Atharia aarutwa ûneneeni i Njeoyanda
(2Karaaya 22:10-23:15)
11
1 Rîra Atharia gina wa Aasia oonire atî mwana wake agûkua, n'aathanire antû bonthe ba mûciî wa ûnene baûragwe. 2 I Njoasi mwana wa Aasia wenka wamonyiirie. Aarî akubî kûûraganîrua na bara bangî, îndî oonokua i gina mwanake Njeoseba, ûra aarî mwarî wa mûnene Njeoramu na mwaragina wa Aasia. Amûthûkia we na mûmenyeeri wake abathûngîria kanyomba kamwe kara kaarî kîaragooni kîa Nyomba ya Mwathani bamwitha ku. Bamwitha Atharia atikaamwone, aaya kûmûûraga. 3 Kwa mîanka îthanthatû, Njeoseba aamenyeera mwana ûyu amwithîîte naagu Nyomba ya Mwathani rîra Atharia aathanaga arî mûnene nthîgûrû înu.4 Îndî mwankaani wa mûgwanja wa wathani bwa Atharia, Njeoyanda mûthînjîri wa Ngai aatûmana, areterwa anene ba ikundi bia acikaarî îgana îgana gatîgatî ga antû beetagwa Akarite na gatîgatî ga akaria ba mûnene, Nyomba ya Mwathani. Na aarîîkanîra kîrîîkanîro nabo na aatûma bathiîtia barî ndeeni ya nyomba înu ya Mwathani. Rîru aacooka aboonia Njoasi mwana wa mûnene Aasi. 5 Na abaneenkera mawatho mama, “Rîra bûkaaya ngûgîîni ntugû ya Sabatû, gîcuncî kîmwe kîrî bithatû kîenu, i gîa gûkaria nyomba ya mûnene, 6 gîcuncî kîra kîngî kîmwe kîa bithatû gîkarie mwîrîga wa Suru, na gîcuncî kîra kîngî kîmwe kîrî bithatû gîkeegua kîrî nyuma ya akaria ba mwîrîga wa nyomba ya mûnene. Ikundi bibi birî bithatû bionthe bikarie nyomba ya mûnene. 7 Na ikundi bira biîrî bienu, bara bateegagua barî ngûgîîni ntugû ya Sabatû nabo bacûûbîre Nyomba ya Ngai n'ûntû bwa gûkaria mûnene. 8 Bûkarie mûnene Njoasi na ndûûyiû irî njaraani na bwîgue bûrî n'we wara onthe akaathi. Ûra akaathengeera akubî naabi aûragwe.”
9 Anene babu ba acikaarî baarûtha kûringana na bûra bunthe Njeoyanda aabaathîîte, woora muntû aareetaga antû baake bara baarî beegue barî na rûûtha ntugû ya Sabatû, amwe na bara beegagua barî ngûgîîni ntugû înu ya Sabatû, na bonthe baaya kîrî Njeoyanda mûthînjîri wa Ngai. 10 N'we mûthînjîri wa Ngai aaneenkera anene babu ba acikaarî matumo na rong'o ira ciarî cia mûnene Ndaundi, ira ciaigîîtwe gûku Nyomba ya Mwathani. 11 N'we aabaanga akaria kûthiûrûkîîra Nyomba ya Mwathani na kîthînjîro rûteere rwa bwa iti na rwa bwa îgûrû, wa muntû agweete mathaga maake ma ndûa na njara, kaingo bakaria mûnene. 12 Rîru Njeoyanda aumagaria Njoasi mwana wa mûnene, na amwîkîra kîraûni kîongo, na amûneenkera îbuku rîa mawatho meegiî ûnene. Rîru Njoasi eetûûrîrua maguta na atûmîîrua n'we mûnene. Antû baaringa mpî na baugîîria, “Mûnene arootûûra!”
13 Rîra Atharia eegiirue gîtuma gîa akaria na gîa antû, aathi aathûngîra Nyomba ya Mwathani, ara kîrîndî kîethîranîîte. 14 Akûraitha, oona mûnene ûngî arûûngi akubî na gîtugî mûthûngîîrooni wa Nyomba ya Mwathani, kûringana na kîîwîthîre. Aathiûrûkîrîîtwe n'anene ba acikaarî na aringi ba tûrumbeta, na antû bonthe ba nthîgûrû înu bakîringaga gîtuma gîa gîkeno na bakîringaga tûrumbeta. Atharia aateembûranga nguo ciake na augîîria akiugaga, “Gûkunyanîrwa! Gûkunyanîrwa!”
15 Njeoyanda mûthînjîri wa Ngai ateendaga Atharia aûragîrwa ndeeni ya Nyomba ya Mwathani. Kwoogu aaruta watho kîrî anene ba ikundi bia acikaarî îgana îgana auga, “Mûruteeni ome arî gatîgatî ga akaria, na bûûrage muntû wonthe ûra akaageria kûmûtuunyûkia.” 16 Kwoogu bamûgwata warîra agîkinya ara mbaraathi ciathûngagîîra kîeniini kîa nyomba ya mûnene na bamûûragîra oogo.
Mantû meega mara Njeoyanda aarûthire
(2Karaaya 23:16-21)
17 N'we Njeoyanda mûthînjîri wa Ngai, aatûma kwîgua kûrî na kîrîîkanîro gatîgatî ka Mwathani na mûnene na antû, atî nwa mwanka beegue barî antû ba Mwathani. Aacooka akîrûtha gatîgatî ka mûnene na antû. 18 Rîru antû bonthe ba nthîgûrû înu baathi nyomba ya ngai ya Mbaari na bamîomoranga. Beenyangia ithînjîro na ngai cia mîbuanaano, na baûraga Matani mûthînjîri wa Mbaari, mbere ya ithînjîro. Rîru Njeoyanda mûthînjîri wa Ngai aiga akaria ba kûraithîra Nyomba ya Mwathani. 19 Na aathûkia anene ba acikaarî, na antû bara beetagwa Akarite, na akaria na antû bonthe ba nthîgûrû înu, na baumagaria mûnene kuuma Nyomba ya Mwathani, bamwira nyomba ya ûnene, bathingatanîîte gûkûrûkîîra mwîrîgaani wa akaria. Na Njoasi aakara gîtîîni gîake kîa ûnene.
20 Kwoogu antû bonthe ba nthîgûrû înu baûyûrwa i gîkeno, na taûni yeegua îrî na ûkiri, nyuma ya Atharia akûûragîrwa nyomba ya mûnene na rûûyiû.
21 Njoasi aarî na ûkûrû bwa mîanka mûgwanja rîra aanjîîrie kwathana.