1 Anene 13

Kîroria gîa kuuma Njunda gîakaania Njeroboamu

1 Ntugû îmwe, mûruti ngûgî wa Ngai naumire Njunda aathi Betheri arî mûtûme i Ngai. Kagiita gaku, Njeroboamu aarûngi akubî na kîthînjîro abîîthia macoco. 2 Na muntû ûyu augîîria arî agu kîthînjîrooni mîgambo îra Mwathani aamûtûmîîte n'yo akiugaga, “Woû kîthînjîro, kîthînjîro, Mwathani ariuga ûûgû, ‘Raitha, mwana agaaciarwa mûciî wa Ndaundi, ageetwa Njosia. N'we akaûragîra athînjîri ba gûntû kûra gûûkîîru, bara babîîthagîria macoco îgûrû rîaku, na mîîndî ya antû babu îkaabîîthîrua îgûrû rîaku.’ ” 3 Eeyana kîonanîîria ntugû wenu, auga, “Gîkî i kîo kîonanîîria kîra Mwathani akoonania, ‘Raitha, kîthînjîro gîkî gîkoomboranua, na muu ûra ûrî îgûrû rîakîo ûgeetîga.’ ” 4 Na rîra mûnene Njeroboamu eegiirue biugo bira mûruti ngûgî ûyu wa Ngai augîîrie arî kîthînjîrooni Betheri, Njeroboamu aatambûrûkia njara yake arî agu kîthînjîrooni gîku auga, “Mûgwateeni.” Njara yake, îra aamworoteete n'yo, yaûmagara, nwe ataûmba kûmîcookia. 5 Kîthînjîro kîombokana, na muu wetîga kuuma kîthînjîrooni, kûringana na kîoneeria kîra mûruti ngûgî ûyu wa Ngai aarî kweyana gûkûrûkîîra mûgambo wa Mwathani. 6 Mûnene eera mûruti ngûgî ûyu wa Ngai, “Nthaithanîra kîrî Mwathani Ngai waku, na Ûndombere, kaingo njara yakwa îcooka bûra îgûkari.” Muntû wa Ngai nwe aathaitha Mwathani, na njara ya mûnene yaacookanîîrua, yaakara wa bûra îgûkari mbere. 7 Mûnene eera mûruti ngûgî ûyu wa Ngai, “Ncû tûthi mûciî wone gantû ga kûrûma, na nkûe kîewa.” 8 Îndî mûruti ngûgî ûyu wa Ngai eera mûnene, “Wana ûgampa nucu ya ûtonga bwaku, ntiithi naawe, kana ndîa mûgaate kana nyua rûûyî aaga. 9 N'ûntû mbathîîtwe i Mwathani ambîîra ata rî, ‘Ûtikaarîe kana ûnyua nwa mbi kana ûcooka na njîra îra gûûyire.’ ” 10 Kwoogu aathi na njîra îîngî, na ataacooka na njîra îra aayîîte n'yo Betheri.

11 Kagiitaani gaku i kwarî na kîroria gîîkûrû gîatûûraga Betheri, ûra aana baake baayire bamwîra monthe mara mûruti ngûgî wa Ngai aarûthîîte naagu ntugû înu. Kinya beera îthe bûra kîerîîte mûnene. 12 Îthe abaûria, “Athiire njîra îrîkû?” Aana baake bamwonia njîra îra mûruti ngûgî wa Ngai kuuma Njunda aarî akûthi. 13 Eera aana baake, “Ntandîkîraani îng'ooi.” Kwoogu bamûtaandîkîra rîo aatwa. 14 Aathingata mûruti ngûgî wa Ngai, na amwîthîra akari nthî ruungu rwa mûpuru, amûûria, “I woû muntû wa Ngai ûra aumîîte Njunda?” Amûcookia, “Yîî i niû.” 15 Rîru amwîra, “Ncû tûthi mûciî ûkarîe.” 16 Muntû ûyu wa Ngai amwîra, “Nticooka tûthi naawe, kana ndîa kana nyua naawe gûntû gûkû. 17 Mbathîîtwe i Mwathani ambîîra atarî, ‘Ûtikaarîe kana ûnyua naagu kana ûcooka na njîra îra gûûyire.’ ”

18 Kîroria gîku gîkûrû kîamûcookia, “Kinya n'yû ndî kîroria ta woû. Na Mwathani atûmire mûraîka ambîîra, ‘Mûcookie mûciî waku kaingo arîa na anyua.’ ” Îndî ka aamwenagîîria. 19 Kwoogu muntû wa Ngai baacooka na kîroria gîku na aarîa na aanyua mûciî wake. 20 Na bakari meethaani, kiugo kîa Mwathani kîayîîra kîroria kîra kîamûcookeetie nyuma. 21 Kîaugîîria mûruti ngûgî wa Ngai ûra aumîîte Njunda, kîauga, “Mwathani ariuga n'ûntû ûtiraathîkîra mûgambo wa Mwathani, na ûtirathiingata yathana rîra Mwathani Ngai waku akwathire, 22 îndî ga ûcookire, warîa na wanyua gûntû kûra akwîrire, ‘Ûtikaarîe kana ûnyua,’ mwîrî waku ûtiithikwa nthikooni ya ba abaagu.” 23 Muntû wa Ngai akûrîîkia kûrîa na kûnyua, kîroria kîra kîarî kûmûcookia nyuma kîamûtaandîkîra îng'ooi. 24 Arî njîraani athiîte, cimba yaakomana nwe barabaraani na yamûûraga. Mwîrî wake wateegwa barabaraani, cimba na îng'ooi ciarûgama rûteere rwa uu. 25 Antû bamwe bakûrûkîîte boona mwîrî ûgereetwe agu, na cimba îra îrûngi rûteere rwa uu, na baathi bauga mantû mamu taûni îra kîroria gîku gîkûrû gîatwîre.

26 Na rîra kîroria gîku gîkûrû kîra kîamûcookiirie nyuma kuuma njîraani kîegiirue ûntû bûbu kîauga, “I mûruti ngûgî ûra wa Ngai, ûra aregire kwathîkîra mûgambo wa Mwathani, kwoogu îîndî Mwathani akûmweyana kîrî cimba yamûtembûraanga na yamûûraga, kûringana na mûgambo ûra Ngai aamwîrire.” 27 Eera aana baake, “Ntandîkîraani îng'ooi.” Nabo bamûtaandîkîra. 28 Aathi eethîra mwîrî wake ûgereetwe barabaraani, na îng'ooi na cimba irûngi rûteere rwa uu. Cimba înu îtaarûmîîte mwîrî ûyu kana îtembûraanga îng'ooi. 29 Kîroria kîra gîkûrû kîathûkia mwîrî ûra wa mûruti ngûgî wa Ngai gîacuaigîîra îgûrû rîa îng'ooi, na gîaucookia taûni yake kûmûrîrîra na kîamûthika. 30 Kîamûthikire nthikooni yake wengwa, na bamûrîrîra bakiugaga, “Îî, mûruayia!” 31 Na nyuma ya kûmûthika, eera aana baake, “Rîra ngaakua, bûnthike nthikooni îra mûruti ngûgî wa Ngai athikîîtwe, bûmaamie mîîndî yakwa rûteere rwa mîîndî yake. 32 N'ûntû mîgambo îra aariirie kuuma kîrî Mwathani îgûrû rîa kîthînjîro kîra kîrî Betheri, na îgûrû rîa gûntû kunthe kûra gûûkîîru wa kûgongera kûra kûrî ntûûra cia Samaria, ûmma îkaûyûra.”

33 Kinya nyuma ya ûgu, Njeroboamu ataagarûra mîthiîre yake îmîthûûku, îndî ka aathuurire athînjîri ba gûntû kûra gûûkîîru kaîrî kuuma kîrî antû ba mîthemba yonthe. Wonthe ûra eendaga gûtuîka mûthînjîri aamûtheragia agatuîka wa athînjîri ba gûntû kûra gûûkîîru. 34 Ûntû bûbû bwatuîka wîyia kîrî mûciî wa Njeroboamu, bûra bwareetire kûthira kwa uu kuuma nthîgûrû.