Soromoni aaromba ûûme
(2Karaaya 1:3-12)
3
1 Soromoni aatumire ndûgû na Faraû mûnene wa Miisiri, na aagûra mwarî wake. Amwaigire Taûni ya Ndaundi mwanka rîra arîkiirie gwaka nyomba yake, Nyomba ya Mwathani na rûthingo rûra rûthiûrûkîîrîîte Njerusaremu. 2 Kagiitaani gaku, antû baarutagîra igongwana biao gûntû kûra gûkîîru wa kûgongera n'ûntû nyomba ya kûgongera Mwathani îtaarî îgwakwa. 3 Soromoni n'endeete Mwathani na n'athingataga mawatho ma îthe Ndaundi, îndî n'aarutaga igongwana na kûbîîthia macoco gûntû kûra gûkîîru wa kûgongera.4 Mûnene Soromoni aathiire Ngibeoni kûruta igongwana, n'ûntû noogo kwarî bantû a gîtûmi mûno ara aûkîîru a kûgongera, na aaruta igongwana bia kûbîîthua ngiri imwe kîthînjîrooni gîku. 5 Naagu Ngibeoni, Mwathani aumîîra Soromoni arî kîrootooni ûtugû, Ngai amwîra, “Romba wa kîra ûkeenda, nani ngakwaa.”
6 Soromoni amwîra, “Nwonaniirie wendo bûûnene kîrî baaba Ndaundi, baaba, kîao kîînene n'ûntû n'aarî mwîtîgua kîrî woû, ûmûtheru na aarî na ûmma nkorooni yake. Na n'ûthiîte na mbere kûmwonia kîao gîaku n'ûntû bwa kûmûneenkera mwana wa gûkarîra gîtî kîa ûnene îmunthî. 7 Woû Mwathani, Ngai wakwa, ûntuîkithîîtie niû mûruti ngûgî waku mûnene bantûûni a baaba Ndaundi. Îndî ndî mwana ûmûniini na ntikûmenya njîra ya kûruta ngûgî îno. 8 Na aaga ûmbaigîîte gatîgatî ka antû baaku bara ûthuurîîte, nabo baingîîte na batiûmba gûtarîka. 9 Kwoogu ndakûromba ûmpe niû mûruti ngûgî waku ûûme bwa kwatha antû baaku na kwathûrana wega na ûthûûku. I kwîthîrwa n'ûû aûmba kwatha antû baba baaku baingî ûûgû?”
10 Mwathani n'aakeniirue n'îromba rîrî rîa Soromoni. 11 Kwoogu Ngai amwîra, “N'ûntû bwa kûromba îromba rîrî, na ûtireerombera ûtûûro bûûraaya kana ûtonga, kana ûrombera anthû baaku bathirua, îndî waromba ûûme bwa kwathana na ûmma, 12 Nkaarûtha ûgu waromba. Ngakûneenkera ûûme na meeciiria ma kwereawa kûra gûtarî muntû ûngî aaro agîa naku, na gûtirî ûngî akeegua arî naku. 13 Ngakûneenkera kinya bira ûtiraromba, ngakûneenkera ûtonga na gîtîîyo nkûrûki ya anene bara bangî bonthe barî wathaniini îgiita rîrî rîaku. 14 Na wanthingata na kwathîkîra mawatho maakwa ta abaagu Ndaundi, ûgaatûûra îgiita rîîraaya.” 15 Soromoni agûûkîîra, aaciûkîrwa atî gîkûrî kîrooto. Aacooka Njerusaremu na kûrûngama mbere ya îthandûkû rîa maathana ma Mwathani, na kûmûrutîra igongwana bia kûbîîthua na bia ûkiri. Rîru aathookia atongoria ba ûnene bwake kîathîîni kîînene.
Soromoni agiita îgamba na ûûme
16 Ntugû îmwe marwaya maîrî maaya na kûrûngama mbere ya mûnene Soromoni. 17 Ûmwe wao auga, “Mwathi wakwa, mwekûrû ûyû na niû tûtûûraga nyomba îmwe. Ndaagîîre na mwana tûrî n'we nyomba îno. 18 Nyuma ya ntugû ithatû, mwekûrû ûyû nwe aagîa na mwana. Twarî twinka na gûtaarî na muntû ûngî nyomba înu.
19 “Ûtugû bûmwe, aamaamîra mwana wake na mwana aakua. 20 Kwoogu aûkîîra ûtugû gatî na kûthûkia mwana wakwa mmaami na kûmûmaamia kîbaraani gîake. Aacooka athûkia ûra mûkuû amûmaamia kîbaraani gîakwa. 21 Ngûûkîîra rûkîîrî nkîenda gwonkia mwana wakwa, ndeethîra n'ûmûkuû. Nkûmûcûnkûûna, ndoona ataarî mwana wakwa ûra ndaciarîîte.”
22 Îndî mwekûrû ûyu ûngî auga, “Arî! Ûyu arî mwoyo nwe wakwa, na ûyu mûkuû n'waku.”
Îndî mwekûrû wa mbere auga, “Arî! Ûyu akuîte nwe waku na ûyu arî mwoyo nwe wakwa.” Kwoogu baathi na mbere kûtheta mbere ya mûnene.
23 Rîru mûnene Soromoni auga, “Wora ûmwe ariuga mwana ûra arî mwoyo n'wake na ûra mûkuû t'wake.” 24 Kwoogu mûnene auga, “Ndeteraani rûûyiû.” Baaretera mûnene rûûyiû. 25 Mûnene auga, “Giitania mwana ûyu ûrî mwoyo maita maîrî, ûnenkere eekûrû baba woora ûmwe nucu ya mwana.” 26 Mwekûrû ûra aarî gina wa mwana ûyu aarî mwoyo, aagwatwa i kîao kîa mwana wake na eera mûnene, “Itû mûnene ûtikaûrage mwana ûyu. Nenkera mwekûrû ûyû ûngî mwana ûyu athi nwe.” Îndî mwekûrû ûyu ûngî auga, “Arî, mwana atikeegue arî wakwa kana wake. Mûgiitanie icuncî biîrî.” 27 Mûnene auga, “Nenkera mwekûrû ûyu wa mbere mwana. Ûtikaamûûrage i kwîthîrwa n'we gina wa mwana.”
28 Antû bonthe ba Isiraeri bakwîgua bûra îgamba rîagiitwa i mûnene, bamûkuthûka n'ûntû i boonire arî na ûûme bwa Ngai bwa kûgiita magamba.