Mûnene wa mûka wa kuuma nthîgûrû ya Seba aariûngîra Soromoni
(2Karaaya 9:1-12)
10
1 Rîra mûnene wa mûka kuuma nthîgûrû ya Seba eegiirue mantû ma nkuma ya Soromoni n'ûntû bwa ngwatanîro yake na Mwathani, aaya kûmûthima na biûria biûmo. 2 Aakinya Njerusaremu na gîkundi kîînene mûno gîa antû barî na nkamîîra ikamatîîte tûnyamû tûra twîkagîrwa irioni, thaabu îmbingî, na maiga ma goro. Aaya kîrî Soromoni na aaria nwe îgûrû rîa monthe mara aarî namo mathûgaaniani. 3 Soromoni amûcookeria biûria bionthe, na gûtirî bu bwarî bûûmo kîrî mûnene kûmwereeca. 4 Rîra mûnene wa mûka wa kuuma Seba oonire ûûme bwa Soromoni, amwe na nyomba ya ûnene îra aakîîte, 5 irio bira biaigîîtwe meethaani yake, bûra atongoria ba ûnene bwake baakaraga, bûra bara baamûtûmîkagîra beekîrîîte nguo ciao, bûra bara baamweyaga biakûnyua baarûthaga ngûgî yao na igongwana bia kûbîîthua bira aarûthaga Nyomba ya Mwathani, aarigara mûno.6 Eera mûnene, “Ntûmwa îra ndeegiirue nthîgûrû yaakwa îgûrû rîa mantû mara ûrûthîîte na îgûrû rîa ûûme bwaku i ma mma. 7 Îndî nteetîgia bûra baambîîrire mwanka ndaaya ndoona na meetho maakwa. Ûmma, kinya bûra ndareerîîtwe bûtigûkinya nucu ya ûûme bwaku, n'ûkûrûkîîtie bûra ndeegîîtue na kûraaya. 8 Antû baaku twa mwanka wîgue bakeneete mûno, bara barûngamaga mbere yaku na bakeegua ntheto cia ûûme bwaku! 9 Mwathani Ngai waku arookumua, ûra akeneete i woû na agûtuîkithia mûnene wao. N'ûntû Mwathani n'endeete Isiraeri n'agûtuîkithîîtie mûnene kaingo ûbaatha bûra kûbatîîrue na ûtheru.”
10 Rîru aanenkera mûnene Soromoni kîewa gîa kiro ngiri inya cia thaabu, tûnyamû tûra tûnunkagia irio bwega twiingî na maiga ma goro. Gûtaaretwa tûnyamû twa kûnunkia irio bwega twingî ta tûtu mûnene wa mûka wa kuuma Seba aaneenkeere mûnene Soromoni.
11 Nkûrûki ya ûgu meeri cia Iramu ira ciareetaga thaabu kuuma Ofiri, i ciareetire mîtî îmiingî ya Arimagi na maiga ma goro. 12 Mûnene Soromoni aatûmîra mîtî înu kûrûtha nkinyo cia Nyomba ya Mwathani na nyomba ya ûnene, na kinya kûrûthîra aini wandîndî cia ndigi inyingî na ngita. Mîtî ta înu ya Arimagi îtoonekana kaîrî Isiraeri na kinya îmunthî tûrî.
13 Mûnene Soromoni nwe aanenkera mûnene wa mûka wa Seba gîntû kîonthe kîra eendaga na bira aarombire, îgûrû ya biewa bia kûringana na kîîwîthîre kia ûnene. Rîru aathi aacooka barî na antû baake nthîgûrû yake.
Ûtonga bwingî bwa Soromoni
(2Karaaya 9:13-28)
14 Ûrito bwa thaabu bûra Soromoni aagwataga wa kîra mwanka i ta kiro mîrongo îîrî na itaano, 15 tûtagûtara ûgooti bûra bwarîagwa n'abiacaara na itonga bira binene, anene bonthe ba Arîbia na mangabana ma nthîgûrû ya Isiraeri.
16 Mûnene Soromoni aarûtha rong'o inene magana maîrî, wa îra îmwe yaneereetue na thaabu ya kiro mûgwanja, 17 na ingî i niini magana mathatû, wa îra îmwe yaneereetue na kiro ta ithatû ûgu cia thaabu. Auga cionthe ciaigwe nyomba înene yeetagwa mûthitû wa Rebanoni.
18 Mûnene aarûtha gîtî kîînene kîa ûnene kîa mûguongo na gîakandîîtwe na thaabu înkembe. 19 Gîtî gîku kîa ûnene kîarî na nkinyo ithanthatû. Mbarî ya nyuma îgûrû rîa gîtî kîarî kîthiûrûûrî. Wa kîra rûteere rwakîo i kwarî na bantû a kwaigîîra njara na mîbuanaano ya cimba irûngi rûteere rwa bantû akwaigîîra njara mbarî cionthe cia gîtî. 20 I kwarî na mîbuanaano îkûmi na îîrî ya cimba ira ciarûngi mîthiani ya wa kîra nkinyo. Gîtî ta gîku gîtaaro kîrûthwa kîngî ta kîo ûneneeni nwa bûrîkû.
21 Ikombe bia mûnene Soromoni bionthe biarî bia thaabu, na into bionthe bia nyomba ya mûthitû wa Rebanoni biarî bia thaabu îra nkeembe. Fetha îtaataragwa îrî gîntû ntugûûni cia Soromoni. 22 Soromoni n'aarî na meeri inyingî ira ciathiiyaga mwanka Tarisisi amwe na meeri cia Iramu. Iita rîmwe nyuma ya mîanka îthatû meeri inu ciathiiyaga Tarisisi igacooka ikamatîîte thaabu, fetha, mîguongo, magûna na Tausi.
23 Kwoogu, mûnene Soromoni n'acindîîte anene bara bangî bonthe ba nthîgûrû na ûûme na ûtonga. 24 Antû bonthe ba nthîgûrû baathiiyaga kîrî Soromoni kûthikîîria ûûme bûra Ngai eekîrîîte nkorooni yake. 25 Wa kîra mwanka, bara baayaga i baareetaga biewa biingî: Into bia fetha na thaabu, na nguo, into bia ndûa na mîtaa, na mbaraathi na nyûmbû.
26 Soromoni eethuuranîra na nkaarî cia ndûa na mbaraathi. Aarî na nkaarî cia ndûa ngiri îmwe na magana mana na mbaraathi ngiri îkûmi na ciîrî. Aciaiga taûni ira nkaarî inu ciaigagwa, imwe cia cio aciaiga Njerusaremu akubî na mûnene. 27 Mûnene aatûma thaabu na fetha ciingîa ta maiga naagu Njerusaremu, na mîthithinda yaingîa ta mîkûyû ya Sepera.a 28 Mbaraathi ira Soromoni aarî nacio ciareeteetwe kuuma Miisiri na Kueb naara ciendeerue aringi biacaara ba mûnene. 29 Nkaarî cia ndûa ira baareetaga kuuma Miisiri, îmwe yaumaga sekeri magana mathanthatû cia fetha, mbaraathi îmwe n'yo îkarutîrwa sekeri îgana rîa mîrongo îtaano. Kinya ibendeerie anene bonthe ba Aiti wana anene ba Aramu mbaraathi na nkaarî cia mbaraathi cia ndûa.