Soromoni aambîîria gwaka Nyomba ya Ngai
6
1 Soromoni aambîîrie gwaka Nyomba ya Mwathani mwanka wa magana mana ma mîrongo înaana nyuma ya Aisiraeri kuuma Miisiri. Ûyu warî mwanka wa îna wa wathani bwa Soromoni Isiraeri, mweri wa Sibu,a ûyû warî mweri wa îîrî. 2 Nyomba înu Soromoni aakîîre Mwathani yarî na ûraaya bwa biiti mîrongo kenda, wariî bwa biiti mîrongo îthatû na kûthi îgûrû biiti mîrongo îna na itaano. 3 Kanyomba ka mûthûngîîro kara karî mbere ya Nyomba ya Mwathani kaarî na ûraaya bwa biiti mîrongo îthatû na wariî bwako bûganeene na wariî bwa Nyomba ya Mwathani. 4 Soromoni aarûthire ndirica ciarî i ncege mbarî ya ome na i mbariî mbarî ya ndeeni.5 Nyomba ciingî ciakwa igwatithanîîtue na rûthingo rwa Nyomba ya Ngai kûthiûrûkîîria bwa ome mbarî cionthe na nyuma. 6 Nyomba inu ciarî cia ngoroba ithatû, na ya ruungu yarî na wariî bwa biiti mûgwanja, na ya gatîgatî biiti kenda na ya neegûrû wariî bwa nkûrûki ya biiti îkûmi na nucu. Ngoroba inu i ciarî na wariî mwanya mwanya n'ûntû Soromoni n'aakîîte rûthiingo agîtigaga mpako mbarî ya ome mbarî cionthe cia nyomba, kaingo mîaro itikeenjîrwe nthingooni.
7 Maiga mara maatûmagîrwa gwaka Nyomba ya Ngai maacaagîrwa naara meenjagwa, kwoogu gûtaarî na gîtuma kîa nyondo, kathoka kana into bingî bia cuuma bieguîkaga rîra Nyomba yakagwa.
8 Mûthûûngîîro wa ngoroba ya naiti warî mbarî ya iti ya Nyomba na i kwarî na nkinyo cia gwîtîîria ngoroba ya gatîgatî na ya ithatû. 9 Akûrîîkia gwaka Nyoma ya Ngai, aakunîkîîre mîaro ya neegûrû na mbaaû cia mîthithinda. 10 Aacooka aaka nyomba cia ngoroba ithatû na wa kîra ngoroba yarî na rûthingo rwa ûraaya bwa biiti mûgwanja wîtia, kûthiûrûûkîra mbarî irî ithatû cia Nyomba, na biagwatithanîîtue kîrî Nyomba ya Ngai na mbîto cia mîthithinda.
11 Rîru Ngai aaria na Soromoni amwîra: 12 “Mantûûni ma Nyomba îno ûgwaka, wegua ûkaathîkîra mawatho na kûthingata maathana maakwa, gûkûrûkîîra woû, nkaûyûria wîrane bûra ndaigire na abaagu Ndaundi. 13 Ngaatûûra gatîgatî ga antû ba Isiraeri na ntiitiganîria antû baakwa Isiraeri.”
14 Kwoogu Soromoni aaka Nyomba na amîrîîkia. 15 Mbarî ya ndeeni ya nthingo kuuma nthîgûrû mwanka îgûrû aakunîka na mîthithinda, na nthîgûrû aakunîkîra na mîtarakwa. 16 Bantû Ara Atheru Mûno aakirwe Nyomba ndeeni mbarî ya nyuma. Wakîîtwe na mbaaû cia mîthithinda kuuma nthîgûrû mwanka îgûrû na ûraaya na wariî bwa yo bwarî bwa biiti mîrongo îthatû. 17 Nako kanyomba kara kanene ka Nyomba ya Ngai, kara kaarî ome ya Bantû Ara Atheru Mûno kaarî na ûraaya bwa biiti mîrongo îthanthatû. 18 Ndeeni ya Nyomba ya Ngai yonthe n'îakunîkîîtwe na mbaaû cia mîthithinda bûra maiga matakîonekana. Mbaaû inu i ciacaîtwe mbica cia ikuru na marao mathandûkîîte.
19 Aathuuranîîre Bantû Ara Atheru Mûno Nyombaani ya Ngai kaingo aiga îthandûkû rîa kîrîîkanîro kîîtheru oogo. 20 Bantû Ara Atheru Mûno kwarî na ûraaya bwa biiti mîrongo îthatû, wariî bwa biiti mîrongo îthatû na kûthi bwa îgûrû biiti mîrongo îthatû. Aakunîka ndeeni na thaabu îra ntheru mûno na aakunîkîra Bantû Ara Atheru Mûno na mîthithinda. 21 Soromoni aakunîkire ndeeni ya Nyomba na thaabu îra ntheru, na mûrangooni wa Bantû Ara Atheru Mûno eekîra nyororo cia thaabu ikeranîîtie. 22 Kwoogu aarîîkia kûgemia Nyomba ya Ngai yonthe na thaabu, amwe na kîthînjîro kîra kîarî kîa Bantû Ara Atheru Mûno.
23 Soromoni n'arûthire mîbuanaano îîrî ya akerubi kuuma mîtîîni ya mîceituuni wora ûmwe ûrî na ûraaya bwa biiti îkûmi na itaano na amîaiga ndeeni ya Bantû Ara Atheru Mûno. 24 Ûraaya bwa mathabu ma akerubi ûmwe marî maîrî bwarî biiti îkûmi na itaano, kwoogu îthabu rîmwe rîarî na ûraaya bwa biiti mûgwanja na nucu. 25 Makerubi mamu marî maîrî maabuanene kîîmûrûthîre na kîîmûganîre, 26 wa kîra îmwe yarî na ûraaya bwa biiti îkûmi na itaano wîtia. 27 Soromoni aciaiganîîria îmwe rûteere rwa îra îngî Bantû Ara aarî Atheru Mûno. Mathabu maacio mataamba kuuma rûthingo rûmwe kûthi rûra rûngî, na mathabu ma ndeeni matongithanîria gatîgatî ka Nyomba. 28 Aakunîka Makerubi mamu marî maîrî na thaabu.
29 Nthingo cionthe cia mbarî ya ndeeni ya nyomba yonthe ciagemeetue na mbica cia makerubi, mînaathi na maûa. 30 Nthî ya nyomba irî ciîrî yakaandîîtwe na thaabu.
31 Mûthûngîîro wa Nyomba îra Ntheru Mûno warî na mîrango îîrî yarûthîîtwe na mbaaû cia mîceituuni na itugî bia mîrango bia koona itaano. 32 Mîrango înu yagemeetue na mbica cia makerubi, mînaathi na maûa, na mîraango yakwa thaabu.
33 Aacooka aarûtha itugî bia mîrango ya mwîrîga wa Nyomba ya Ngai bia mbaaû cia mîceituuni bia koona inya. 34 I kwarî na mîraango îîrî yarûthîîtwe na mbaaû cia mîtarakwa yekûnjaga. 35 Mîrango îno yagemeetue na mbica cia makerubi, mînaathi na maûa, na mîraango yakwa thaabu.
36 Rûthingo rwa Nyomba înu yonthe rwakîîtwe rûrî rwa raini ithatû cia maiga macae ithingateene na raini ya itugî bia mîtî ya mîthithinda.