Eekûrû ba Soromoni
11
1 Soromoni eenda aka ageni baingî, amwe na mwarî wa Faraû, aka Amoabu, na ba Amoni, na ba Endomu, Asindoni, na kinya ba nthî ya Aiti. 2 Baarî ba kuuma mîgongooni îra Mwathani eerîîte antû ba Isiraeri batikaagûrane nabo, n'ûntû ûmma bakaagarûra nkoro cia Aisiraeri bathiingate ngai ciao. Amwe na ûgu Soromoni eendana na aka babu. 3 Aarî na eekûrû magana mûgwanja, na aka ba kwaiga magana mathatû, na aka baba baake baagarûra nkoro yake. 4 N'ûntû rîra Soromoni aatuîkire muntû ûmûkûrû i baagarûrire nkoro yake aagonga ngai cingî, na nkoro yake îteerutanîrîîtie kîrî Mwathani Ngai wake, ta bûra ya îthe Ndaundi yeerutanîrîîtie. 5 Aathingatire Asitorethi ngai wa mûka wa Asindoni, na Mirikomua ngai wa Aamoni mwene ma ûthûûku. 6 Kwoogu, Soromoni aarûtha ûthûûku mbere ya Mwathani, na ataathingata Mwathani na nkoro yake yonthe, ta bûra îthe Ndaundi athiingatire.7 Rîru Soromoni aaka bantû aûkîîru a kûgongera Kemosi ngai wa Amoabu mwene ma ûthûûku, na Moreki ngai wa Aamoni mwene ma ûthûûku karîmaani rûteere rwa uumîîro bwa riûa bwa Njerusaremu. 8 Kinya n'akîîre aka baake ageni bonthe gûntû gwa kûgongera, kûra baabîîthagîria macoco na kûruta igongwana kîrî ngai ciao.
9 Na Mwathani aathûûra i Soromoni, n'ûntû nkoro yake n'yagarûkîîte yauma kîrî Mwathani Ngai wa Isiraeri, ûra aamuumîîrîîte maita maîrî, 10 na n'amûkaanîîtie îgûrû rîa ûntû bûbû. Aarî akûmwîra atikaathingate ngai ciingî, îndî ataathîkîra bûra Mwathani aamwathîîte. 11 Kwoogu, Mwathani eera Soromoni, “N'ûntû mama i mo maraarî mathûgaania maaku na ûtirathingata kîrîîkanîro gîakwa na mawatho maakwa mara nkwathîîte, ngagûtuunya ûnene na mbuneenkanîre kîrî ûmwe wa aniini baku. 12 Îndî woû n'ûntû bwa abaagu Ndaundi ntiirûtha ûgu ntugûûni ciaku, îndî nkabûruta njaraani cia mwana waku. 13 Îndî amwe na ûgu ntiithûkia ûnene bunthe. Ngaatigîra mwana waku mwîrîga ûmwe, n'ûntû bwa Ndaundi mûruti ngûgî wakwa na n'ûntû bwa Njerusaremu îra nthuurîîte.”
Anthû ba Soromoni
14 Rîru Mwathani aûkîîria mûnthû arûa na Soromoni, Andandi ûra Mûendomu aarî wa rûrîîyo rwa anene ba Endomu. 15 Mbereeni rîra Ndaundi aarûaga na Endomu, Njoabu mûnene wa njûûrî aacooka noogo kûthika bara baakuîte, Njoabu na njûûrî ya Isiraeri baûraga antû arûme bonthe ba Endomu. 16 N'ûntû Njoabu na Isiraeri yonthe baakarire noo mîeri îthanthatû, mwanka aûraga muntû mûrûme wonthe Endomu. 17 Îndî Andandi atoorokera Miisiri, barî na Aendomu bamwe bara baarî aruti ngûgî ba îthe. Andandi aarî mwana îgiita rîru. 18 Bauma Mindiani baathi Parani, na baathûkia antû kuuma Parani na baathiyania Miisiri, kîrî Faraû mûnene wa Miisiri, ûra eere Andandi nyomba, irio na kîthaka. 19 Na Mûnene Faraû aakena mûno n'Andandi amûneenkera mwaragina wa mwekûrû wake atuîka mwekûrû wake. Mwarî ûyu aarî mwaragina wa Tapanesi mwekûrû wa mûnene. 20 Amûciarîra kaana ga kaîyî geetagwa Ngenubathi, ûra Tapanesi aarereere nyomba ya Faraû amwe na aana ba Faraû.
21 Îndî rîra Andandi eegiirue arî Miisiri atî Ndaundi agûkua na Njoabu mûnene wa njûûrî n'akuîte, Andandi eera Faraû, “Ka nthi, kaingo ncooka nthîgûrû yetû.” 22 Faraû amûûria, “I mbi waaga aaga n'ûntû ûkwenda gûcooka nthîgûrû yenu?” Andandi acookia, “Gûtirî kîo, îndî tiga nthi!”
23 Kaîrî Ngai aûkîîria Soromoni mûnthû ûngî, Resoni mwana wa Erianda, ûra atoorokeete kuuma kîrî mûnene wake, Andandeseri mûnene wa Soba. 24 Eethîraniirie antû na aatuîka mûtongoria wa gîkundi kîa athûûkia nyuma ya Ndaundi kûbaûraga nyuma Ndaundi kûûraga antû ba soba. Baathi Ndamasiki na baatûûra noogo, na baatuîkithia Resoni mûnene wa Ndamasiki. 25 Aarî mûnthû wa Isiraeri ntugûûni cionthe cia Soromoni, akîrûthaga mantû maathûûku ta bûra Andandi aarûthaga. Resoni aatha nthî ya Aramu na aameneeria Isiraeri.
Njeroboamu aûmîria Soromoni kîongo
26 Na Njeroboamu mwana wa Nebati, Mûeburaimu wa kuuma Serenda, mûtongoria ûneneeni bwa Soromoni, ûra gina eetagwa Serua, ûra aarî ntigwa, kinya we aûmîrîa mûnene Soromoni kîongo. 27 Na gîkî i kîo gîatûmire aûmîrîa mûnene. Soromoni aakire Miro, na aacookeeria nthingo cia taûni ya îthe Ndaundi kûra kwomokeete. 28 Muntû ûyu Njeroboamu aarî ncamba, na rîra Soromoni oonire bûra mûthaka ûyu aarutaga ngûgî na wîru amûtuîkithia mûrûngamîîri wa aruti ngûgî cia taka bonthe ba mûciî wa Njosebu. 29 Na kagiitaani gaku, rîra Njeroboamu aumagarûkire Njerusaremu, kîroria Aiya wa kuuma Siro ûra eekîrîîte kabuuti kaimbia aakomana nwe njîraani. Baarî barî baîrî bonka naagu kîthakaani, 30 na Aiya aathûkia kabuuti gaku kaimbia eekîrîîte na agatembûraanga tûcuncî îkûmi na twîrî. 31 Rîru eera Njeroboamu, “Thûkia tûcuncî îkûmi i twaku, n'ûntû ûûgû i bu Mwathani Ngai wa Isiraeri akuuga, ‘Raitha, ngaatuunya Soromoni ûnene, na nkûneenkere mîîrîga îkûmi. 32 Îndî n'ûntû bwa mûruti ngûgî wakwa Ndaundi na Njerusaremu, mûciî ûra ndîîthuurîrîte kuuma mîîrîgaani yonthe ya Isiraeri, akeegua arî na mwîrîga ûmwe. 33 Nkaarûtha ûûgû n'ûntû i baantiganîrîîtie na baagonga Asitorethi ngai wa mûka wa Asindoni, Kemosi ngai wa Amoabu, na Mirikomu ngai wa Amoni. Batithiiyagîra njîraani ciakwa, kana barûtha bûra kûbatîîrue meethooni maakwa, kana baathîkîra mawatho maakwa ta Ndaundi, îthe wa Soromoni aambathîkîîre. 34 Îndî ntiituunya Soromoni ûnene bunthe, nkamwaiga arî mûnene ntugûûni cionthe cia ûtûûro bwake, n'ûntû bwa Ndaundi mûruti ngûgî wakwa, ûra ndaathuurire na ûra aathîkîîre maathana na mawatho maakwa. 35 Nkaathûkia ûnene kuuma njaraani cia mwana wake na nkûneenkere mîîrîga îkûmi. 36 Ngaatigîra mwan'wake mwîrîga ûmwe kaingo Ndaundi mûruti ngûgî wakwa akeegua rîonthe arî na taa mbere yakwa Njerusaremu, mûciî ûra ndaathuurire wa kûgongagîrwa. 37 Ngagûtuîkithia mûnene wa Isiraeri na ûkaatha bonthe bara nkoro yaku îkeenda. 38 Îndî wegua ûkaathikîîria monthe mara ngaakwatha, na ûthiîre njîraani ciakwa, na ûrûthe bûra kûbatîîrue meethooni maakwa na njîra ya kwathîkîra mawatho na maathana maakwa, ta Ndaundi mûruti ngûgî wakwa bûra aarûthire, nkeegua ndî naawe, na ngakûrûthîra ûnene bûtakîthira, ta bûra ndaakîîre Ndaundi, na nkeeyana Isiraeri kîrî woû. 39 N'ûntû bwa gîtûmi gîkî ngaakaanûkia nciarwa cia Ndaundi, îndî ti tene na tene.’ ” 40 Soromoni aageria kûûraga Njeroboamu, îndî Njeroboamu aatoorokera Miisiri, kwa mûnene Sisaki, na aakara noogo mwanka Soromoni aakua.
Gûkua gwa Soromoni
(2Karaaya 9:29-31)
41 Ngûgî ira iingî cia Soromoni, na monthe mara aarûthire, na ûûme bwake, maandîkîîtwe îbukuuni rîa ngûgî cia Soromoni. 42 Kagiita kara Soromoni aathire Aisiraeri bonthe arî Njerusaremu kaarî mîanka mîrongo îna. 43 Soromoni aakua na aathikwa taûni ya îthe Ndaundi, na Reoboamu mwana wake aathana bantû aake.