Eriya aacooka kîrî mûnene Aabu
18
1 Nyuma ya ntugû inyingî kiugo kîa Mwathani kîayîîra Eriya, mwankaani wa îthatû, kuuma mbura îkûûra, “Îthi, wîbonanie kîrî mûnene Aabu, na nkaurithia mbura nthîgûrû.” 2 Kwoogu Eriya aathi kwîbonania kîrî Aabu. Kagiitaani gaku yûûra irîarî rîkwimba Samaria. 3 Na Aabu eeta Obandia, ûra aacûûbagîra nyomba ya mûnene. Obandia aarî muntû aatîîyaga Ngai mûno, 4 na îgiita rîra Njesebeeri aûragaga iroria bia Mwathani, Obandia aathûkîîtie iroria îgana abaitha makurunguuni maîrî, warîra îkurungu gîkundi gîa antû mîrongo îtaano îtaano, na akabieyaga biakûrîa na rûûyî. 5 Na Aabu eera Obandia ata rî, “Giitîîra nthî, ûkîraithaga ithimaani bionthe, na tuuro tunthe, twone kana tûkoona nyaki ya ndîîthia, twonokie mbaraathi na nyûmbû, tûtikaagîe acaara ya nyamû inu cionthe.” 6 Kwoogu baagaania nthî, kaingo bamîkûrûkîîra. Aabu aathi rûteere rûmwe, na Obandia aathi rûteere rûra rûngî.7 Obandia arî njîraani, Eriya akomana nwe. Obandia amûmenya, na eendamîîra mwanka ûthiû bwatonga nthî, na amûûria, “I woû mwathi wakwa Eriya?” 8 Nwe amûcookia, “I niû. Îthi wîre mwathi waku, ‘Raitha, Eriya arî aaga.’ ” 9 Obandia amûûria, “I meeyia mabi ndûthîîte, atî ûgampeeyana njaraani cia Aabu, aambûraga? 10 wa ta bûra Mwathani Ngai waku atûûraga mwoyo, gûtirî mûgongo kana ûnene mwathi wakwa atatûmanîîte ûcerua ku, na bauga ûtikwoneka, aanyuithagia ûnene bûbu kana mûgongo ûyu muuma, bakauga atî batikwoneete. 11 Na îîndî ûrîmbîîra atî nthi mbîîre mwathi wakwa atî Eriya arî aaga. 12 Na wendî ndauma aaga ûrî, Kîrundu wa Mwathani agagûkamata akwire gûntû ntaiyî, na kwoogu, rîra nkaathi mbîîre Aabu na aaye arege gûkwona, n'akambûraga, kinya wegua n'yû mûruti ngûgî waku ntûûraga ngoongaga Mwathani kuuma ûnyi bwakwa. 13 Mwathi wakwa ûteerwa bûra ndaarûthire rîra Njesebeeri aûragaga iroria bia Mwathani, bûra ndaithire iroria bia Mwathani îgana ikundi biîrî bia mîrongo îtaano, îtaano îkurunguuni, na ndabarera na irio na rûûyî? 14 Na îîndî ûriuga, nthi mbîîre mwathi waku, ûrî aaga. Ga akaambûraga.” 15 Na Eriya auga, “Ta bûra Mwathani wa Njûûrî atûûraga, ûra ntûmîkagîra, ûmma nkeebonania kîr'we îmunthî.” 16 Kwoogu Obandia aathi gûkomana na Aabu na amwîra. Rîru Aabu aathi gûkomana na Eriya.
17 Rîra Aabu oonire Eriya, amûûria, “I woû, mûthîînia wa Isiraeri?” 18 Nwe amûcookia amwîra, “Ntaathîînia Isiraeri. Woû na mûciî wa abaagu, i biû bûreeteete thîîna n'ûntû i bûtiganîrîîtie maathana ma Mwathani na bwagonga Mbaari. 19 Kwoogu îîndî tûmana na ûmbîthîranîrie Isiraeri yonthe kîrîmaani gîa Karimeri, na iroria magana mana ma mîrongo îtaano bia Mbaari na iroria magana mana bia Asera, bira bimenyagîîrwa i Njesebeeri.”
20 Kwoogu Aabu atûmana antû ba Isiraeri bonthe, na eethîrania iroria amwe kîrîmaani gîa Karimeri. 21 Eriya aaya aarûngama mbere ya antû bonthe, aûria, “I mwanka rî bûgaatûûra bûkîagaagaga bûthingatîîte njîra ciîrî? Wegua Mwathani i Ngai wa mma, mûthingateeni, îndî wegua Mbaari i Ngai wa mma, mûthingateeni.” Îndî antû bataaria. 22 Rîru Eriya eera antû, “I niû kîroria wa Mwathani ninka ntigeere, îndî iroria bia Mbaari i magana mana ma mîrongo îtaano. 23 Tûretereeni ndegwa ciîrî. Ka beethuurîre îmwe, na bamîgiitange inuku inuku na bamîaigîîre nkûûni îndî bûtikaamîîkîre mwanki. Nkaathuuranîra ndegwa îra îngî na mîaigîîre nkûûni na ntimîîkîra mwanki. 24 Rîru bwîte riîtwa rîa ngai wenu, naani ngeeta riîtwa rîa Mwathani wakwa. Ngai ûra acookagia na mwanki nwe Ngai wa mma.” Na antû bonthe baacookia bauga, “Ûkuuga bwega.” 25 Rîru Eriya eera iroria bia Mbaari, “Îîthuurîreeni ndegwa îmwe na bûmîthuuranîre mbere, n'ûntû bûrî baingî, na bwîte riîtwa rîa ngai wenu, îndî bûtikaamîîkîre mwanki.” 26 Kwoogu baathûkia ndegwa bamîthuuranîra. Rîru beeta riîtwa rîa Mbaari kuuma rûkîîrî mwanka thaa thiita, bakiugaga, “Îî Mbaari, tûcookerie îromba rîetû!” Îndî gûteeguîka kayû, na gûtirî we aacookia. Na baathûngûtha agu kîthînjîrooni kîra baarûthîîte. 27 Na thaa thiita Eriya aanjîîria kûbanyûrûûnta, akîbeeraga, “Rîraani nainya, n'ûntû wana we i ngai, nwîgua gaakûthûgaania, kana agwîteethia. Kana ûkeegua ka arî rûgendooni, kana waûmba kwîgua amaami na nwa mwanka aûkue.” 28 Na baarîra nainya, na beetemanga kûringana na wîthîre bwao na tûyiû na mpiû, mwanka nthakame yeetîga. 29 Thaa thiita ciakûrûka, baathi na mbere kûroria mwanka îgiita rîa kûruta kîgongwana kîa ûgoro, îndî gûteeguîka kayû, gûtaarî wa gûcookia, na gûtaarî wa kûthikîîria.
30 Rîru Eriya eera antû bonthe, “Ncûûni akubî naani,” na antû bonthe baaya akubî nwe. Na aacookeeria kîthînjîro kîa Mwathani kîra kîarî kîomboranie. 31 Eriya aathûkia maiga îkûmi na maîrî, kûringana na ûtari bwa mîîrîga ya aana ba Njakubu, ûra Mwathani eerire, “Ûgeetagwa Isiraeri.” 32 Na aatûmîra maiga mamu gwaka namo kîthînjîro n'ûntû bwa gûtîîya riîtwa rîa Mwathani. Na eenja mûtaro kûthiûrûûkîra kîthînjîro, ûmûnene bûra ûkîûmba gwîkîrwa ta rita îkûmi na itaano cia rûûyî. 33 Na aabanga nkû, na aagiitanga ndegwa inuku inuku na amîaigîîra nkûûni. Abeera, “Ûyûriani matangi maîrî rûûyî, na bûtûûrîrie kîgongwana gîkî gîa kûbîîthia, na nkûûni.” 34 Rîru auga, “Rûthaani bu rîa maîrî.” Na auga, “Rûthaani rîa mathatû,” na baarûtha rîa mathatû. 35 Na rûûyî rwaraga kîthînjîrooni, na kinya mûtaro waûyûra rûûyî.
36 Na kagiitaani ga kûruta kîgongwana kîa ûgoro, kîroria Eriya aayanga akubî auga, “Îî Mwathani, Ngai wa Îburaîmu, Isaka, na Isiraeri, ga kûmenyeke îmunthî atî i woû Ngai ndeeni ya Isiraeri, na atî ndî mûruti ngûgî waku, na ndûthîîte mama monthe wa ta bûra ûmbathîîte. 37 Ncookeria, Îî Mwathani, ncookeria, kaingo antû baba bamenya atî woû Mwathani, i woû Ngai wa mma, na atî nûgarûrîîte nkoro ciao bagûcookere.” 38 Warîo mwanki wa Mwathani waakinyûka, na wabîîthia kîgongwana, na nkû, na maiga, na tîîri, na waacûna rûûyî rûra rwarî mûtarooni. 39 Na rîra antû bonthe boonire ûûgû, baaturia maru moothiû maao matiirithîîtue nthîgûrû, na bauga, “Mwathani nwe Ngai wa mma, Mwathani nwe Ngai wa mma.” 40 Na Eriya abeera, “Gwataani iroria bia Mbaari, bûtikaareke nwa ûmwe wao amonyoka.” Na babagwata, na Eriya abaira kîmuurooni gîa Kisoni, abaûragîra oogo.
41 Rîru Eriya eera Aabu, “Îthi, ûrîe na ûnyue, n'ûntû kûrî na kayû ga nkwa.” 42 Kwoogu Aabu aathi kûrîa na kûnyua. Îndî Eriya eetia îgûrû rîa Karimeri, eendamîîra mwanka atiirithia ûthiû bwake nthîgûrû. 43 Eera mûruti ngûgî wake, “Îtia îndî ûraithe bwa îria.” Eetia aaraitha, auga, “Gûtirî gîntû.” Eriya aamwîrire athi araithe maita mûgwanja. 44 Îgiita rîa mûgwanja aaya amwîra, “Gatu kaniini kagana njara ya muntû i gakuuma îriani.” Eriya amwîra, “îthi wîre Aabu, ‘Îtwa nkaarî yaku ya ndûa wîndame mbere mbura îkûrigîîria.’ ”