1 Anene 16

1 Mwathani aatûma kîroria Njeû mwana wa Anani kîrî Baasa, na ntûmwa îno, 2 “Ndaagûûkîîrie kuuma tîîriini na ndagûtuîkithia mûtongoria wa antû baakwa Isiraeri, îndî naawe wathi na mîthiîre ya Njeroboamu, na waatûma antû baakwa Isiraeri beeyia, baatûma nthûûra i meeyia maao. 3 Raitha, ngakûthiria woû Baasa na mûciî waku, na nkaarûtha mûciî waku ta mûciî wa Njeroboamu mwana wa Nebati. 4 Muntû wonthe wa kwa Baasa ûra agaakuîra ntûûraani akaarîîgwa i kurû, na ûra agaakuîra kîthakaani akaarîîgwa i nyoni.” 5 Ngûgî ira ingî cia Baasa, na bûra aarûthire, na inya yake, maandîkîîtwe îbukuuni rîa mûririkana rîa anene ba Isiraeri. 6 Na Baasa aakua, na aathikwa Tirisa, na Era mwana wake aathana bantû aake.

7 Mwathani aatûmîîte kîroria Njeû mwana wa Anani na ntûmwa îgûrû rîa Baasa na mûciî wake, n'ûntû bwa ûthûûku bûra bunthe aarûthire mbere ya Mwathani. Aatûma athûûra n'ûntû bwa ngûgî ciake inthûûku, i kûbuanaana na cia mûciî wa Njeroboamu, na kinya n'ûntû bwa kûthiria mûciî ûyu wa Njeroboamu.

Era mûnene wa Isiraeri

8 Mwankaani wa mîrongo îîrî na îthanthatû wa Asa mûnene wa Njunda, Era mwana wa Baasa aanjîîria kwathana Isiraeri naagu Tirisa, aathana mîanka îîrî. 9 Îndî mûruti ngûgî wake Simuri, mûtongoria wa nucu ya nkaarî ciake cia ndûa, amûbîîndîra njûri. Rîra Era aarî Tirisa, akînyuunyaga arî nyomba ya Arisa, ûra aamenyagîîra nyomba ya mûnene naagu Tirisa, 10 Simuri aathûngîra amûringa na amûûraga. Simuri aarûthire ûûgû mwankaani wa mîrongo îîrî na mûgwanja wa Asa mûnene wa Njunda, na aathana bantû a mûnene Era.

11 Na watuîkîka, rîra aanjîîrie kwathana, agûkarîra gîtî gîake kîa ûnene ûgu, aathiria mûciî wa Baasa unthe. Ataamûtigîra muntû mûrûme nwa ûmwe wa ndûgû ciake kana acoore baake. 12 Kwoogu Simuri aathiria mûciî wa Baasa unthe, kûringana na mûgambo wa Mwathani, ûra aariirie îgûrû rîa Baasa gûkûrûkîîra kîroria Njeû. 13 Ûûgû bwakarîkire n'ûntû bwa meeyia monthe ma Baasa na meeyia ma Era mwana wake mara beeyiirie, na mara baatûmire Isiraeri îîyia, baathûûria Mwathani Ngai wa Isiraeri n'ûntû bwa ngai ciao cia mîbuanaano. 14 Ngûgî ira ingî cia Era, na monthe mara aarûthire, maandîkîîtwe îbukuuni rîa mûririkana rîa Anene ba Isiraeri.

Simuri mûnene wa Isiraeri

15 Mwankaani wa mîrongo îîrî na mûgwanja wa Asa mûnene wa Njunda, Simuri aathana kagiita ga ntugû mûgwanja Tirisa. Îgiitaani rîru njûûrî iciethîranîîte itura Ngibethoni, îra yarî taûni ya Afirisiti, 16 na njûûrî inu ciethîreene ciegua gûkiugwa, “Simuri nabîndîîte njûri, na aûraga mûnene.” Kwoogu Isiraeri yonthe yaatuîkithia Omuri, ûra aarî mûtongoria wa njûûrî, mûnene wa Isiraeri ntugû wenu barî kambîîni. 17 Kwoogu Omuri eetia kuuma Ngibethoni, arî na Isiraeri yonthe, na baathiûrûûkîra Tirisa. 18 Na rîra Simuri oonire atî taûni îkûthûkua, aathûngîra kanyomba ka îgûrû, na aabîîthia nyomba ya mûnene aabîîra ku, na aakua. 19 Ûûgû gwakarîkire n'ûntû bwa meeyia mara aarûthire, aarûtha ûthûûku mbere ya Mwathani, aathingata mîthiîre ya Njeroboamu, na n'ûntû bwa wîyia bwake bûra aarûthire, aatûma Isiraeri îîyia. 20 Na ngûgî ira ingî cia Simuri, na njûri îra aabîndîîte, i maandîkîîtwe îbukuuni rîa mûririkana rîa anene ba Isiraeri.

Omuri mûnene wa Isiraeri

21 Rîru antû ba Isiraeri baagaanua ikundi biîrî, nucu yabo yaathingata Tibini mwana wa Nginathi, bamûtuîkithia mûnene, na nucu îra îngî yaathingata Omuri. 22 Îndî antû bara baathingatire Omuri baacinda bara baathingatire Tibini mwana wa Nginathi, kwoogu Tibini aûragwa, na Omuri aatuîka mûnene. 23 Mwankaani wa mîrongo îthatû na ûmwe wa Asa mûnene wa Njunda, Omuri aanjîîria kwathana Isiraeri na aathana mîanka îkûmi na îîrî, mîanka îthanthatû aathana arî Tirisa. 24 Aagûrîra Semeri karîma ga Samaria na taranta ciîrî cia fetha, na aaka taûni îgûrû rîako. Amîîta Samaria, kuumania na riîtwa Semeri, ûra aarî mwene karîma gaku.

25 Omuri aarûtha ûthûûku mbere ya Mwathani, kinya nkûrûki ya bonthe bara baathanaga mbere yake. 26 Aathingatire mîtugo yonthe ya Njeroboamu mwana wa Nebati, na meeyiani mara aatûmire Isiraeri îîyia, baatûma Mwathani, Ngai wa Isiraeri, athûûra i ngai ciao cia mîbuanaano cia mana. 27 Nacio ngûgî ira ingî Omuri aarutire, na inya îra oonaniirie, i maandîkîîtwe îbukuuni rîa mûririkana wa anene ba Isiraeri. 28 Na Omuri aakua aathikwa ara biûyûûyû biake biathikirwe Samaria, na Aabu mwana wake aathana bantû aake.

Aabu mûnene wa Isiraeri

29 Mwankaani wa mîrongo îthatû na înaana wa Asa mûnene wa Njunda, Aabu ûra mwana wa Omuri anjîîria kwathana Isiraeri, aatha Isiraeri arî Samaria mîanka mîrongo îîrî na îîrî. 30 Na Aabu ûyu mwana wa Omuri aarûtha ûthûûku mbere ya Mwathani nkûrûki ya bonthe bara baathanaga mbere yake. 31 Na taka bwarî ûntû bûûthû kîrî we kûrûtha meeyia ma Njeroboamu mwana wa Nebati, aagûra Njesebeeri mwarî wa Ethibaari mûnene wa Asindoni, kwoogu anjîîria gûtûmîkîra Mbaari, na akîmûgoongaga. 32 Aakîra Mbaari nyomba ya kûgongerwa naagu Samaria na aaka kîthînjîro ndeeni. 33 Aabu aarûtha kinya gîtugî kîa ngai ya Asera na aarûtha mantû maingî ma kûthûûria Mwathani, Ngai wa Isiraeri, nkûrûki ya anene bonthe ba Isiraeri bara baathanîîte mbere yake. 34 Ntugûûni ciake, Ieri wa kuuma Betheri aaka Njeriko. Akîînja mûcingi mwana wake ûra mûkûrû Abiramu aakua, na agîaka mîîrîga yaayo ûra mûniini Segubu aakua kûringana na mûgambo wa Mwathani, ûra aarîîrie Njosua mwana wa Nuni.