Kwîgaa kwa Ndaundi kwa mûthia kîrî Soromoni
2
1 Kagiita ka Ndaundi ga gûkua karî akubî gûkinya, eetire mwana wake Soromoni na amûneenkera mîîgao yake ya mûthia amwîra, 2 “Wa ta wîthîre bwa into birî mwoyo gûkua, kagiita gaakwa ga gûkua gagûkinya. Îgîa na inya na ûcamba, 3 na wingagie mawatho ma Mwathani Ngai waku, ûkathingataga njîra ciake na kwathîkagîra maathana, mawatho na mawendi maake wa ta bûra kwandîkîîtwe îbukuuni rîa watho rîa Musa, kaingo ûûmbana mantûûni monthe mara ûkaarûthaga na kuunthe kûra ûkaathiyaga. 4 Warûtha ûgu, Mwathani akaingia wîrane bwake bûra aambîîrire auga, ‘Wegua nciarwa ciaku ikaathîkîra mawatho na batuîke eetîgua na nkoro ciao cionthe mbere yakwa, gûtirî kagiita ûkaaga muntû wa rûrîîyo rwaku wa kwathana Isiraeri.’ 5 N'ûkûmenya bûra Njoabu mwana wa Seruya aandûthîîre, rîra aûragire atongoria baîrî ba njûûrî ya Isiraeri, Abuneri mwana wa Neri na Amasa mwana wa Njetheri. Aabaûragire kagiita ga ûkiri akîrîîria nthakame îra beetûûrire kagiita ka ndûa na bûbû bwareeta kîrumi îgûrû rîake. 6 Kwoogu îîndî, mûkaanûkie kûringana na ûûme bwaku, îndî ûtikaareke akua na ûkiri.7 “Îndî rûthîra aana ba Barisirai Mûngiriandi mantû meega na ûbatuîkithie bamwe ba bara bakaarîîra meethaani yaku, n'ûntû nwabu baandûthîîre mantû meega kagiita kara ndaatoorokeete mûruanyûkwe Abusaromu. 8 Na ûririkane bûrî na Simei mwana wa Gera, Mûbenjameni wa kuuma Baurimu, ûra aandumire ntugû îra ndaathiîte Maanaimu. Îndî rîra aanthagaanîîte Njorondani, ndaamûthiîtîîrie na riîtwa rîa Mwathani ndamwîra, ‘Ntikûûraga na rûûyiû.’ 9 Ûtikaareke athi atarî mûkaanûkie. Ûrî muntû ûmûûgî, na n'ûkûmenya mîbaango îra ûkaarûtha kaingo woona na mma akûûragwa.”
10 Ndaundi aakuire na aathikwa Taûni ya Ndaundi. 11 Aathanîîte Isiraeri arî mûnene gwa kagiita ka mîanka mîrongo îna, mîanka mûgwanja arî Eburoni na mîanka mîrongo îthatû na îthatû arî Njerusaremu. 12 Soromoni aatuîkire mûnene kaanyaani ka îthe Ndaundi, na wathani bwake bûrûûngi bûkarika ti.
Soromoni aarûtha wathani bwake bwagîa inya
13 Rîru Andoniya mwana wa Agithi aathi kîrî Bathiseba, gina wa Soromoni. Bathiseba amûûria, “Gûyîîte na ûkiri?” Amûcookeria amwîra, “Yîî, mbûyîîte na ûkiri.” 14 Andoniya acooka amwîra, “Ndî na ûntû nkwenda gûkwîra.” Bathiseba amwîra, “Mbîîra.” 15 Amwîra, “Wa ta bûra ûkûmenya, ûnene bwarî bwakwa. Isiraeri yonthe yambîrîgagîîra ntuîka mûnene wao. Îndî mantû maagarûka, na ûnene bwathi kîrî mûruayia, n'ûntû gûku i ku kwarî kwenda kwa Mwathani. 16 Îîndî ndî na îromba rîmwe rîra ngûkûromba, wenda itû ûtikaandegeere.” Bathiseba amwîra, “Rîgwete.”
17 Andoniya amwîra, “Aria na mûnene Soromoni ambîtîgîîrie nthûkie Abisagi, ûra Mûsunemu atuîke mwekûrû wakwa n'ûntû imbiyî woû atikûregeera.” 18 Bathiseba amwîra, “Nkaaria na mûnene bantûûni aaku.”
19 Rîra Bathiseba aathiire kîrî mûnene Soromoni kûmwarîria bantûûni a Andoniya, mûnene aarûgamire kûmûthagaana. Mûnene amwîndamîîra na aakarîra gîtî gîake kîa ûnene. Rîru aathana gina areeterwe gîtî na aakara nthî njara yake ya ûrîo. 20 Bathiseba auga, “Ndî na îromba ngûkûromba, na ngûkwereka ûtikaarege.”
Mûnene amwîra, “Mbîîra taata, ntiirega.”
21 Amwîra, “îtîgîîria mûruanyûkwe Andoniya agûre Abisagi ûra Mûsunemu.”
22 Mûnene Soromoni aûria gina, “I kî n'ûntû ûkwenda nnenkanîra Abisagi ûra Mûsunemu kîrî Andoniya? Ka ûûmba kwîthîrwa ûkiendaga mûnenkera kinya ûnene bwakwa?” N'ûkûmenya i mûruayia ûra mûkûrû na Abiathari mûthînjîri wa Ngai na Njoabu mwana wa Seruya barî mbarî yake.
23 Rîru mûnene Soromoni aathiîtia na riîtwa rîa Mwathani akiugaga, “Mwathani arombûraga wegua Andoniya atiikua n'ûntû bwa îromba rîrî. 24 Kwoogu îîndî, ndeeni ya riîtwa rîa Mwathani ûra atwîre mwoyo, ûra andûngîkîîte ûneneeni bwa baaba Ndaundi, na aingia wîrane bwake na njîra ya kûûnneenkera gîtî kîa ûnene niû na nciarwa ciakwa, inkûthiîtia atî Andoniya agaakua îmunthî!” 25 Kwoogu, mûnene Soromoni aruta watho kîrî Benaya mwana wa Njeoyanda, ûra aathiire na kûûraga Andoniya.
26 Mûnene Soromoni eera Abiathari mûthînjîri wa Ngai, “Îthi mûndaani waku naara Anathothi, woû ûbatîîrue ûkua. Îndî, ntikûûraga îîndî n'ûntû rîra baaba Ndaundi aarî mûnene, n'wakamatire îthandûkû rîa kîrîîkanîro rîa Ngai, na wakûrûkîîra mathîînaani maingî amwe n'we.” 27 Kwoogu Soromoni eengatia Abiathari atikeegue arî mûthînjîri wa Ngai, na aingia mîgambo îra Mwathani aarîîtie arî Siro îgûrû ya Eri na mûciî wake.
28 Rîra Njoabu eegiirue mantû mamu, augiirie îremaani rîa Mwathani na kûgwatîîra ngoci cia kîthînjîro, n'ûntû n'awatagîîra Andoniya kinya ûkeegua ataawatagîîra Abusaromu. 29 Mûnene Soromoni akwîgua Njoabu n'ebithîîte îremaani rîa Mwathani na atî arûngi kîthînjîrooni, aatûma Benaya mwana wa Njeoyanda amwîra, “Îthi ûmûûrage!” 30 Kwoogu, Benaya aathi kîthînjîrooni kîa Mwathani eera Njoabu, “Mûnene auga uume ome.” Îndî Njoabu amûcookeria, “Arî, ngaakuîra aaga.” Benaya aacooka kîrî mûnene na kûmwîra bûra Njoabu amûcookiirie. 31 Soromoni amwîra, “Rûtha wa ta ûgu auga, mûûrage na ûmûthike. Na tûtiigwatwa i kîrumi n'ûntû bwa Njoabu kûûraga antû batarî na mabîtia. 32 Mwathani agaakaanûkia Njoabu n'ûntû bwa ûûragani bûra arûthîîte baaba Ndaundi atakûmenya. Aûragire antû baîrî baarî ba gîtûmi mûno na baamûcindîîte mawega. Nabo baarî Abuneri mwana wa Neri, mûnene wa njûûrî ya Isiraeri na Amasa mwana wa Njetheri mûnene wa njûûrî ya Ndûa ya Njunda. 33 Njoabu na nciarwa ciake barootûûra bagîcookagwa n'ûthûûku bwa mbûragano îno tene na tene. Mwathani aroonenkanîra ûkiri kîrî Ndaundi na nciarwa ciake na ûneneeni bwake tene na tene.”
34 Kwoogu, Benaya mwana wa Njeoyanda aathi îremaani aûraga Njoabu na aathikwa mûndaani wake rwanda. 35 Mûnene aigire Benaya mwana wa Njeoyanda atuîka mûnene wa njûûrî kaanyaani ka Njoabu na Sandoki atuîka mûthînjîri wa Ngai bantûûni a Abiathari.
36 Rîru mûnene aatûmana Simei eetwa, amwîra, “Îîbakîre nyomba Njerusaremu na ûtûûre aaga, na ûtikaathi gûntû kûngî. 37 Mûthenya ûra ûkaumagarûka na kûringa muuro wa Kindironi, ûmenye nûgaakua na ûgeecooka woû mwene n'ûntû bwa gîkuû gîaku.” 38 Simei amûcookeria, “Ûgu wauga i bwega mûnene. Nkaarûtha bunthe bûra mwathi wakwa mûnene ambîîra.” Kwoogu, Simei aakara Njerusaremu gwa kagiita karaaya.
39 Îndî mûthiani wa mwanka wa îthatû, aruti ngûgî baîrî ba Simei baatoorooka, baathi kwa Akisi mwana wa Maaka, mûnene wa Ngathi. Ntheto igûkinyîîra Simei atî barî Ngathi, 40 aatweere îng'ooi rîake, aathi Ngathi kwa mûnene Akisi kûbaceria. Akûboona, abathûkia na kûbacookia Njerusaremu.
41 Soromoni akwîgua atî Simei n'athiire mwanka Ngathi kuuma Njerusaremu na aacooka, 42 eeta Simei na kûmwîra, “Anga ûtathiîtiirie na riîtwa rîa Mwathani atî ûtiuma Njerusaremu na ndagûkaania ndakwîra wona wauma ome ûgaakua? Naawe wetîgîîria na wauga, ‘Ûgu wauga i bwega na nkaathîkîra.’ 43 I kî n'ûntû wînyangîîtie kîrîîkanîro gîaku na Mwathani na warega kwathîkîra mawatho mara ndaakûnenkeere?” 44 Mûnene aathi na mbere na kûmwîra, “N'ûkûmenya bwega mathûûkia mara warûthîîre baaba Ndaundi, na îîndî n'ûntû bwa ûgu, Mwathani agagûkaanûkia. 45 Îndî niû akanthaarima, na gîtî kîa ûnene kîa Ndaundi kîîgue kîrî na ûkaria mbere ya Mwathani tene na tene.” 46 Rîru mûnene aatha Benaya mwana wa Njeoyanda athi aûrage Simei. Kwoogu, ûnene bwarika njaraani cia Soromoni.