Ûroria bwa Aiya îgûrû rîa Njeroboamu
14
1 Kagiitaani gaku Abiya mwana wa Njeroboamu aayua. 2 Njeroboamu eera mwekûrû wake, “Îthi wîgarûre, kaingo ûtakîmenyeka kana ûrî mwekûrû wakwa, na ûthi Siro. Kîroria Aiya, ûra aambîîrire ngaatuîka mûnene wa antû baba arî noogo. 3 Mwirîre mîgaate îkûmi, keki inkai na gîempe gîa ûkî. Agakwîra bûra mwana wetû agaakara.” 4 Kwoogu mwekûrû wa Njeroboamu aarûtha ûgu eerirwe na aathi mûciî wa Aiya Siro.Îîndî Aiya ataûmbaga kwona, n'ûntû meetho maake i maarî makûûra n'ûntû bwa ûkûrû. 5 Îndî Mwathani naarî kwîra Aiya, “Mwekûrû wa Njeroboamu n'ayîîte gûkûûria mantû ma mwana wake, n'ûntû nûmwayie, na ûkaamûcookia ûûgû ngûkwîra. Rîra agaakinya, ageetuîkithia muntû ûngî.”
6 Kwoogu rîra Aiya eegiirue muugio wa mbayo mûrangooni, auga, “Thûngîra, mwekûrû wa Njeroboamu. I kwambi kwîrûtha gûkû? Iintûmîîtwe kîrî woû na ntûmwa înthûûku. 7 Îthi wîre Njeroboamu ûûgû i bu Mwathani, Ngai wa Isiraeri akuuga, ‘I ndaagûûkîîrie kuuma gatîgatî ga antû na ndagûtuîkithia mûtongoria wa antû baakwa ba Isiraeri. 8 Ndaatuunyanire ûnene kuuma mûciî wa Ndaundi na ndakûnenkera, îndî ûtaakara ta mûruti ngûgî wakwa Ndaundi, ûra aigire maathana maakwa na aanthiingata na nkoro yake yonthe, akîrûthaga bûra akî kûbatîîrue meethooni maakwa. 9 Ûrûthîîte moothûûku maingî nkûrûki ya bara baathanaga mbere yaku. Werûthîra ngai ciingî, mîbuanaano îrûthîîtwe na cuuma, wanthûûria n'ûntû bwa kûûmbûndûkîria mûgongo.
10 “‘N'ûntû bwa ûûgû, nkaareeta thîîna mûciî wa Njeroboamu, na nkaûraga muntû mûrûme wonthe kuuma kwa Njeroboamu, nkombo kana atarî nkombo baume Isiraeri. Nkaathiria mûciî wa Njeroboamu, ta bûra muntû abîîthagia thaamu, mwanka îkathira buru. 11 Muntû wa kwa Njeroboamu wonthe ûra agaakuîra taûni akaarîîgwa i kurû, na ûra wonthe agaakuîra kîthakaani akaarîîgwa i nyoni. I Mwathani auga bu.’ ”
12 Rîru Aiya eera mwekûrû wa Njeroboamu, “Ûkîîra, ûthi mûciî waku. Rîra magûrû maaku magaakinya ntûûra ûgu, mwana waku agaakua. 13 Na Isiraeri yonthe îkamûrîrîra, na bamûthike. Nwe wenka wa mûciî wa Njeroboamu akaathikwa, n'ûntû ndeeni yake ikwonekeete gîntû gîgûkenia Mwathani, Ngai wa Isiraeri, ndeeni ya mûciî wa Njeroboamu. 14 Nkûrûki Mwathani akeethuurîra mûnene wa Isiraeri ûra akaathiria nyomba ya Njeroboamu îmunthî rîrî, na kinya kwanjîîria îîndî. 15 Na Mwathani akaaringa Isiraeri, bakare ta bûra rûthanje rwinainagua rûûyîîni, na amîkûûre kuuma nthîgûrû îno mbega îra aapeere biûyûûyû, na abanyagaarie rûgongo rwa muuro wa Yufîrîti, n'ûntû ibeerûthîîre itugî bia ngai Asera, baathûûria Mwathani. 16 Mwathani agaatiga Isiraeri n'ûntû bwa meeyia ma Njeroboamu, mara eeyiirie na mara aatûmire Isiraeri îrûtha.”
17 Rîru mwekûrû wa Njeroboamu aûkîîra, na aathi, na aakinya Tirisa. Na agûkinya rwaraani rwa kûbûûrîra rwa mûciî, mwana aakua. 18 Isiraeri yonthe yamûthika na yamûrîrîra, kûringana na mûgambo wa Mwathani, ûra aariirie gûkûrûkîîra mûruti ngûgî wake kîroria Aiya.
19 Ngûgî ira ingî cia Njeroboamu, bûra aarûaga na bûra aathanaga, ciandîkîîtwe îbukuuni rîa mûririkana rîa Anene ba Isiraeri. 20 Kagiita kara aathanire i mîanka mîrongo îîrî na îîrî, na aakua. Nandabu mwana wake aathana bantû aake.
Reoboamu mûnene wa Njunda
(2Karaaya 11:5-12:15)
21 Îgiitaani warîru, Reoboamu mwana wa Soromoni aarî mûnene wa Njunda. Akîambîîria kwathana aarî na ûkûrû bwa mîanka mîrongo îna na ûmwe, na aathana arî Njerusaremu mîanka îkûmi na mûgwanja, taûni îra Mwathani aathuurîîte kaingo agongagîrwa ku kuuma mîîrîgaani yonthe ya Isiraeri. Gina eetagwa Naama wa kuuma Amoni. 22 Na antû ba Njunda baarûtha ûthûûku mbere ya Mwathani, na baatûma eegua mûthûûro na rûriitho i meeyia maao mara baarûthîîte, nkûrûki ya monthe mara biûyûûyû biao biarûthîîte. 23 N'ûntû ibeebakîrîîte kinya gûntû gûûkîîru, na maiga ma kûgonga, na itugî bia ngai Asera îgûrû rîa wa kîra karîma kaaraaya na ruungu rwa wa kîra mûtî ûmûnene. 24 I kwarî na kinya marwaya ma antû arûme nthîgûrû înu. Baarûtha moothûûku monthe ma mîgongo îra Mwathani eengatiirie mbere ya antû ba Isiraeri.
25 Mwankaani wa îtaano wa mûnene Reoboamu, Sisaki mûnene wa Miisiri aithûkîra Njerusaremu. 26 Aathûkia igîîna bia Nyomba ya Mwathani na igîîna bia nyomba ya mûnene. Aathi na kîra gîntû. Aathûkia kinya rong'o cia thaabu ira Soromoni aarûthîîte, 27 na bantû acio mûnene Reoboamu aarûtha rong'o cia rûthuku, na acieyana kîrî mûnene wa akaria, bara baakaragia mwîrîga wa nyomba ya mûnene. 28 Na wegua warîra mûnene aathûngagîra Nyomba ya Mwathani, akaria babu baacikamataga na nyuma yoogu bagaicookia nyomba ya mathaga ma ndûa.
29 Ngûgî ira ingî cia Reoboamu, na monthe mara aarûthire, maandîkîîtwe îbukuuni rîa mûririkana rîa anene ba Njunda. 30 Na i kwarî na ndûa gatîgatî ka Reoboamu na Njeroboamu rîonthe. 31 Na Reoboamu aakua na aathikwa amwe na biûyûûyû taûni ya Ndaundi. Gina eetagwa Naama wa kuuma Amoni. Na Abiyamu mwana wake aathana bantû aake.