Eriya atoorooka atikaûragwe
19
1 Aabu eera Njesebeeri mara monthe Eriya aarûthîîte, na bûra aûragîîte iroria bionthe na rûûyiû. 2 Rîru Njesebeeri aatûmana mûtûmwa kîrî Eriya, amwîra, “Ngai iroonkaanûkia mûno nkûrûki, wegua îgiita ta rîrî rûû ûtiîgua nkûûragîîte ta bûra ûrabaûragire.” 3 Eriya aamaka na augia oonokia ûtûûro bwake. Rîra akinyire Beeriseba ndeeni ya Njunda, aatiga mûruti ngûgî wake oogo. 4 Rîru nwe wenka aathi rûgendo rwa ntugû îmwe rwanda. Aathi aakara nthî ruungu rwa mûtî, na eerombera akue akiugaga, “Ibûganîîte, îîndî Mwathani, thûkia ûtûûro bwakwa, n'ûntû niû ntirî mwega nkûrûki ya biûyûûyû biakwa.” 5 Na aamaama toro agu ruungu rwa mûtî ûyu. Waagu amaami mûraîka amûringithia na amwîra, “Ûkîîra na ûrîe.” 6 Aaraitha, oona i kwarî na keki yaarugîîtwe na makara ma mwanki na kîbûûyû kîa rûûyî. Aarîa na aanyua, na aamaama kaîrî. 7 Na Mûraîka wa Mwathani aaya kaîrî îgiita rîa maîrî, na amûriingithia, amwîra, “Ûkîîra na ûrîe, n'ûntû rûgendo rwaku i rûûraaya.” 8 Kwoogu aûkîîra, aarîa na aanyua, na athiîra inya ya irio bibu ntugû mîrongo îna mûthenya na ûtugû aakinya Orebu kîrîmaani kîa Mwathani.Mwathani aumîîra Eriya
9 Gûku, eethîra îkurungu, aamaama ku. Rîru Mwathani amwarîria, amûûria, “N'ata ûkûrûtha aaga, Eriya?” 10 Eriya amûcookeria, “Iimbîgîîtue nkîtheteera Mwathani, Ngai wa Njûûrî na nkoro ya kwîrutîra, îndî antû ba Isiraeri i batiganîrîîtie kîrîîkanîro gîaku, boomborania ithînjîro biaku, na baûraga iroria biaku na rûûyiû, nwa niû ninka ntigeere. Na îîndî ibagûnceria baambûraga.” 11 Mwathani amûcookeria amwîra, “Uma ûrûngame kîrîmaani mbere ya Mwathani, na Mwathani agaakûrûkîîra agu.” Arûûngi waagu, kîbuubani kîînene na kîarî na inya gîatûra irîma, na kinya gîatûranga njara mbacua mbere ya Mwathani. Îndî Mwathani ataarî kîbuubaniini gîku. Nyuma ya kîbuubani kwegua kûrî na mwinaino wa nthîgûrû, îndî Mwathani ataarî mwinainooni ûyu wa nthîgûrû. 12 Nyuma ya mwinaino wa nthîgûrû kwegua kûrî na mwanki, îndî Mwathani ataarî mwankiini ûyu. Nyuma ya mwanki kwegua kûrî na kayû kaaniini, ka ruuo rûûbooreru. 13 Na rîra Eriya aakeegiirue, aakunîkîra ûthiû bwake na nguo yake aumagarûka aathi aarûngama mwîrîgaani wa îkurungu. Rîru kayû kamûûyîîra, kamûûria, “Eriya, n'ata ûkûrûtha aaga?” 14 Eriya amûcookeria amwîra, “I mbîgîîtue nkîtheteera Mwathani, Ngai wa Njûûrî na nkoro ya kwîrutîra, îndî antû ba Isiraeri i batiganîrîîtie kîrîîkanîro gîaku, boomborania ithînjîro biaku, na baûraga iroria biaku na rûûyiû, nwa niû ninka ntigeere. Na îîndî ibagûnceria baambûraga.” 15 Na Mwathani amwîra, “Îthi, ûcooke na njîra ya rwanda rwa Ndamasiki, na waakinya ûtûûrîrie Acaeri maguta atuîke mûnene wa Aramu. 16 Nwe Njeû mwana wa Nimusi ûmûtûûrîrie maguta atuîke mûnene wa Isiraeri, na Erisa mwana wa Safati wa Abeeri-Meora ûmûtûûrîrie maguta atuîke kîroria bantû aaku. 17 Ûra akaabîtua i rûûyiû rwa Acaeri akaûragwa i Njeû, na ûra akaabîtua i rûûyiû rwa Njeû akaûragwa n'Erisa. 18 Amwe na ûgu ngaatigaria antû ngiri mûgwanja Isiraeri, bonthe bara bataaturîria Mbaari maru, na tûnyua twao tunthe tûtaamûcunca.”
Gwîtwa kwa Erisa
19 Kwoogu Eriya auma naagu, na aathi eethîra Erisa mwana wa Safati, ûra aarîmaga na ikundi bia ng'ombe cia mûraaû îkûmi na biîrî. Erisa nwe aarî na gîkundi gîa îkûmi na biîrî. Eriya aakûrûkîîra akubî nwe na Eriya aagerera Erisa kabuuti. 20 Na aatiga ncamba cia mûraaû, eengana na Eriya, na amwîra, “Ka nthi ncunce baaba na maama nkîbeera batigwe bwega, rîru ncooke nkûthiingate.” Eriya amwîra, “Cooka, ka ndakûrûtha ata?” 21 Na aacooka atiga kûmûthingata. Aathûkia ncamba ciake cia mûraaû, acithînja, na aaruga nyama na macoki maacio, aanenkera antû, na baarîa. Rîru nyuma yoogu athingata Eriya, na aatua kûmûteethagîîria.