Eriya aarerwa i nkûngûrû
17
1 Eriya Mûtisibi, wa kuuma Tisibi, bara baatûûraga barî ageni Ngiriandi, eera Aabu, “Wa ta bûra Mwathani Ngai wa Isiraeri atûûraga mwoyo, ûra ntûmîkagîra, gûtiîgua kûrî na maame kana mbura mîankaani îno, tatiga rîra nkauga.” 2 Na Mwathani eera Eriya, 3 “Uma aaga ûthi bwa rûteere rwa uumîîro bwa riûa, ûkeebithe akubî na kamuuro ga Kerithi, kara karî rûteere rwa mathwîro ma riûa ma Njorondani. 4 Ûkaanyua kuuma kamuurooni gaku, na i mbathîîte nkûngûrû ikûrere noogo.” 5 Kwoogu aathi aarûtha kûringana na kiugo kîa Mwathani, aathi aakara akubî na kamuuro gaku ga Kerithi kara karî rûteere rwa mathwîro ma riûa ma Njorondani. 6 Na nkûngûrû ikamûretagîra mûgaate na nyama rûkîîrî, na ûgoro, na akanyuunyaga rûûyî kuuma kamuurooni gaku. 7 Na nyuma ya kagiita kaganoona, kamuuro kara kaabwa, n'ûntû gûtaarî na mbura nthîgûrû înu.Eriya ariûkia kaana ka mwekûrû ntigwa
8 Mwathani eera Eriya, 9 “Ûkîîra ûthi Sarefathi, ntûûra îra îrî akubî na Sindoni, ûkare noo. I mbathîîte mwekûrû wa ntigwa wa noogo akûrere.” 10 Kwoogu aûkîîra na aathi Sarefathi, na rîra aakinyire mwîrîgaani wa ntûûra, eethîra mwekûrû akiunaga nkû. Amwîra, “Itû îthi ûndetere rûûyî nyue.” 11 Amûgîîrîrîîte rûûyî, amwîta amwîra, “Na ûndetere kamûgaate itû.” 12 N'we amwîra, “Ta bûra Mwathani Ngai waku atûûraga mwoyo, ntirî nwa mûgaate, tatiga kamûtî ka rwî karî kathiriini, na tûguta tûniini tûrî cûûbaani. Na îîndî ûgu, ga nkuuna tûkû, kaingo nthi nkaruga tûrîa na mwana wakwa na tweteere tûkue i yûûra.” 13 Na Eriya amwîra, “Ûtikaamake, îthi na ûrûthe ûgu wauga, îndî mbere ndugîra ga keki kaniini nako na ûndetere, na nyuma wîrugîre yaku na mwana waku. 14 N'ûntû Mwathani Ngai wa Isiraeri ariuga ûûgû, ‘Kîthiri gîku kîa mûtu gîtiithira mûtu, na cûûba ya maguta îtiinyigûka, mwanka ntugû îra Mwathani akaurithia mbura nthîgûrû.’ ” 15 N'we aathi arûtha wa bûra Eriya aamwîrîîte. Kwoogu we, Eriya, na mûciî wake, beegua barî na biakûrîa ntugû inyingî 16 n'ûntû kîthiri gîtaathira mûtu na nthaguta îtaanyigûka maguta, kûringana na kiugo kîa Mwathani kîra kîariirue n'Eriya.
17 Nyumaani mwana wa mwekûrû ûyu, mwene nyomba, aayua, na ndwari yake yaanenea, mwanka aakua. 18 Aûria Eriya, “I mbi îno wandûthîra ûûgû, woû mûruti ngûgî wa Ngai? Ûûyîîte kûûndirikania meeyia maakwa na ûtûma mwana wakwa akua?”
19 Na amwîra, “Mpa mwana waku.” Na amûthûkia kuuma njaraani ciake, na amûkamata eetia n'we kanyomba ka îgûrû, kûra aamaamaga, na amûmaamia gîtandaani gîake. 20 Rîru aarîrîra Mwathani, auga, “Îî Mwathani Ngai wakwa, ka wareeta thîîna kinya îgûrû rîa mwekûrû ntigwa ûra ndî mûgeni wake, waûraga mwana wake?” 21 Rîru eetambûrûkia îgûrû rîa mwana maita mathatû, na aarîrîra Mwathani, auga, “Îî Mwathani Ngai wakwa, ka mwoyo wa mwana ûyû ûmûcookere kaîrî.” 22 Mwathani eegua kayû ka Eriya, na mwoyo wa mwana wamûcookera kaîrî, na aariûka. 23 Eriya athûkia mwana ûyu, amûruta kanyomba gaku, amwîndamia gûku nyomba, amûneenkanîra kîrî gina. Eriya amwîra, “Raitha, mwana waku arî mwoyo.” 24 Na mwekûrû ûyu eera Eriya, “Îîndî nkûmenya ûrî mûruti ngûgî wa Ngai, na kiugo kîa Mwathani gîa kuuma kanyua gaaku ikia ûmma.”