Amasia mûnene wa Njunda
(2Karaaya 25:1-24)
14
1 Mwankaani wa îîrî wa wathani bwa Njeoasi mwana wa Njeoaasi, mûnene wa Isiraeri, Amasia mwana wa Njoasi atuîka mûnene wa Njunda. 2 Aanjîîrie kwathana arî na ûkûrû bwa mîanka mîrongo îîrî na îtaano, na aathana arî Njerusaremu mîanka mîrongo îîrî na kenda. Gina eetagwa Njeoandini wa kuuma Njerusaremu. 3 Aarûthire bûra kûbatîîrue mbere ya Mwathani, îndî ti ta bûra kîûyûûyû gîake Ndaundi aarûthire. Mantûûni mara maingî aarûthire ta bûra îthe Njoasi aarûthîîte. 4 Gûntû kûra gûkîîru gwa kûgongera, gûtaarutarutwa oogo na antû nwa baathiire na mbere kûrutîra igongwana na kûbîîthîria macoco oogo.5 Warîo ûnene bwa Amasia bûkwîbînjîra bwaita, aûraga aniini baake bara baûragîîte îthe, ûra aarî mûnene. 6 Îndî ataûraga aana ba aûragani babu, wa ta bûra kwandîkîîtwe îbukuuni rîa watho bwa Musa, ara Mwathani arutîîte watho auga, “Aciari batibatîîrue baûragwa n'ûntû bwa aana baao, na aana batikaûragwe n'ûntû bwa aciari baao, wa muntû akaûragagwa n'ûntû bwa meeyia maake.”
7 Amasia aûragîra acikaarî ngiri îkûmi ba Endomu Kîbondeeni kîa Mwonyo, na aarûa ndûa aatunyana taûni ya Sera, na amîîta Njokitheeri, riîtwa rîra yîtagwa kinya îmunthî tûrî.
8 Rîru Amasia aatûma atûmwa kîrî Njeoasi mwana wa Njeoaasi, mûnene wa Isiraeri, akîmuuria barûa. Ntûmwa yaugaga, “Ncû, twonane meetho kwa meetho.” 9 Îndî Njeoasi mûnene wa Isiraeri n'aatûmanire ntûmwa kîrî Amasia mûnene wa Njunda îkiugaga, “Îgiita rîmwe, mûtî ûrî mîîgua irîmaani bia Rebanoni n'watûmanîre ntûmwa kîrî mûthithinda wa Rebanoni, îkiugaga, ‘Neenkanîra mwarî waku agûrwe i nthaka yakwa.’ Na nyamû ya kîthaka kîa Rebanoni yakûrûkîîra agu na yakinyaangîra kathaka gaku nthî. 10 Amasia, n'ûmma atî, n'ûracindire Endomu, na îîndî n'ûgwîkumia. Ganîrwa i mwago waku na ûkare mûciî. I kî n'ûntû ûkuuria thîîna ûgîîcereria kûûra wengwa na kinya Njunda?”
11 Îndî Amasia ateenda kûthikîîria. Kwoogu Njeoasi mûnene wa Isiraeri aumagara aathi kwithûka. We na Amasia mûnene wa Njunda baakomana ûthiû kwa ûthiû baarwîra bantû eetagwa Bethi-Semesi ndeeni ya Njunda. 12 Na njûûrî ya Njunda yacindwa n'ya Isiraeri, na wora muntû aatoorooka eenûka mûciî wake. 13 Njeoasi mûnene wa Isiraeri aagwata Amasia mûnene wa Njunda arî mûgwate, amwira Njerusaremu. Na oomora rûthiingo rwa taûni înu kuuma Mwîrîga wa Eburaimu mwanka Mwîrîga wa Koona, ûraaya bwa ta mita magana maîrî. 14 Aathûkia thaabu yonthe na fetha na into bionthe bira biarî Nyomba ya Mwathani na igîînaani bionthe bia nyomba ya ûnene. Na kaîrî aathûkia agwate rîru aacooka Samaria.
15 Mantû mara mangî maarûthîkire wathaniini bwa Njeoasi, bûra aarûthire, amwe na ûcamba bwake, na bûra aarûire na Amasia mûnene wa Njunda, maandîkîîtwe îbukuuni rîa mûririkana rîa Anene ba Isiraeri. 16 Njeoasi aakuire na aathikwa Samaria amwe na anene ba Isiraeri. Na mwana wake Njeroboamua aatuîka mûnene bantû aake.
Gûkua kwa Amasia mûnene wa Njunda
(2Karaaya 25:25-28)
17 Amasia mwana wa Njoasi mûnene wa Njunda aatûûrire mîanka îkûmi na îtaano nyuma ya gûkua kwa Njeoasi mwana wa Njeoaasi, mûnene wa Isiraeri. 18 Mantû mangî mara Amasia aarûthire mandîkîîtwe ngonooni cia anene ba Njunda.
19 I kwarî njûri yabîndîîtwe Njerusaremu ya kûûraga Amasia, kwoogu aûra aathi bwa taûni ya Rakisi. Îndî anthû baake bamûthingata noogo bamûûraga. 20 Mwîrî wake wakamatwa na mbaraathi wacookua na wathikwa Njerusaremu nthikooni cia biûyûûyû biao, Taûni ya Ndaundi. 21 Antû bonthe ba Njunda baathûkia Asariab mwana wa Amasia, ûra aarî na mîanka îkûmi na îthanthatû bamûtuîkithia mûnene bantû a îthe. 22 Asaria n'we aatuunyanire Erathi yacooka kîrî Njunda na amîaka kaîrî nyuma ya îthe agûkua.
Njeroboamu wa baîrî mûnene wa Isiraeri
23 Mwankaani wa îkûmi na îtaano wa wathani bwa Amasia mwana wa Njoasi, mûnene wa Njunda, Njeroboamu mwana wa Njeoasi mûnene wa Isiraeri, aanjîîria kwathana Samaria. Aathanire mîanka mîrongo îna na ûmwe. 24 Njeroboamu n'eeyîîrie Mwathani, athingatîîte njîra inthûûku cia mûnene Njeroboamu mwana wa Nebati, ûra aarî mbere yake, na ûra aatûmire Aisiraeri beeyia. 25 Njeroboamu n'we aacookanîîrie mîanka ya Isiraeri kuuma Rebo-Amathi gûkinya mwanka Îriani rîa Araba,c kûringana na kiugo kîa Mwathani, Ngai wa Isiraeri, kîra aariirie gûkûrûkîîra mûruti ngûgî wake Njona mwana wa Amitai, kîroria gîa kuuma gataûni ka Ngathi-Eferi. 26 Mwathani n'aateethiirie Njeroboamu kûrûtha ûgu n'ûntû n'aarî akwona kûnyamaara kûra Aisiraeri baanyamaarîîte kwarî kûûnene mûno, n'wîgue aarî nkombo kana ti nkombo, gûtaarî muntû wa kûbateethia. 27 Na n'ûntû Mwathani N'eyanîîte wîrane auga atî atirekeeria Isiraeri îthirua cwe, aateethia mûnene Njeroboamu mwana wa Njeoasi abateethia.
28 Mantû mangî mara Njeroboamu aarûthire, ta ndûa ciake na ûcamba, na bûra aacookiirie taûni cia Ndamasiki na Amathi ira ciarî cia Njunda kîrî Isiraeri, monthe mandîkîîtwe îbukuuni rîa mûririkana rîa Anene ba Isiraeri. 29 Njeroboamu n'akwire na aathikwa nthikooni cia ûnene, na mwana wake Sakaria aatuîka mûnene bantû aake.