Soromoni eebakîra nyomba ya ûnene
7
1 Soromoni aathûkiirie mîanka îkûmi na îthatû kwîbakîra nyomba ya ûnene. 2 Îmwe ya nyomba ira Soromoni aakaga yeetagwa Nyomba ya Mûthitû wa Rebanoni. Yarî na ûraaya bwa biiti îgana rîa mîrongo îtaano, wariî bwa biiti mîrongo mûgwanja na itaano, na kûthi bwa îgûrû biiti mîrongo îna na itaano. Yakîîtwe na mîstaarî îna ya itugî bia mîthithinda bira biagwatîîrîîte mîaro ya mîthithinda. 3 Yarathîîtwe na mîthithinda îgûrû rîa mîaro îra yatiirîîrîîtwe na itugî mîrongo îna na bîtaano na kûbangwa na raini ithatû cia itugî îkûmi na bitaano. 4 Nthingo cia nteere ciarî na ndirica ciaigîîtwe na raini ithatû cierekanîrîîte. 5 Mîîrango yonthe yarî na mbureemu cia mîraba îmîraaya, na ciarî na raini ithatû cierekanîrîîte.6 Aacooka aaka kanyomba ka mûthûngîîro ga itugî, îra yarî na ûraaya bwa biiti mîrongo mûgwanja na itaano na wariî bwa biiti mîrongo îna na itaano. I kwarî na kanyomba kara ga gweteera mbarî ya mbere kara kaimbîîtwe na gûtiirîîrwa na itugî.
7 Aarûtha nyomba ya gîtî kîa ûnene, îra kaîrî yeetagwa nyomba ya ûgiiti magamba, ara Soromoni aakaraga akîthikîîria magamba. Yakunîkîîtwe na mîthithinda kuuma nthî mwanka îgûrû. 8 Na nyomba îra Soromoni aarî akarage yarî mbarî ya nyuma ya nyomba înu ya ûgiiti magamba, na yarûthîîtwe t'yo. Na aakîra mwarî wa Faraû ûra aarî mwekûrû wake îîngî ta înu. 9 Nyomba inu cionthe ciakîîtwe na maiga ma goro kuuma nthîgûrû mwanka îgûrû, maiga mara maacaîtwe na kûgiitwa na mûcumeno kûringana na ithimi mbarî cionthe. 10 Maiga ma mûcingi maarî maanene, ma ûraaya bwa biiti îkûmi na itaano na biiti îkûmi na ciîrî. 11 Îgûrû rîa maiga mamu ma mûcingi baaka na mîaro ya mîthithinda na maiga mara maagiitîîtwe kûringana na ithimi. 12 Nyomba ya mûnene yathiûrûkîrîîtwe i rûthingo rwa raini ithatû cia maiga maacae na raini îmwe ya mîaro ya mîthithinda, wa ta bûra kanyomba ga gweteera ka ndeeni ya Nyomba ya Mwathani gaakari.
13 Mûnene Soromoni aatûmana muntû eetagwa Iramu wa kuuma Turo, 14 ûra gina aarî ntigwa na aarî wa kuuma mwîrîga wa Nabutarî. Îthe wa Iramu aarî wa kuuma Turo, na mûturi wa rûthuku. Kwoogu Iramu aarî na ûtea na waara bwa ngûgî cionthe cia rûthuku. Aayire kîrî mûnene Soromoni na kûruta ngûgî cionthe ira aanenkereetwe.
15 Iramu aarûthire itugî biîrî bia rûthuku bia kîthiûrûûrî, wa gîtugî kîarî na ûraaya bwa biiti mîrongo îîrî na mûgwanja na mûthiûrûûko wakîo warî biiti îkûmi na inyanya. 16 Aarûtha nkoobia ciîrî cia rûthuku aciîkîra îgûrû rîa kîra gîtugî, wa îra nkoobia yarî na ûraaya bwa biiti mûgwanja na nucu. 17 Wa îra nkoobia yagemeetue na raini mûgwanja cia mînyoro ciîndanîîtue. 18 Aacooka arûtha raini ciîrî cia kûngûmanga acirûmîîria ithiûrûkîrîîte mînyororo îra îrî îgûrû ya nkoobia ira ciarî îgûrû rîa wa kîra gîtugî. 19 Nkoobia ira ciarî îgûrû rîa itugî bira bienjîrîtwe mbere ya kanyomba ka mûthûngîîro, ciarûthîîtwe ikari ta maûa ma rûûyî na ciarî na ûraaya bwa biiti ithanthatû. 20 Wa îra nkoobia yarî itugîîni bibu biîrî yarî na kûkûmanga magana maîrî rainiini ciîrî akubî na mînyororo îra yarî îgûrû ya mau kûthiûrûkîîra nkoobia. 21 Iramu aarûngîkire itugî mbere ya mwîrîga wa Nyomba ya Ngai. Gîtugî mbarî ya iti agîîta Njakini na mbarî ya neegûrû agîîta Mboasi. 22 Nkobia ira ciarî itugîîni ciarûthirwe ta maûa ma rûûyî. Kwoogu ngûgî ya itugî yarîîkia.
23 Acooka arûtha îtangi rîa rûthuku rîkari ta karia, rîa kîthiûrûûrî, rîa biiti îkûmi na itaano wariî, na gwîtia bwa îgûrû naku biiti mûgwanja na nucu na rîkîthimwa mûthiûrûûko warîo kûrû warî wa biiti mîrongo îna na itaano. 24 Na ruungu rwa rûrengo rwakîo i kwagemeetue na ikuru bia rûthuku. Na ikuru bibi biarûmanîîrîîtue na kîraî warîra gîkîrûthwa na kîra biiti i kwarî na ikuru bithanthatû.
25 Îtangi rîru rîategeetwe îgûrû rîa mîbuanaano ya ncamba îkûmi na ciîrî, ithatû icûûbîîte rûteere rwa îgûrû, ithatû rûteere rwa ûthwîro bwa riûa, ithatû rûteere rwa iti na ithatû inu ingî rûteere rwa uumîîro bwa riûa. Karia karîîkîîrîîtwe îgûrû rîacio. Ara ya wa kîra îmwe yacio yarî bwa ndeeni. 26 Ûmatu bwa yo bwagana wariî bwa rwî, rûreengo naru rwarûthîîtwe ta rûreengo rwa gîkombe rwenûkîîte ta yûûa rîa rûûyî. Narîo rîaganagîra rûûyî rwa mîtûngi ngiri ciîrî.
27 Aacooka aarûtha nkaarî cia gûkururua îkûmi cia rûthuku, na wa kîra nkaarî yarî na ûraaya bwa biiti ithanthatû, wariî bwa biiti ithanthatû na kûthi bwa îgûrû biiti inya na nucu. 28 Ûûgû i bu nkaarî inu ciarûthîîtwe: I ciarî na mbaariû cia rûthuku rûteere ira ciagwatithanîîtue na mbureemu cia cuuma. 29 I kwarî na mîbuanaano ya cimba, na ya ng'ombe cia ncamba, na ya akerubi mbaariûni. Na kinya mbureemuuni, îgûrû na rungu rwa cimba na ncamba cia ng'ombe i kwarî na maûa ma kîthiûrûûrî maatumanie bwega. 30 Wa kîra nkaarî yarî na magûrû mana na cuuma cia gatîgatî cia rûthuku. Wa kîra koona ya nkaarî yarî na itugî bia gûtiirîîra kîraî kîa rûthuku, na twagemeetue mbarî cionthe na maûa maatumanie. 31 Mbarî ya îgûrû ya nkaarî i kwarî na mûromo wa kîthiûrûûrî wa biiti îmwe na nucu wîtia. Mbarî ya ome yagemeetue na maûa ma gûcaa na mbaariû cia nteere cia nkaarî ciarî cia koona na ti kîthiûrûûrî. 32 Magûrû marî mana maarî ruungu rwa mbaariû, na cuuma cia gatîgatî cia magûrû ciabîîthanîrîîtue na nkaarî. Ûraaya bwa magûrû bwarî biiti ciîrî na robo, 33 na bwaganeene na magûrû ma nkaarî cia mbaraathi. Cuuma cia gatîgatî na into bibu bingî bionthe bia nkaarî biarûthîîtwe na rûthuku.
34 I kwarî na itugî bina bia gûtiirîîra koona cionthe cia nkaarî, bira biabîîthîîrîîtue nkaarîîni. 35 Mbarî ya îgûrû kûthiûrûûka nkaarî i kwarî na mûcibi wa cuuma wa centimita mîrongo îîrî na ciîrî, na i kwarî na itugî bina biagwatithanîrîtue koonaani ya wa kîra gîtugî. Mbaariû ciayo na itugî biayo bira biatiirîîte biabîîthîîrîîtue nkaarîîni. 36 Mbaariû na itugî biagemeetue na mîbuanaano ya akerubi, cimba, na mînaathi ara oonthe kwarî na kaanya, na kunthe i kwagemeetue na maûa maatumanie. 37 Nkaarî inu irî îkûmi ciarî cia kîthimi kîmwe na i ciabuaneene n'ûntû ciarûthîrîtwe bantû amwe.
38 Iramu aacooka aathondeka iraî îkûmi bia rûthuku cia wa kîra nkaarî, na kîra kîraî gîkîgea rûûyî rwa mîtûngi mîrongo îîrî. Wa kîra kîraî kîarî na wariî bwa biiti ithanthatû. 39 Aiga nkaarî itaano cia rûûyî rûteere rwa iti, na itaano ira ingî rûteere rwa îgûrû ya Nyomba ya Mwathani. Karaî kara kanene ka rûthuku geetagwa îria kaigîîrîîtwe koonaani ya rûteere rwa iti rwa mûthûngîîro wa Nyomba ya Mwathani. 40 Na kaîrî Iramu aarûtha nyûngû, iciko bira binene, na mbakûri. Aarîîkia ngûgî îra aarutagîra Soromoni ya Nyomba ya Mwathani.
41 Bibi i bio into bira Iramu aarûthire:
itugî biîrî, na nkoobia inu ciîrî ikari ta mbakûri ciarî îgûrû ya itugî,
mîgemio ya mîkathî înu yarî îgûrû ya biongo bibu biarî îgûrû rîa itugî;
42 kûngûmanga magana mana ira ciacaîtwe n'ûntû bwa mînyororo îra yagemeetie nkoobia inu ciarî îgûrû ya itugî bibu.
43 Aarûtha nkaarî îkûmi, na iraî biacio îkûmi,
44 îtangi rîra rîmwe na mîbuanaano ya ncamba ira îkûmi na ciîrî irî ruungu rwarîo.
45 Kinya aarûtha nyûngû, iciko biinene, na iraî.
Into bibi bionthe mûnene Uramu aarûthîîre mûnene Soromoni bia Nyomba ya Mwathani biarî bia rûthuku. 46 Kîbondeeni kîa Njorondani i noogo mûnene aabirûthithagîria, bantû kwarî na yûûmba gatîgatî ga Sukothi na Sarethani. 47 Soromoni aatigire into bibi bitarî bithime n'ûntû bwa bûra biarî biingî, na gûtirî we wamenyaga ûrito bwa rûthuku rûra rwatûmîkire.
48 Kinya Soromoni aarûtha into bionthe bira biarî Nyomba ya Ngai tabio,
kîthînjîro kîa thaabu,
meetha cia thaabu ira ciaigagîîrwa mîgaate îra yarutagîrwa Mwathani;
49 itugî bia thaabu întheru bia gûtûgîîria taa, bitaano mbarî ya iti na bitaano bibu biingî rûteere rwa bwa îgûrû mbarî ya mbere Bantû ara Atheru Mûno.
Na aarûtha magemio ma maûa, taa, na mîgwati, bionthe biarûthîîtwe na thaabu,
50 ikombe, magati ma kûrûnga ntaambi cia taa, na mbakûri, na, tûraî twa mîgaate na tûraî twa gûkamata makara marî mwanki, biarî bia thaabu îra ntheru mûno,
marenci ma mîrango ya Bantû ara Atheru Mûno, kinya mîrango ya Nyomba ya Ngai, yarî ya thaabu.
51 Rîra mûnene Soromoni aarîîkiirie ngûgî yonthe îra aarutaga n'ûntû bwa Nyomba ya Mwathani, aathûngîria into bira îthe Ndaundi aathûrîrîîte Mwathani, na aiga thaabu, fetha, na into bira bingî bionthe igîînaani bia Nyomba ya Mwathani.