani, wa ta bûra îthe Amasia aarûthîîte. 4 Amwe na ûgu, gûntû kûra gûkîîru kwarutagîrwa igongwana gûtaarutarutwa oogo, na antû nwa baathiire na mbere kûrutîra igongwana na kûbîîthîria macoco oogo. 5 Mwathani aareetera mûnene Usia mûrimo ûmûthûûku wa rûûo ûra aakarire nau ûtûûrooni bwake bunthe. Aakîrwa nyomba ara aakaraga arî wenka. N'we mwana wake Njothamu aarûngamîra nyomba ya ûnene akîathaga antû ba nthîgûrû.6 Mantû ma ngûgî cia Usia, na mara mangî monthe aarûthire maandîkîîtwe ngonooni cia Anene ba Njunda. 7 Asaria aakua na aathikwa amwe na biûyûûyû biake taûniini ya Ndaundi, na Njothamu mwana wake aatuîka mûnene bantû aake.
Sakaria mûnene wa Isiraeri
8 Mwankaani wa mîrongo îthatû na înaana wa wathani bwa Usia mûnene wa Njunda, Sakaria mwana wa Njeroboamu wa baîrî aatuîka mûnene wa Isiraeri ndeeni ya Samaria, na aathana mîeri îthanthatû. 9 Wa ta bara bangî baarî mbere yake, eeyîria Mwathani. Aathingata njîra inthûûku cia mûnene Njeroboamu mwana wa Nebati, ûra aatongoriirie Isiraeri kûrûtha meeyia. 10 Sarumu mwana wa Njabesi aabîndîra mûnene Sakaria njûri, amûûragîra Ibureamu, na aathûkia ûnene bwake.
11 Mantû mangî mara Sakaria aarûthire maandîkîîtwe îbukuuni rîa mûririkana rîa Anene ba Isiraeri. 12 Kwoogu wîrane bûra Mwathani eerire Njeû bwaûyûra bûra aamwîrîîte, “Nciarwa ciaku igaakarîra gîtî kîa ûnene bwa Isiraeri mwanka rûrîîyo rwa inya.”
Sarumu mûnene wa Isiraeri
13 Mwankaani wa mîrongo îthatû na kenda wa wathani bwa Usia mûnene wa Njunda, Sarumu mwana wa Njabesi aatuîka mûnene wa Isiraeri, na aathana mweri ûmwe arî Samaria. 14 Menaemu mwana wa Ngandi auma taûni ya Tirisa eetia aathi Samaria, aûraga Sarumu, na aathûkia ûnene bwake.
15 Mantû mangî mara Sarumu aarûthire, amwe na mantû ma kûbînda njûri, mandîkîîtwe îbukuuni rîa mûririkana rîa Anene ba Isiraeri. 16 Menaemu wa arî njîraani kuuma Tirisa, eenyangia taûni ya Tibusa cwe, na atûûri baayo, na mwanka ûra wamîthiûrûkîrîîte, n'ûntû i baaregire kûmûrugûrîra athûûngîra ndeeni. Na kinya aateembûranga nda cia eekûrû bara bonthe baarî baarito.
Menaemu mûnene wa Isiraeri
17 Mwankaani wa mîrongo îthatû na kenda wa wathani bwa Asaria mûnene wa Njunda, Menaemu mwana wa Ngandi aatuîka mûnene wa Isiraeri, aathana arî Samaria bantû a mîanka îkûmi. 18 N'aarûthire mantû maarî maathûûku mbere ya Mwathani. N'ûntû mwanka ntugû ya gûkua gwake aathingatire njîra inthûûku cia mûnene Njeroboamu mwana wa Nebati, ûra aatûmire Isiraeri barûtha meeyia.
19 Rîru Puri,a Mûnene wa Aramu, aithûkîra nthîgûrû ya Isiraeri, na Menaemu amûneenkera kiro ngiri mîrongo îthatû na mûgwanja cia fetha, kaingo amûteethia gûtûma ûnene bwake bûrika bwega njaraani ciake. 20 Menaemu eetîîtie mbia inu na taka kuuma kîrî antû ba Isiraeri bonthe bara baarî itonga. Wa muntû aarutaga nkûrûki ya nucu ya kirob cia fetha cia kûnenkera mûnene ûyu wa Aramu. Kwoogu Puri mûnene wa Aramu aacooka, na ataakarîra nthîgûrû înu.
21 Mantû mangî mara Menaemu aarûthire maandîkîîtwe îbukuuni rîa mûririkana rîa Anene ba Isiraeri. 22 Menaemu naakuire na aathikwa, na mwana wake Pekaya atuîka mûnene.
Pekaya mûnene wa Isiraeri
23 Mwankaani wa mîrongo îtaano wa wathani bwa Asaria mûnene wa Njunda, Pekaya mwana wa Menaemu aatuîka mûnene wa Isiraeri, na aathana arî Samaria bantû a mîanka îîrî. 24 Eeyîria Mwathani, athingatîîte njîra inthûûku cia Njeroboamu mwana wa Nebati, ûra aatongoriirie Isiraeri kûrûtha meeyia. 25 Mûtongoria ûmwe wa acikaarî ba Pekaya eetagwa Peka mwana wa Remaria aabîîndîra Pekaya njûri. Aaya na antû mîrongo îtaano kuuma Ngiriandi bamûûraga amwe na Arigobu na Arie ndeeni ya bantû ara aarî eega a kwîbitha gîkarooni kîa mûnene naagu Samaria, na aathûkia ûnene bwake.
26 Mantû mangî mara Pekaya aarûthire maandîkîîtwe îbukuuni rîa mûririkana rîa Anene ba Isiraeri.
Peka mûnene wa Isiraeri
27 Mwankaani wa mîrongo îtaano na îîrî ya wathani bwa Asaria mûnene wa Njunda, Peka mwana wa Remaria aatuîka mûnene wa Isiraeri, na aathana arî Samaria mîanka mîrongo îîrî. 28 Eeyîria Mwathani, athingatîîte njîra inthûûku cia mûnene Njeroboamu mwana wa Nebati, ûra aatongoriirie Isiraeri kûrûtha meeyia.
29 Îgiitaani rîa Peka mûnene wa Isiraeri, Tigirathi-Pireseri mûnene wa Aramu aayire Isiraeri aagwata taûni cia Iyoni, Abeeri-Bethi-Maaka, Njanoa, Kendesi, na Asori. Kinya agwata nthîgûrû ya Ngiriandi, na Gariiri, na nthîgûrû ya Nabutarî yonthe, na aathûkia antû abaira Aramu barî mîgwate.
30 Mwankaani wa mîrongo îîrî wa wathani bwa Njothamu mwana wa Usia, mûnene wa Njunda, Osea mwana wa Era aabîndîra mûnene Peka mwana wa Remaria njûri. Amwithûkîra amûûraga, na Osea aatuîka mûnene bantû aake. 31 Mantû mangî mara Peka aarûthire mandîkîîtwe îbukuuni rîa mûririkana rîa Anene ba Isiraeri.
Njothamu mûnene wa Njunda
(2Karaaya 27:1-9)
32 Mwankaani wa îîrî wa mûnene Peka mwana wa Remaria, mûnene wa Isiraeri, Njothamu mwana wa Usia atuîka mûnene wa Njunda. 33 Njothamu aarî na ûkûrû bwa mîanka mîrongo îîrî na îtaano akîanjîîria kwathana, na aathana arî Njerusaremu bantû a mîanka îkûmi na îthanthatû. Gina eetagwa Njerusa, mwarî wa Sandoki. 34 Athingatîîrîîte njîra imbega cia îthe Usia, n'aarûthire bûra bwakenagia Mwathani. 35 Amwe na ûgu, gûntû kûra gûkîîru gwa kûgongera gûtaarutarutwa oogo na antû nwa baathiire na mbere kûrutîra igongwana na kûbîîthîria macoco oogo. Njothamu n'we aakire kaîrî Mûrango wa Bwegûrû wa Nyomba ya Mwathani.
36 Mantû mangî mara Njothamu aarûthire mandîkîîtwe ngonooni cia anene ba Njunda. 37 Îgiitaani rîa wathani bwake Mwathani aanjîîria gûtûma Resini mûnene wa Aramu na Peka mwana wa Remaria kwithûkîra Njunda. 38 Njothamu aakuire na aathikwa nthikooni cia ûnene Taûniini ya Ndaundi, na mwana wake Aasi aatuîka ûnene.