Mîîrîga ya Isiraeri ya neegûrû yaûmîria mûnene Reoboamu kîongo
(2Karaaya 10:1-19)
12
1 Reoboamu aathi Sekemu, n'ûntû Aisiraeri bonthe ibaarî bakûthi noogo kûmûtuîkithia mûnene. 2 Na rîra Njeroboamu mwana wa Nebati eegiirue ûntû bûbu n'ûntû nwa aarî Miisiri, naara aatoorokereete auma kîrî Soromoni, Njeroboamu aacooka auma Miisiri. 3 Aisiraeri baatûmana Njeroboamu eetwa, n'we amwe na kîrîndî kîonthe gîa Isiraeri baathi kîrî Reoboamu bamwîra, 4 “Abaagu Soromoni n'aatûrutithiirie ngûgî indito. Ûkaaya kûûthia ngûgî ino na ûgatûma mîtûûrîre yetû yûtha, tûgagûtûmîkîra.” 5 Reoboamu nwe abeera, “Îthiini na bûcooke nyuma ya ntugû ithatû.” Kwoogu baathi.6 Rîru mûnene Reoboamu aaromba ûkûrû kîrî akûrû bara baatûmîkagîra îthe Soromoni rîra aarî mwoyo. Abaûria, “N'ata bûgûntaara ncookerie antû baba?” 7 Bamûcookeria bamwîra, “Ûkaaya kûrutîra antû baba ngûgî bwega îîndî na ûkabatûmîkîra na ûkaaria mîgambo îmîega rîra ûkûbacookeria, bagaatûûra barî aruti ngûgî baaku.” 8 Îndî Reoboamu aarega mataaro mara eerwe n'akûrû na aûria ûkûrû kuuma kîrî nthaka cia nthuke yake, ira ciamûtûmîkagîra. 9 Abaûria, “N'ata bûkûndoria mbîîre antû baba bakûmbîîra, ‘Tûûthîrie ngûgî ira abaagu aatwere?’ ”
10 Nthaka inu cia nthuke yake ciamwîra îra antû bara bagûkwîra ûbaûthîrie ngûgî ira ndito abaagu aabeere ûûgû, “Kaaraira gaakwa i kanene nkûrûki ya kauna ka baaba. 11 Baaba n'aabwere ngûgî indito, wana ga nkairitûithia nkûrûki. Aabûturire na ibooko, îndî niû nkaabûtura na ibooko birî na mîîgua.”
12 Nyuma ya ntugû ithatû Njeroboamu na antû bonthe baacooka kîrî Reoboamu, wa bûra aabeerîîte, “Bûcooke kîrî niû nyuma ya ntugû ithatû.” 13 Na mûnene abacookeria na mûthûûro, na aaregana na mataaro mara akûrû baamûtaarîîte. 14 Abacookeria kûringana na mataaro ma aana bara ba nthaka, abeera, “Baaba n'aabûrutithiirie ngûgî indito, îndî niû ga nkaabûrutithia indito nkûrûki. Aabûturaga na ibooko, îndî niû nkaabûtura na ibooko birî na mîîgua.” 15 Kwoogu, mûnene ataathikîîria antû babu, n'ûntû i Mwathani aatûmire ûntû bûbu bûtuîkîka kaingo aûyûria mûgambo wake, ûra eerire Njeroboamu mwana wa Nebati gûkûrûkîîra Aiya ûra wa kuuma Siro.
16 Rîra Isiraeri yonthe yonire atî mûnene atikûbathikîîria, bamûûria,
“Î rîo rî, i rûgai rûbi tûrî naru rwa Ndaundi,
I baita mbi twonaga kuuma kîrî mwana wa Njesii?
Cookaani mîciî yenu, biû Isiraeri!
Îîndî Ndaundi, cûûbîra mûciî waku woû wengwa.”
Kwoogu, Isiraeri bauma agu baathi mîciî yao. 17 Îndî Reoboamu aatigwa akîathaga antû ba Isiraeri bara baatwîre taûni cia Njunda.
18 Rîru mûnene Reoboamu aatûma Andoramu, ûra aarî mûrûngamîîri wa aruti ngûgî cia taka, na Isiraeri bonthe bamûringanga na maiga mwanka aakua. Îndî mûnene Reoboamu augia aatwa nkaarî yake ya ndûa, aatoorookera Njerusaremu. 19 Kwoogu, Isiraeri îtûûraga îregeete mantû ma kwathwa i nciarwa cia Ndaundi mwanka îmunthî.
20 Na rîra Isiraeri bonthe beegiirue atî Njeroboamu agûcooka, baatûmana eetwa kîûthûranooni na bamûtuîkithia mûnene wa Isiraeri yonthe. Gûtirî we aathingata nyomba ya Ndaundi, tatiga mwîrîga wa Njunda gunka.
21 Rîra Reoboamu aakinyire Njerusaremu, eethîrania antû ba mwîrîga wa Njunda unthe, na ba mwîrîga wa Benjameni, bara baarî ncamba cia ndûa. Baarî antû ngiri îgana na mîrongo înaana, bara baathuurîîtwe ba kûrûa na nyomba ya Isiraeri, kaingo bacookanîîria ûnene bwa Reoboamu mwana wa Soromoni. 22 Îndî Ngai eera Semaya mûruti ngûgî wa Ngai 23 eere Reoboamu mwana wa Soromoni, mûnene wa Njunda, na antû bonthe ba mwîrîga wa Njunda na Benjameni, na antû bara bangî atarî, 24 “Mwathani ariuga ûûgû, ‘Ûtikaathi kûrûa na aruanyûkwe antû ba Isiraeri. Wa muntû nacooke mûciî wake, n'ûntû i niû ndaatûmire mantû mamu makarîka.’ ” Kwoogu baathîkîra mûgambo wa Mwathani, na baacooka mûciî kaîrî, kûringana na mûgambo wa Mwathani.
Njeroboamu aatiganîria Mwathani
25 Njeroboamu aaka Sekemu irîmaani bia Eburaimu, na baatûûra ku. Rîru aumagarûka kuuma agu na aaka Penueri. 26 Njeroboamu eebîîra nkorooni yake, “Îîndî wathani bwa nthîgûrû yonthe bûgaacooka mûciî wa Ndaundi. 27 Wegua antû baba bakaathi na mbere kûruta igongwana Nyomba ya Mwathani wao Njerusaremu, nkoro cia antû baba ikaagarûkîra mwathi wao, Reoboamu mûnene wa Njunda. Nabo bakaambûraga na bacooke kîrî Reoboamu mûnene wa Njunda.” 28 Nyuma ya kûûria ûkûrû, mûnene aarûtha tûyaû twîrî twa thaabu. Na eera antû, “Kûthi Njerusaremu i ngûgî îmbûmo mûno. Niino ngai cienu aaga, biû Isiraeri, ira ciabûrutire ûkombooni nthîgûrû ya Miisiri.” 29 Na aiga îmwe taûni ya Betheri, na îra îngî aiga taûni ya Ndani. 30 Na ûntû bûbû bwatuîka wîyia, n'ûntû antû baathiiyaga kûgonga îra yarî Betheri na kûgonga îra îngî yarî Ndani. 31 Kinya aaka gûntû gûûkîîru gwa kûgongerwa na aathuura athînjîri ba ngai inu kuuma mîciî îra îtaarî ya mwîrîga wa Arawi. 32 Na Njeroboamu aabaanga atî kwîgague kûrî na kîatho gîa tûganda ntugû ya îkûmi na itaano ya mweri wa înaana, ta kîra kîarî Njunda, na aarutîra igongwana kîthînjîrooni. Aarûthire ûûgû Betheri, akîrutîra tûyaû tûra aarûthîîte na kinya aiga athînjîri ba ngai inu gûntû kûra gûûkîîru aarûthîîte. 33 Ntugû ya îkûmi na itaano mweri wa înaana, mweri ûra aabangîîte na nkoro yake eetia mwanka kîthînjîrooni kîra aarûthîîte Betheri. Aatuîkithia ntugû înu ya gûkûngwagîîrwa n'antû ba Isiraeri, na aathi kîthînjîrooni kûbîîthia macoco.