Ngai aumîîra Soromoni kaîrî
(2Karaaya 7:11-22)
9
1 Rîra Soromoni aarîîkiirie gwaka Nyomba ya Mwathani na Nyomba ya ûnene na monthe mara eendaga kûrûtha, 2 Mwathani amuumîîra îgiita rîa maîrî, wa ta bûra aamuumîîrîîte Ngibeoni.3 Na Mwathani amwîra,
“I mbîgîîtue îromba na kwerencana waku kûra werencanîîte mbere yakwa, na nkûtheria Nyomba îno wakîîte kaingo ngongagîrwa ku kagiita konthe. Nkamîmenyagîîra kagiita konthe. 4 Wegua ûkaathingata njîra ciakwa na ûmma bwa nkoro yaku ta bûra abaagu Ndaundi aarûthire, na kwathîkagîra mawatho, maathana na moorutani maakwa, 5 nkaingia wîrane bwakwa bûra ndeeranire na abaagu Ndaundi rîra ndaamwîrire, ‘Gûtirî rîo bûkaaga muntû wa rûrîîyo rwaku wa gûkarîra gîtî kîa ûnene gîa Isiraeri.’
6 Îndî woû kana nciarwa ciaku bûkaaya kûûndûka bûgatiganîria mawatho na maathana maakwa mara mbwete, na bûkathi kûgonga ngai ciingî, 7 ngaakûûra Isiraeri kuuma nthîgûrû yakwa îra mbanenkereete, na nkaarega Nyomba îno yakwa îra nthereetie ngongagîrwa. Na Isiraeri îtuîke gîntû gîa kwonanîîrua na kûthekeerwa n'antû bonthe. 8 Na kinya wegua Nyomba îno îîndî ûgu n'îgûkaathwa, muntû wonthe ûgaakûrûkîîra oogo akaaragia na kîoye aûrie, ‘I kî n'ûntû Mwathani aarûtha ûntû ta bûbû nthîgûrû îno na kinya kîrî Nyomba îno ya Mwathani?’ 9 Antû bagaacookia bauge, ‘N'ûntû ibatiganîrîtie Mwathani, Ngai wao, ûra aarutire biûyûûyû biao Miisiri, na baathingata ngai ciingî, bacigonga na bacitûmîkîra. Na n'ûntû bwa ûgu Mwathani aareeta kînyamaara gîkî kîonthe kîrî bo.’ ”
Ngûgî ingî cia Soromoni
(2Karaaya 8:1-2)
10 Mîanka mîrongo îîrî îkûthira, kagiita kara Soromoni aathûkiirie ga gwaka Nyomba ya Ngai na nyomba yake ya ûnene, 11 Soromoni aanenkeere Iramu mûnene wa Turo taûni mîrongo îîrî cia gîteere kîa Gariiri n'ûntû Iramu n'aarî akûmûnenkera mîtarakwa na mîthithinda na thaabu bira eendaga. 12 Iramu aumire Turo kûthi kwona taûni inu Soromoni aamûneenkerete, îndî, itaamûkenia. 13 “Amûûria, mûruayia, i taûni mbi ino ûûneenkerete?” I kîo gîtûmi taûni inu ciîtagwa nthîgûrû ya Kaburi wana îmunthî tûrî. 14 Iramu n'atûmîrîte Soromoni taranta îgana rîa mîrongo îîrî cia thaabu.
15 Mûnene Soromoni aarutithiirie antû ngûgî ya taka gwaka Nyomba ya Ngai, nyomba yake ya ûnene, na Miro na rûthingo rwa Njerusaremu, na taûni cia Asori, Megindo, na Ngeseri. 16 Mbereeni mûnene Faraû wa Miisiri n'aithûkîrîte taûni ya Ngeseri, amîbîîthia, na kûûraga Akanaani bara baatwîre ku, aanenkera mwarî wake taûni înu ya Ngeseri ta kîewa kîa mûranû, akûgûrwa i Soromoni. 17 Kwoogu, Soromoni aaka taûni ya Ngeseri kaîrî. Kinya aaka Bethi-Oroni ya naiti, 18 Baarathi na Tamari îra yarî rwanda rwa Njunda. 19 Aaka taûni irî bianda na taûni cia kwaiga nkaarî cia mbaraathi na mbaraathi ciake, na kîonthe kîra eendire gwaka Njerusaremu, Rebanoni na nthî îra aathaga yonthe.
20 Antû bara bangî bonthe baatigeere ba Aiti, Amori, Aperisi, Aibi, na Anjebusi ûgu i ta kuuga bara bataarî ba Isiraeri, 21 amwe na aana baao bara baatigarîîte nthîgûrû înu, bara Aisiraeri bataathirîîtie, Soromoni abatuîkithia nkombo ciake cia kûruta ngûgî mwanka îmunthî. 22 Îndî Soromoni ataatuîkithia antû ba Isiraeri nkombo cia kûmûrutîra ngûgî, îndî aabatuîkithiirie antû ba ndûa, atongoria ba ûnene bwake, atongoria ba njûûrî cia ndûa, na atongoria ba nkaarî ciake cia ndûa, na athiithia ba mbaraathi ciake. 23 Kwarî na antû magana mataano ma mîrongo îtaano bara baathuurîîtwe i mûnene Soromoni ba kûrûngamîîra antû bara baarutaga ngûgî ciake.
24 Nyuma ya Soromoni kûreeta mwekûrû wake, mwarî wa Faraû kuuma Taûni ya Ndaundi kûthi nyomba ya ûnene îra aamwakîrîîte, aaka Miro. 25 Maita mathatû wa kîra mwanka, Soromoni aarutaga kîgongwana kîa ngwatanîro kîrî Mwathani na kîgongwana gîa kûbîîthua kîthînjîrooni kîra aakîrîîte Mwathani, na kûbîîthia macoco mbere ya Mwathani. Na kwa njîra înu, Soromoni aarîîkia kwingia mara meendekanaga Nyomba ya Ngai.
26 Rîru Soromoni aaka meeri inyiingî Esioni-Ngeberi na Erothi rûteere rwa Îria Rîtuune naagu Endomu. 27 Iramu aatûma aruti ngûgî baake bara baiyî mantû ma îria kûruta ngûgî amwe na aruti ngûgî ba Soromoni meeriini. 28 Baathiire mwanka Ofiri na baareeta kiro ngiri îkûmi na inya cia thaabu, ira baaneenkeere mûnene Soromoni.