Kwîthuuranîra gwaka Nyomba ya Ngai
(2Karaaya 2:1-18)
5
1 Rîra Iramu mûnene wa Turo eegiirue atî Soromoni akûthuurwa mûnene na aathûkia kaanya ka îthe Ndaundi, aatûmire aruti ngûgî baake kîrî Soromoni, n'ûntû kagiita konthe i baarî na ûcoore na Ndaundi. 2 Soromoni aatûmîra Iramu ntûmwa îno:3 “N'ûkûmenya atî baaba Ndaundi ataûmba gwakîra Mwathani Ngai wake nyomba n'ûntû bwa ndûa inyiingî ira Mwathani aamûûmbanîîre. 4 Îndî îîndî, Mwathani Ngai wakwa n'anenkereete ûkiri mbarî cionthe, na gûtirî mûnthû kana thîîna. 5 Kwoogu îndî, ndî na mûbango wa gwakîra Mwathani Ngai wakwa nyomba wa ta bûra eerire baaba Ndaundi atî, ‘Mwana waku ûra agaakarîra gîtî gîaku kîa ûnene akambakîra nyomba!’
6 Kwoogu îîndî, îra aruti ngûgî baaku baantemere mîthithinda ya Rebanoni. Aruti ngûgî baakwa bakaarutanîria ngûgî na baaku, na nkabarea wa kîra kîonthe ûkeenda. Nwiyî bwega gûtirî nwa ûmwe wa antû baakwa wiyî gûtema mîtî bwega ta biû Asindoni.”
7 Iramu akwîgua ntûmwa îno ya Soromoni, aakena mûno auga, “Mwathani arookumua n'ûntû bwa kûnenkera Ndaundi mwana ûmûûgî atuîka mûnene wa mûgongo ûmûnene.”
8 Rîru Iramu acookeria Soromoni ûûgû:
“Nkûgwata ntûmwa îra ûrantûmîîre na nkaarûtha bunthe bûra ûkeenda ndûtha îgûrû rîa mîtî. Nkaaneenkanîra mîtî ya mîthithinda na mîtarakwa. 9 Aruti ngûgî baakwa bagaakamata mîgogo kuuma Rebanoni mwanka îriani. Bakoogania mîgogo înu amwe kenda bamîereeria rûûyîîni mwanka ara ûkûmîenda. Rîru bakoogora mîgogo înu na aruti ngûgî baaku bamîthûkie kuuma agu.
Rûteereeni rwaku, nwa ûtûnenkere biakûrea n'ûntû bwa antû baakwa.”
10 Iramu aanenkera Soromoni mîtî ya mîtarakwa na mîthithinda yonthe îra eendaga. 11 Soromoni nwe aanenkera Iramu ndebe ngiri magana maîrî ma mîrongo îna cia ngano, na ndebe magana maîrî cia maguta wa kîra mwanka ta irio bia antû baake. 12 Kwoogu, Mwathani aaneenkera Soromoni ûûme wa ta bûra eeranîîte nwe. Soromoni na Iramu baiga kîrîîkanîro na i kwarî na thîîrî gatîgatî kaao.
13 Rîru mûnene Soromoni eethîrania antû ngiri mîrongo îthatû kuuma Isiraeri yonthe ba kûruta ngûgî ya taka. 14 Aabatûmaga Rebanoni na ikundi bia ngiri îkûmi woora mweri kaingo woora muntû eethîrwa arî Rebanoni mweri ûmwe na mîeri îîrî mûciî. Andoniramu n'we aarî mûrûngamîîri wa ngûgî cia taka. 15 Soromoni n'aarî kinya na akamati ba mîrigo ngiri mîrongo mûgwanja na ngiri mîrongo înaana baarî ba kwînja maiga irîmaani, 16 na atongoria ngiri ithatû bara baarûngamîîrîîte ngûgî înu amwe na aruti ngûgî. 17 Soromoni aatha aruti ngûgî baake beenje na bacae maiga ma kwambîîria mûcingi wa Nyomba ya Ngai. 18 Antû kuuma taûni ya Ngebari baateetheeria aruti ngûgî ba Soromoni na Iramu kûthuuranîra mîtî na maiga ma gwaka Nyomba ya Ngai.