Îthandûkû rîa Maathana rîareetwa Nyomba ya Ngai
(2Karaaya 5:2-6:2)
8
1 Rîru mûnene Soromoni eeta akûrû ba Isiraeri, atongoria bonthe ba mîîrîga ya Isiraeri na atongoria ba mîciî ya Isiraeri beethîrana kîrî we Njerusaremu. Baarî bareete Îthandûkû rîa Maathana rîa Mwathani, kuuma Sayuuni, Taûni ya Ndaundi. 2 Antû babu bonthe ba Isiraeri beethîrana mbere ya mûnene Soromoni kagiita ka thigûnkû ya mweri wa Ethanimu,a tau mweri wa mûgwanja.3 Rîra akûrû ba Isiraeri baayire bonthe na athînjîri baûkîîria îthandûkû rîa maathana. 4 Arawi na athînjîri baathûkia îthandûkû rîa maathana rîa Mwathani, amwe na îrema rîa kûrîîkanaga na into bionthe biitheru bira biarî îremaani mwanka Nyomba ya Ngai. 5 Mûnene Soromoni na kîrîndî gîa Isiraeri kîonthe, kîra kîethîranîîte amwe nwe, baarî mbere ya îthandûkû, bakîrutaga igongwana bia ng'ondu na ncamba imbingî mûno itaûmba gûtarîka.
6 Rîru athînjîri ba Ngai baareeta îthandûkû rîa maathana rîa Mwathani mwanka ndeeni ya Nyomba ya Ngai Bantû Atheru Mûno, na barîthûngîria ruungu rwa mathabu ma akerubi. 7 Akerûbi baataambûrûkîîtie mathabu îgûrû rîa bantû ara îthandûkû rîru rîaigagwa, na maagwîkîra îthandûkû rîru na mîaro yarîo ya kûrîkamata. 8 Itugî bibu biarî biiraaya bûra mîthia yabio îkîonekana muntû arî mbere ya Bantû ara Atheru Mûno, îndî muntû atikîbiona arî ome, na kinya îmunthî birî oogo. 9 Gûtirî kîo kîarî îthandûkûûni rîru tatiga mbaariû ciîrî cia maiga ira ciandîkîîtwe maathana ma Mwathani ira Musa eekîrîîte ku arî Orebu, naara Mwathani aigire kîrîîkanîro na antû ba Isiraeri bakûrîîkia kuuma Nthîgûrû ya Miisiri.
10 Athînjîri ba Ngai bakuuma Bantû ara Atheru, îtu rîaûyûra Nyomba ya Mwathani, 11 na athînjîri ba Ngai baaremwa i kûruta ngûgî ciao n'ûntû bwa îtu, n'ûntû ûkumio bwa Mwathani i bwaûyûrire Nyomba ya Ngai.
12 Rîru Soromoni auga, “Mwathani augîîte agaakara îtuuni rîra rîrumanu, 13 îndî ngûgwakîra Nyomba înthongi mûno, bantû aaku a gûkara tene na tene.”
“Mwathani arookumua, Ngai wa Isiraeri, ûra aûyûria wîrane bwake bûra aanenkeere baaba Ndaundi na kanyua gaake auga; 16 ‘Kuuma ntugû îra ndaarutire antû baakwa nthîgûrû ya Miisiri, ntaataara taûni nwa îmwe kuuma mwîrîgaani nwa ûrîkû wa Isiraeri ara ngaaka nyomba yakwa, kaingo riîtwa rîakwa rîkumithîrua ku. Îndî i ndaathuurire Ndaundi aatha antû baakwa Isiraeri.’
17 Baaba Ndaundi n'athûgaanîîtie gwaka nyomba ya kûgongera Mwathani Ngai wa Isiraer. 18 Îndî Mwathani amwîra, ‘N'warûthire bwega kûthûgaania kûmbakîra Nyomba, 19 îndî ti woû ûkambakîra yoo, i mwan'waku agaaka n'ûntû bwa gûntîîya.’ 20 Îîndî Mwathani akûûyûria wîrane bwake bûra aigire, n'ûntû i nthûkîîtie kaanya ka baaba Ndaundi, ndaatuîka mûnene wa Isiraeri, wa ta bûra Mwathani eeranire, na ndaaka Nyomba n'ûntû bwa gûtîîya Mwathani Ngai wa Isiraeri. 21 Ndeeni yayo i ndûthîîte bantû a îthandûkû rîa maathana rîra rîrî na kîrîîkanîro kîa Mwathani kîra aarîîkanîîre na biûyûûyû bietû rîra aabarutire nthîgûrû ya Miisiri.”
Îromba rîa Soromoni
(2Karaaya 6:12-42)
22 Rîru Soromoni aarûngama mbere ya kîthînjîro kîa Mwathani, mbere ya kîrîndî kîonthe gîa Isiraeri, na aataambûrûkia njara ciake eerekereetie îgûrû. 23 Auga,
“Îî Mwathani, Ngai wa Isiraeri, gûtirî Ngai ûngî îgûrû na nthîgûrû ûkari ta woû. N'ûyûragia kîrîîkanîro gîaku na antû baaku bara bathiiyaga na mbere gûkwathîkîra na nkoro yonthe. 24 N'waûyûriirie wîrane bwaku kîrî mûruti ngûgî waku baaba Ndaundi, bûra weranire na kanyua gaaku na n'ûûyûrîîtie na inya yaku wengwa îmunthî. 25 Kwoogu îîndî, Mwathani Ngai wa Isiraeri, ûyûria wîrane bûra weeranire na baaba Ndaundi. Wamwîra ûkeegagua rîonthe kûrî na mûnene wa kwatha Isiraeri kuuma mûciî wake, bunka wegua, bunka wegua nciarwa ciake ikaathîkîra maathana maaku bwega, wa ta bûra aarûthaga 26 Îîndî Mwathani, woû Ngai wa Isiraeri, ûyûria kiugo gîaku kîra werire mûruti ngûgî waku baaba Ndaundi.
27 Îndî Mwathani, nwa ûtûûre nthîgûrû? Kinya ma îgûrû mara marî îgûrû mûno, ûtiganîra ku. Kwoogu, Nyomba îno ngwakîrîîte n'îniini mûno! 28 Amwe na ûgu thikîîria îromba na kwerekana gwakwa niû mûruti ngûgî waku ûmwîgîîrue kîao, itû Mwathani Ngai wakwa. Îgua kîrîro na îromba rîra niû mûruti ngûgî waku akûromba arî mbere yaku îmunthî. 29 Meetho maaku marooraithîîria Nyomba îno mûthenya na ûtugû, bantû aaga waugire riîtwa rîaku rîkaagongerwa. Ûroîgua îromba rîra niû mûruti ngûgî waku akaarombagîra oogo. 30 Na ûthikîîrie kwerekana wakwa niû mûruti ngûgî waku na antû baaku ba Isiraeri, rîra bakaaromba beerekereete bantû aaga. Ûroîgua ûrî îgûrû gîkarooni gîaku na ûtûrekere.
31 Muntû akaaya kûbîtîria ûra ûngî na akeerwa anyue muuma na akaaya akathiîtia arî mbere ya kîthînjîro nyomba îno yaku, 32 ûroîgua ûrî îgûrû, na ûkarûtha ûntû, ûgambithie aruti ngûgî baaku, ûkaanûkie ûra arî na mabîtia bûra abatîîrue na ûra n'we atarî na mabîtia ûmûrûthîre wega bûra abatîîrue.
33 Antû baaku Isiraeri bakaaya gûturwa n'anthû baao n'ûntû ibeeyîîtie mbere yaku, na bagagûcookera bakaaya Nyomba îno na bakeenyiia na bakeerira, 34 ûroîgua ûrî îgûrû, na ûrekere antû baaku ba Isiraeri meeyia maao, na ûbacookie kaîrî nthîgûrû îra wabeere amwe na biûyûûyû biao.
35 Na îgûrû rîkaaya kwingwa wîgue gûtarî na mbura n'ûntû antû baaku ibeeyîîtie mbere yaku, na bacooke barombe beerekereete bantû aaga, beerire bagarûke kuuma wîyiani bwao n'ûntû n'ûbapeete îkaanûkia, 36 ûroîgua ûrî îgûrû, ûrekere aruti ngûgî baaku wîyia bwao, tabo antû baaku Isiraeri. Barutane njîra îmbega îra babatîîrue bathingata, na uurithie mbura nthîgûrû îra ûpeete antû baaku rûrî rûgai rwao.
37 Gûkaaya kûgîa na yûûra kana mîrimo nthîgûrû, kana ruuo rwa kûbîîthia irio mîndaani, kana mûrimo wa kîmuu, kana ngige, kana maginyo, kana bakaaya gûcîgîîrua n'anthû baao ntûûraani ciao, kana thîîna cia mûthemba wora ûkeegua ûrî, kana mîrimo ya mîthemba yonthe, 38 na gûkeethîrwa muntû nwa ûrîkû kuuma kîrî antû baku Isiraeri akaaromba kana eerekane, bonthe bakîmenyaga kûthîîna kwao na kîeba kîao, na bataambûrûkie njara ciao beerekereetie Nyomba îno, 39 ûroothikîîria ûrî îgûrû, bantû ara ûkaraga na ûbarekere. Na ûrûthîre wora muntû kûringana na bûra bunthe arûthîîte n'ûntû i woû gwenka wiyî nkoro cia antû. 40 Rîru bagagûtîîya na bathiîre njîraani ciaku kagiita konthe kara bagaatûûra nthîgûrû îra wapeere biûyûûyû bietû.
41 Rîra ageni ba kuuma kûngî, bara batarî bamwe ba antû baaku Isiraeri bakauma nthîgûrû cia kûraaya n'ûntû bwa riîtwa rîaku, 42 na n'ûntû i beegîîtue nkuma ya riîtwa rîaku rîînene na inya yaku înene, na bakaromba beerekereete Nyomba îno, 43 ûthikîîrie maromba maao ûrî îgûrû, na ûbarûthîre bûra bunthe bagaakûûria. Rîru i rîo antû bonthe ba nthîgûrû bakaamenya riîtwa rîaku na bagûtîîye, wa ta antû baaku Isiraeri, na bamenye riîtwa rîaku i rîgongagwa nyomba îno ngwakîrîîte.
44 Antû baaku bakathi kûrûa na anthû baao, kûra kunthe ûkaabaira, nabo bakûromba beerekereete taûni îno ûthuurîîte na nyomba îno yaku mbakîîte ya gûkûgongera, 45 ûthikîîrie îromba na kwerekana kwao ûrî îgûrû, na ûbaûmbanîre.
46 Bakaaya kwîyia mbere yaku, n'ûntû gûtirî we ateeyagia, na ûthûûre i bo ûbapeeyane kîrî mûnthû, na bagwatwe barî mîgwate bairwe nthî ya kûûraaya kana gûûkubî, 47 na bakaaya kûgarûka mathûgaania barî nthîgûrû înu barî mîgwate, na beerire bakwereke barî wa naagu nthîgûrû ya ûkombo bakwîre, ‘Itwîyîîtie, twarûtha ûthûûku,’ 48 na bakaaya kwîrira na nkoro ciao cionthe barî nthîgûrû înu ya ûkombo bairirwe, na barombe beerekereete nthîgûrû yao, îra wanenkeere biûyûûyû biao, taûni îra ûthuurîîte, na Nyomba îra ngwakîrîîte, 49 ûthikîîrie îromba na kwerekana kwao ûrî îgûrû ûbeegîîrue kîao.
50 Na ûrekere antû baaku meeyia maao, na mara monthe bakûrûthîrîîte na ûtûme anthû baao babeegîîrue kîao, 51 n'ûntû n'antû baaku na rûgai rwaku, bara warutire Miisiri, kîrûngûrûûni kîa mwanki.
52 Meetho maaku maro rancûkia n'ûntû bwa îromba rîakwa na îromba rîa antû baaku Isiraeri, na ûbathikîîrie rîonthe rîra bagûkûromba. 53 N'ûntû wabathuurire kuuma kîrî mîgongo yonthe ya nthîgûrû batuîka rûgai rwaku, wa ta bûra waugîîte gûkûrûkîîra mûruti ngûgî waku Musa rîra woû, Mwathani Mwene Inya waarutire biûyûûyû bietû Miisiri.”
54 Rîra Soromoni aarîîkiirie maromba mama mbere ya Ngai, aarûgama mbere ya kîthînjîro kîa Mwathani, ara aaturîîtie maru na gûûkîîria njara ciake îgûrû. 55 Aarûngama na aathaarima antû bonthe ba Isiraeri na kayû kanene akiugaga,
56 “Mwathani arookumua, ûra aneenkereete antû baake ba Isiraeri bantû a kûnogoka, wa ta bûra eeranire. Gûtirî mûgambo nwa ûmwe ûra eeranire na mûruti ngûgî wake Musa ataingîîtie. 57 Mwathani Ngai wetû aroegua arî amwe naati wa ta bûra aarî amwe na biûyûûyû bietû, atigaatûtiganîrie kana atûteeyanîria. 58 Aroocookanîîria nkoro cietû kîrî we, na atûûmbithie kûthi na njîra ciake na kwathîkagîra mawatho na maathana mara aanenkeere biûyûûyû bietû. 59 Mama monthe ndaaromba mbere ya Mwathani maroegua marî akubî nwe ûtugû na mûthenya, nwe ateethie mûruti ngûgî wake, na antû bonthe ba Isiraeri baûmbane ma ûbatuuni maao ma wa îra ntugû, 60 kaingo antû ba nthîgûrû bamenya Mwathani n'we Ngai na gûtirî ûngî t'we. 61 Îndî bwîgue bwîrutîrîte na nkoro cienu cionthe kîrî Mwathani Ngai wetû, na kwathîkîra mawatho, maathana maake ta bûra bûkûrûtha kinya îmunthî.”
Kwathûrwa kwa nyomba ya Ngai
(2Karaaya 7:4-10)
62 Rîru mûnene na antû bonthe ba Isiraeri baaruta igongwana mbere ya Mwathani. 63 Soromoni aarutire biewa bia ûkiri kîrî Mwathani bia Ng'ombe ngiri mîrongo îîrî na ciîrî, na ng'ondu ngiri îgana rîmwe rîa mîrongo îîrî. Na njîra înu, mûnene na antû ba Isiraeri bonthe baathûra Nyomba ya Ngai.
64 Ntugû wa înu, mûnene aathûra gatîgatî ka ome ara aarî mbere ya Nyomba ya Mwathani. Na agu noo aarutîîre igongwana bia kûbîîthia, kîgongwana kîa irio na mathuunya ma kîgongwana kîa ngwatanîro, n'ûntû kîthînjîro kîa rûthuku kîra aarî akûrûtha i kîarî kîniini mûno gîa kûrutîra igongwana bibi bionthe. 65 Kagiitaani gaku, Soromoni aarûtha kîatho gîa ntugû mûgwanja, amwe na Isiraeri yonthe. Kîarî kîrîndî kîînene antû baayîîte kuuma Rebo-Amathi mwanka Wandi Miisiri. 66 Ntugû ya inyanya nyuma ya kîatho kîa biîrî, Soromoni eera antû beenûke mîciî yao, baathaarima mûnene rîru beenûka bakeneete n'ûntû bwa mantû meega mara Mwathani aarûthîrîîte mûruti ngûgî wake Ndaundi na antû baake Isiraeri.