Abiya mûnene wa Njunda
(2Karaaya 13:1-14:1)
15
1 Mwankaani wa îkûmi na înaana wa wathani bwa Njeroboamu mwana wa Nebati, Abiyamu aatuîka mûnene wa Njunda. 2 Aathana mîanka îthatû arî Njerusaremu. Gina eetagwa Maaka, mwarî wa Abusaromu. 3 Nwe aarûtha meeyia monthe mara îthe aarûthire akîonaga. Nkoro yake îtaagîrîîte kîrî Mwathani Ngai wake, ta nkoro ya kîûyûûyû gîake Ndaundi. 4 Îndî amwe na ûgu n'ûntû bwa Ndaundi, Mwathani Ngai wake, aapa Abiya taa gûku Njerusaremu, na njîra ya kûneneyia mwana wake aathana bantû ake, na kûrûngîka Njerusaremu. 5 Ndaundi aarûthire bûra kûbatîîrue mbere ya Mwathani, na ataarega kûrûtha ûntû nwa bûrîkû bûra aamwathîîte ntugûûni cionthe cia ûtûûro bwake, tatiga ûntûûni bwa Uria ûra Mûiti. 6 Na i kwarî na ndûa gatîgatî ka Reoboamu na Njeroboamu* ûtûûrooni bwa Abiya bunthe. 7 Ngûgî ira ingî cia Abiya, na monthe mara aarûthire, i maandîkîîtwe îbukuuni rîa mûririkana rîa anene ba Njunda. Na i kwarî na ndûa rîonthe gatîgatî ka Abiyamu na Njeroboamu. 8 Abiyamu aakua na aathikwa Taûni ya Ndaundi. Na Asa mwana wake aatuîka mûnene bantû aake.Asa mûnene wa Njunda
(2Karaaya 15:16-16:6)
9 Mwankaani wa mîrongo îîrî wa Njeroboamu mûnene wa Isiraeri, Asa aambîîria kwathana Njunda, 10 na aathana arî Njerusaremu mîanka mîrongo îna na ûmwe. Ûyûûe eetagwa Maaka mwarî wa Abusaromu. 11 Asa aarûtha bûra kûbatîîrue mbere ya Mwathani, ta bûra kîûyûûyû gîake Ndaundi aarûthîîte. 12 Eengatia marwaya ma arûme mara maakaraga gûntû wa kûgongera bauma nthîgûrû înu, na aaruta mîbuanaano îra yonthe biûyûûyû biake biarûthîîte. 13 Na kinya ûyûûe Maaka, amûruta kaanyaani gaake kwîgua arî mûnene wa mûka n'ûntû naarûthîîte gîtugî kîa ngai Asera ûntû bwarî na mûgiro mbere ya Mwathani, na mûnene Asa aagiitanga mûbuanaano ûyu wake acubîîthîria kîbondeeni gîa Kindironi. 14 Îndî ataaruta gûntû kûra gûûkîîru wa kûgongera ngai cia ûrongo. Amwe na ûgu nkoro ya Asa nîagîrîîte mbere ya Mwathani ûtûûrooni bwake bunthe. 15 Aacookia thaabu na fetha na into bira we na îthe baathûrîrîîte Ngai.
16 Na i kwarî na ndûa gatîgatî ga Asa na Baasa mûnene wa Isiraeri ntugûûni ciao cionthe. 17 Baasa mûnene wa Isiraeri eetia kwithûkîra Njunda, na aaka Rama, kaingo ateetîgîîria muntû nwa ûmwe auma kana athûngîra nthîgûrû ya Asa mûnene wa Njunda. 18 Rîru Asa aathûkia thaabu cionthe na fetha ira ciatigeere igîînaani bia Nyomba ya Mwathani na igîînaani bia nyomba yake, na abinenkanîra kîrî aruti ngûgî baake. Mûnene Asa abitûmanîra kîrî mûnene wa Aramu Mbeni-Andandi mwana wa Tabirimoni, mwana wa Esioni, ûra aathanaga arî Ndamasiki, auga, 19 “Ga kwîthîrwe kûrî na ngwatanîro gatîgatî gaakwa na woû, ta bûra kwarî gatîgatî ka baaba na abaagu. Raitha, ngûgûtûmanîîra kîewa kîa thaabu na fetha, îthi uune kîrîîkanîro gîaku na Baasa mûnene wa Isiraeri, kaingo atigana naani.”
20 Na Mbeni-Andandi eegua bûra mûnene Asa aamwîrire, aatûmana atongoria ba njûûrî yake ya ndûa baithûkîra ntûûra cia Isiraeri, na baatura Iyoni, Ndani, Abeeri-Bethi-Maaka na Kinerethi yonthe amwe na nthî ya Nabutarî yonthe. 21 Na rîra Baasa eegiirue ûgu, aatiga gwaka Rama, aathi gûtûûra Tirisa. 22 Rîru mûnene Asa aatûmîîria Njunda yonthe, akiugaga antû bonthe gûtarî nwa ûmwe agûtigwa, bathi bagakamate maiga ma gûku Rama na mbaaû cia ku, ira Baasa aakaga nacio. Mûnene Asa aaka nabio taûni ya Ngeba naagu Benjameni na Misipa. 23 Ngûgî ira ingî cionthe cia Asa, inya yake yonthe, na monthe mara aarûthire, na taûni ira aakire, maandîkîîtwe îbukuuni rîa mûririkana rîa anene ba Njunda. Îndî agûkûra n'ayiirue magûrû. 24 Asa aakua, na aathikwa amwe na biûyûûyû biake ntûûraani ya kîûyûûyû gîake Ndaundi, na mwana wake Njeosafati aathana bantû aake.
Nandabu mûnene wa Isiraeri
25 Nandabu mwana wa Njeroboamu aanjîîria kwatha Isiraeri mwankaani wa îîrî wa Asa mûnene wa Njunda, na aatha Isiraeri mîanka îîrî. 26 Aarûtha ûthûûku mbere ya Mwathani, aathingata mîthiîre ya îthe, na wîyia bwake bûra bwatûmire Aisiraeri beeyia.
27 Baasa mwana wa Aiya, wa mûciî wa Isakaari, amûbîîndîra njûri, na amûûragîra Ngibethoni, taûni ya Afirisiti, n'ûntû Nandabu na Isiraeri yonthe i baathiûrûkîrîîte Ngibethoni. 28 Kwoogu Baasa aûraga Nandabu mwankaani wa îthatû wa Asa mûnene wa Njunda, na aathana bantû aake. 29 Na warîo agûtuîka mûnene, aathiria mûciî wa Njeroboamu unthe. Gûtirî nwa ûmwe aatigara akiinagia gûtû wa mûciî wa Njeroboamu, mwanka acuthiria, kûringana na kiugo kîa Mwathani kîra aariirie gûkûrûkîîra mûruti ngûgî wake Aiya ûra wa kuuma Siro. 30 Ûgu bwakarîkire n'ûntû bwa meeyia ma Njeroboamu mara eeyiirie na mara aatûmire Isiraeri îîyia, na bûbu bwathûûria Mwathani Ngai wa Isiraeri.
31 Îîndî ngûgî ira ingî cia Nandabu, na monthe mara aarûthire, maandîkîîtwe îbukuuni rîa mûririkana rîa anene ba Isiraeri. 32 Na i kwarî na ndûa gatîgatî ka Asa mûnene wa Njunda na Baasa mûnene wa Isiraeri ntugûûni ciao cionthe.
Baasa mûnene wa Isiraeri