Njeoaasi mûnene wa Isiraeri
13
1 Mwankaani wa mîrongo îîrî na îthatû wa wathani bwa Njoasi mwana wa Aasia, mûnene wa Njunda, i rîo Njeoaasi mwana wa Njeû aanjîîrie kwathana Isiraeri arî ndeeni ya Samaria. Na aathanire mîanka îkûmi na mûgwanja. 2 Wa ta mûnene Njeroboamu ûra aathanaga mbere yake, Njeoasi eeyîria Mwathani na aatongoreeria Isiraeri kûrûtha meeyia. Ataatigana na njîra inu inthûûku. 3 Na Mwathani athûûra mûno n'ûntû bwa antû ba Isiraeri, na magiita maingî abarekeeria njaraani cia mûnene Acaeri wa Aramu na njaraani cia Mbeni-Andandi mwana wa Acaeri. 4 Rîru Njeoaasi eereka Mwathani, na Mwathani akwona bûra Mûnene wa Aramu ainyîîrîîtie Isiraeri na ûthûûku bûgana, aathikîîria Njeoasi na aacookia maromba maake. 5 Kwoogu Mwathani aatûmîra Isiraeri mwonokia, ûra aabakûûrire kuuma njaraani cia Aaramu, na antû ba Isiraeri batûûra mîciîni yao na thîîrî wata mbereeni. 6 Amwe na ûgu, bataatigana na meeyia ma mûciî wa Njeroboamu, mara aatûmire antû ba Isiraeri baathi na mbere kûmarûtha. Na kinya mûbuanaano wa ngai ya Asera wathi mbere kwîgua ûrî Samaria.7 Njeoaasi aarî na acikaarî baakai mûno bara baatigeere. Aarî na athiithia ba mbaraathi mîrongo îtaano, nkaarî îkûmi cia mbaraathi na acikaarî ngiri îkûmi bakûthi na magûrû, n'ûntû mûnene wa Aramu n'aarî akûthiria babu bangî, aabakinyangîra nthî ta tîîri.
8 Mantû mara mangî Njeoaasi aarûthire amwe na ngûgî ciake cia ûcamba mandîkîîtwe îbukuuni rîa mûririkana rîa Anene ba Isiraeri. 9 Kwoogu Njeoaasi aakua na aathikwa amwe na biûyûûyû biake, na aathikwa Samaria, na mwana wake Njoasi aatuîka mûnene bantû aake.
Njeoasi mûnene wa Isiraeri
10 Mwankaani wa mîrongo îthatû na mûgwanja wa wathani bwa Njoasi mûnene wa Njunda, Njeoasi mwana wa Njeoaasi atuîka mûnene wa Isiraeri, na aathanire arî Samaria mîanka îkûmi na îthanthatû. 11 Kinya we aarûtha meeyia mbere ya Mwathani. Ataatigana na meeyia ma Njeroboamu mwana wa Nebati, mara aarûthire na aatûma antû ba Isiraeri beeyia, îndî aathire na mbere na kûmathingata. 12 Mara mangî Njeoasi aarûthire, amwe na ûcamba ndûani yake na mûnene Amasia wa Njunda, mandîkîîtwe îbukuuni rîa mûririkana rîa Anene ba Isiraeri. 13 Njeoasi aakua na aathikwa amwe na biûyûûyû biake naagu Samaria, na mwana wake Njeroboamu aatuîka mûnene bantû aake.
Gûkua kwa Erisa
14 Kîroria Erisa n'ayiirue mûno ndwari îra yamûrîîre. Njeoasi mûnene wa Isiraeri n'aathiire kûmûraitha na aathûngîra aarûngama agu rûteere rwake akîrîraga, “Baaba ûû! Baaba î! N'ata ûraarî mûkaria ûmûnene wa Isiraeri!”
15 Erisa amwîra, “Thûkia ûta na mîgwî.” Njeoasi aarûtha woogu. 16 Rîru Erisa eera mûnene wa Isiraeri, “Kuuyia ûta.” Mûnene aarûtha woogu. Erisa aigîîra njara ciake îgûrû rîa njara cia mûnene. 17 Rîru Erisa amwîra, “Rugûra ndirica mbarî ya umîîro bwa riûa na ûkuuyie ûta,” na mûnene Njoasi aarûtha woogu. Kîroria Erisa amwîra, “Gera mûgwî!” Warîo mûnene aagera mûgwî. Erisa amwîra, “Ûyu i mûguî wa ûûmbani bwa Mwathani, n'ûntû ûkaarûa na Aaramu naagu Afeki mwanka ûbacinde ûbathirie bonthe.”
18 Rîru Erisa eera mûnene, “Thûkia mîgwî,” n'we amîthûkia. Na Erisa eera mûnene ûyu wa Isiraeri, “Ratha nthî n'yo.” Mûnene aaratha nthî maita mathatû, aatiga. 19 Ûntû bûbû bwathûûria Erisa, na eera mûnene, “Ûkûbatîîrue ûratha maita mataano kana mathanthatû, na i rîo ûkîîgua ûrî na ûcindi îgûrû rîa Aaramu mwanka ûkabathiria. Îndî îîndî ûkaabacinda maita mathatû monka.”
20 Erisa aakua na aathikwa. Gîkundi kîa njûûrî ya ndûa kîa Moabu i kîaithûkagîra nthîgûrû ya Isiraeri mwanjîîrioni wa kîra mwanka. 21 Îgiita rîmwe antû bamwe ba Isiraeri bakîthikaga muntû, nthûti îmwe boona gîkundi kîmwe kîa njûûrî inu cia Moabu kîîyîîte, baagera kiimba kîa muntû ûyu nthikooni ya Erisa. Na warîo mwîrî wa muntû ûyu aakuîte ûgûtongithia maîndî ma Erisa ûgu, aariûka na aarûngama.
Ndûa ya Isiraeri na Aramu
22 Acaeri mûnene wa Aramu ainyîîrie Isiraeri ntugûûni cionthe cia wathani bwa Njeoaasi. 23 Îndî Mwathani n'aarî ûmwega na wa kîao kîrî bo. Atikîrekeeria bathirua, n'abatethiirie, n'ûntû bwa kîrîîkanîro gîake na Îburaîmu, Isaka, na Njakubu. Atooro ariganîrua n'antû baake.