Njoasi Aacookeeria Nyomba ya Ngai
(2Karaaya 24:1-16)
12
1 Mwankaani wa mûgwanja wa wathani bwa mûnene Njeû wa Isiraeri, i rîo Njeoasi aanjîîrie kwathana Njunda, na aathana mîanka mîrongo îna arî Njerusaremu. Gina eetagwa Sibia wa kuuma taûni ya Beeriseba. 2 Njeoasi aarûthaga mantû mara maakenagia Mwathani ntugû cionthe cia mwoyo wake, n'ûntû Njeoyanda mûthînjîri wa Ngai n'aamûrutanaga. 3 Amwe na ûgu, gûntû kûra gûkîîru kwarutagîrwa igongwana gûtaarutarutwa oogo, na antû nwa baathiire na mbere kûrutîra igongwana na kûbîîthîria macoco ku.4 Njeoasi eera athînjîri ba Ngai ata rî, “Îthîraniani mbia cionthe ira irî imwe cia into bira biathûre bira bireetagwa Nyomba ya Mwathani, mbia ira ciîthîranagua kuumania na ûgooti bwa antû bonthe, mbia ira irutagwa kuumania na mîthiîtio na mbia ira muntû arutaga na nkoro ya kwîbendera. 5 Wa kîra mûthînjîri athûkie mbia kuuma kîrî ûmwe wa bara baigaga mbia, na mbia inu itûmîke gûcookeeria Nyomba ya Mwathani gûntû kunthe kûra kûbatîîrue kûrûthwa.”
6 Îndî mwankaani wa mîrongo îîrî na îthatû wa wathani bwa mûnene Njeoasi athînjîri bataarî bagûcookeeria Nyomba ya Ngai. 7 Kwoogu mûnene Njeoasi aatûmana kîrî Njeoyanda mûthînjîri wa Ngai na athînjîri bara bangî abaûria, “I kî n'ûntû bûtagûcookeeria Nyomba ya Ngai? Kwoogu îîndî bûtigûtua kwaigaga mbia ira bûreetagîrwa, îndî nwa mwanka bûcineenkanîre, n'ûntû bwa gûcookeeria nyomba înu gûntû kûra yînyangîîtue.” 8 Kwoogu athînjîri ba Ngai beetîganîîria atî tibo bakeethîranagia mbia kuuma kîrî antû, na tibo bagaacookeeria Nyomba ya Ngai.
9 Rîru Njeoyanda mûthînjîri wa Ngai aathûkia îthandûkû, aatûra karinya nkunîkiini yarîo, na arîaiga rûteere rwa kîthînjîro, mbarî ya ûrîo muntû akîthûûngîra Nyomba ya Ngai. Athînjîri bara beegagua bakarîîtie mwîrîga bageekîra mbia cionthe ira ciareetagwa gûku Nyomba ya Mwathani îthandûkûûni rîru. 10 Warîra boona kûrî na mbia inyiingî mûno îthandûkûûni, mwandîki wa mûnene na mûthînjîri ûra mûnene baayaga bakathûkia mbia cionthe ira ciegagua irî nyomba înu ya Ngai bagacitara, bagaciîkîra mîbukooni bakîogaga.
11 Nyuma ya kwandîka bûra ciagana, bagacinenkanîra kîrî bara barûngamîîrîîte ngûgî ya gûcookeeria Nyomba ya Mwathani. Na babu nabo bagaitûmîra kûrea mabundi ma mbaaû na aaki bara beegagua barutîîte ngûgî Nyomba ya Mwathani, 12 na aaki na maiga, na acai ba maiga, amwe na kûgûra mbaaû na maiga ma gûtûmîra gûcookeeria nyomba înu ya Mwathani. 13 Mbia ira ciareetagwa Nyomba ya Mwathani itaatûmîkaga n'ûntû bwa kûrûtha iraî bia fetha, mbakûri, tûrumbeta, kana ikinyithio bia taa, kana into bia fetha kana bia thaabu n'ûntû bwa Nyomba ya Mwathani. 14 Cionthe ciatûmagîrwa kûrea aruti ngûgî bara baacookagîîria Nyomba ya Mwathani na kûgûra into bira biendekanaga bia kûmîcookeeria. 15 Antû bara beeyagwa mbia cia kûrea aruti ngûgî bateerwa batarithie bûra mbia ciatûmîkire, n'ûntû baarutire ngûgî înu na wîtîgîka kûûnene mûno. 16 Mbia ira ciarutagwa kuuma biegwani bia îbîtia na ira ciaumaga biegwani bia wîyia itairagwa Nyomba ya Mwathani, ciarî cia athînjîri ba Ngai.
17 Îgiitaani rîru Acaeri mûnene wa Aramu eetia aathi na aarûa na taûni ya Ngathi, na amîthûkia. Rîru aacooka kwithûkîra Njerusaremu. 18 Njeoasi mûnene wa Njunda aathûkia biegwa bionthe bira anene bara baarî mbere yake Njeosafati, Njeoramu, na Aasia baarî bakûbieyana mbere ya Mwathani, abiongeera na biewa biake wengwa na thaabu cionthe ira ciarî igîînaani bia Nyomba ya Mwathani na nyomba ya mûnene, na abitûma bionthe birî kîegwa kîrî Acaeri mûnene wa Aramu. N'we mûnene Acaeri aatongoreeria njûûrî yake kuuma Njerusaremu.
19 Mantû mara mangî monthe mûnene Njoasi aarûthire, i maandîkîîtwe îbukuuni rîa mûririkana rîa anene ba Njunda.
20 Aniini ba mûnene Njoasi bamûbîîndîra njûri, na bamûûragîra Bethi-Miro, njîraani îra yeendamaga bwa Sira. 21 Aniini baake bara baamûûragire i Njosakari mwana wa Simeathi na Njeosabandi mwana wa Someri. Njoasi aathikirwe amwe na biûyûûyû biake Taûni ya Ndaundi. Na mwana wake Amasia aatuîka mûnene bantû aake.