Atongoria ba ûnene bwa Soromoni
Asaria mwana wa Sandoki aarî mûthînjîri wa Ngai,
3 Eriorebu na Aiya aana ba Sisa baarî aandîki,
Njeosafati mwana wa Airundi aarî mwaigi mabuku ma mûririkana,
4 Benaya mwana wa Njeoyanda aarî mûtongoria wa njûûrî.
Sandoki na Abiathari baarî athînjîri ba Ngai. 5 Asaria mwana wa Nathani aarî mûtongoria wa atongoria,
Sabundi mwana wa Nathani aarî mûthînjîri wa Ngai na mweyani ûkûrû wa mûnene,
6 Aisaro aarî mûtongoria wa nyomba ya mûnene,
Andoniramu mwana wa Abunda aarî mûrûgamîîri wa ngûgî cia taka.
7 Soromoni aathuurire atongoria îkûmi na baîrî nthîgûrû yonthe ya Isiraeri. Baanenkeerwe ngûgî ya kwîthîrania biakûrîa bia mûnene na mûciî wake. Wora ûmwe aareetaga irio mweri ûmwe kwa mwanka. 8 Mama i mo mariîtwa maao,
Mbeni-Uri aarûngamîrîîte mbarî ya kîrîma kîa Eburaimu,
9 Mbeni-Ndekeri arûngamîîra mîciî ya Makasi, Saaribimu, Bethi-Semesi na Eroni-Bethianani,
10 Mbeni-Esendi arûngamîîrîîte ntûûra ya Arubothi amwe na Soko na nthî yonthe ya Eferi yarî yake.
11 Mbeni-Abinandabu, mûkûrû wa Tapathi, mwarî wa Soromoni, arûngamîrîîte Napathi-Ndori yonthe.
12 Mbaana mwana wa Airundi arûngamîrîîte Taanaki, Megindo na mbarî yonthe ya Bethi-Sani îra îrî akubî na Sarethani mbarî ya iti ya taûni ya Njesireeri, na kuuma Bethi-Seani mwanka Abeeri-Meora na gûkûrûka mwanka Njokimeamu.
13 Mbeni-Geberi aarûngamîrîîte mûciî wa Ramothi-Ngiriandi amwe na ntûûra cia Ngiriandi ira ciarî cia mûciî wa Njairi mwana wa Manase, na nthîgûrû ya Arigobu îra îrî Mbasani. Nthî îno yonthe yarî înene na yarî ma taûni mîrongo îthanthatû ira ciarî imbirigîre na nthingo na gwîkîrwa mîrîîgo ya rûthuku mîîrîgaani.
14 Ainandabu mwana wa Indo arûngamîrîîte Maanaimu.
15 Aimaasi, mûrûme wa Basemathi, mwarî wa Soromoni, aarûngamîrîîte Nabutarî.
16 Mbaana mwana wa Usai arûngamîrîîte Aseri na Arothi.
17 Njeosafati mwana wa Parua arûngamîîrîîte gîteere kîa Isakaari.
18 Simei mwana wa Era arûngamîîra gîteere kîa Benjameni.
19 Ngeberi mwana wa Uri, nwe arûngamîîra gîteere kîa Ngiriandi îra agu mbereeni yatongoragua i Sioni mûnene wa Aamori, na Ogu mûnene wa Mbasani. Na i kwarî na mûtongoria ûmwe nthî yonthe ya Njunda.
Ûtonga na ûûme bwa Soromoni
20 Antû ba Njunda na ba Isiraeri baarî baingî ta mûthanga wa îria. Baarîîre, baanyua na baakena. 21 Soromoni aathaga moonene monthe kuuma muuro wa Yufîrîti kûthi nthîgûrû ya Afirisiti mwanka mwankaani wa naiti wa Miisiri. Antû bonthe ba nthîgûrû inu cionthe bamwirîra ûgooti na bathi na mbere kûmûtûmîkîra ûtûûrooni bwake bunthe.
22 Irio bia ntugû bira biendekanaga gwa Soromoni biarî mûtu ûmwinyu ndebe magana mathatû ma mîrongo îthanthatû na ndebe magana mûgwanja ma mîrongo îîrî cia mûtu, 23 ng'ombe îkûmi inoru, na ng'ombe mîrongo îîrî cia kûrîîthia rûriîni, ng'ondu îgana rîmwe, amwe na nthia, nkûrûngû, nthwariga na ngûkû inoru. 24 Soromoni aathanire nthîgûrû yonthe ya mbarî ya ûthwîro bwa riûa bwa muuro wa Yufîrîti, kuuma Tibusa mwaka Gasa, na naarî na thîîrî na nthîgûrû cionthe ira ciamûthiûrûkîrîîte. 25 Kagiita ka wathani bwa mûnene Soromoni, Njunda na Isiraeri, kuuma Ndani mwanka Beeriseba, baatûûrire bwega, woora muntû agîkenagîîra mûcabiibû na mûkûyû wake.
26 Soromoni aarî na tûnyomba ngiri mîrongo îna twa mbaraathi na nkaarî cia ndûa, na kinya n'arî na athiithia ba mbaraathi ngiri îkûmi na ciîrî.
27 Woora mûtongoria kîrî bonthe îkûmi na baîrî, airagîra mûnene Soromoni irio bia kûmûgana na bara bonthe baarîîyagîra gwake, mweri ûmwe kwa mwanka. Woora ûmwe waciao mweriini wake aareetaga bionthe bira biendekanaga. 28 Rîra kagiita ka woora ûmwe ga kwira gaakinya, airaga kinya sayiri na rûûa rwa mbaraathi mwanya mwanya wa naara ciarî.
29 Ngai aaneenkeere soromoni ûûme na ûmenyo bwingî bûtathimîka wa ta mûthanga wa îria. 30 Ûûme bwa Soromoni bwarî bwingî nkûrûki ya bwa antû bonthe ba mbarî ya uumîîro bwa riûa, na nkûrûki ya ûûme bwa antû ba Miisiri. 31 Aarî na ûûme nkûrûki ya antû bonthe, amwe na Ethani ûra aarî Mûesirai, Emani, Karikori na Ndarinda, aana ba Maori. Na nkuma yake yataamba nthîgûrû cionthe ira ciamûthiûrûkîrîîte. 32 Aatungire njuno ngiri ithatû na nyîmbo ngiri îmwe na itaano. 33 Aariirie mantû ma mîtî kuuma mîthithinda ya Rebanoni mwanka ucopo ûra ûkûraga nthingooni. Aaria kaîrî mantû ma nyamû, nyoni, nyamû ira ciîkururagia nthî na makûyû. 34 Antû kuuma nthîgûrû cionthe na anene bonthe bara beegiirue mantû ma ûûgî bwa Soromoni, baaya kûmûthikîîria.