<<    <     1 Anene     20     >    >> 
Mbeni-Andandi aithûkîra Samaria
20
1 Mbeni-Andandi mûnene wa Aramu eethîrania njûûrî yake yonthe amwe. Na i kwarî na anene mîrongo îthatû na baîrî bara baarî nwe barî na mbaraathi ciao na nkaarî ciao cia ndûa, eetia nabo baathiûrûkîra Samaria na baarûa n'yo. 2 Aatûmana atûmwa taûni kîrî Aabu mûnene wa Isiraeri, bamwîra, “Ûûgû i bu Mbeni-Andandi akuuga, 3 ‘Thaabu ciaku na fetha i ciakwa, eekûrû baaku na aana baaku bara beega kinya bo i baakwa.’ ” 4 Rîru mûnene wa Isiraeri acookia auga, “wa ta ûgu ûkuuga, mwathi wakwa, woû mûnene, ndî waku, na bionthe bira ndî nabio.” 5 Atûmwa babu baaya kaîrî bamwîra, “Ûûgû i bu Mbeni-Andandi akuuga, ‘Ndaatûmana kîrî woû ndauga ûnneenkere thaabu ciaku na fetha, eekûrû baaku na aana. 6 Îndî rûû thaa ta ino ngaatûma aruti ngûgî baakwa waku, na baraithe nyomba yaku ya ûnene na nyomba cia atongoria ba thirikaarî yaku, na bakaathûkia kîonthe kîra bakoona kîrî na gîtûmi bathi nakîo.’ ”
7 Rîru mûnene wa Isiraeri eeta akûrû bonthe ba nthî înu, abeera, “Raithaani bwone bûra muntû ûyû agûceria ûgîti. N'atûmanire kîrî n'yû akîendaga eekûrû baakwa na aana baakwa, thaabu ciakwa na fetha, na ntaarega nabio.” 8 Akûrû na antû bonthe baacookia bamwîra, “Ûtikaamûthikîîrie kana wîtîgîîria kûmwaa bibu agwîtia.” 9 Kwoogu eera atûmwa ba Mbeni-Andandi, “Îra mwathi wakwa, mûnene, ‘Mûruti ngûgî waku akaarûtha bunthe bûra wamûûriirie îgiita rîa mbere, îndî bûbû ntiirûtha.’ ” Rîru atûmwa babu baumagarûka baathi gûcookia îcookio kîrî Mbeni-Andandi.
10 Mbeni-Andandi aatûmana ntûmwa yîîngî kîrî Aabu îkuuga, “Ngai iroonkaanûkia kinya nkûrûki, wegua tîîri îra îgaatigara Samaria yaûmba kûûyûra mpî cia antû bara bonthe baanthiingatîîte.” 11 Na mûnene wa Isiraeri aacookia auga, “Ûra akwîboga into biake bia ndûa athiîte kûrûa menya eekumia ta ûra akûbitharia aûmbana ndûani.” 12 Rîra Mbeni-Andandi eegiirue ntûmwa înu wa bûra aanyunyaga na anene maremaani maao, eera antû baake, “Îîbangeeni.” Nabo beethuuranîra kaingo bathi kwithûkîra taûni înu.
Aabu aacinda Mbeni-Andandi
13 Waagu kîroria kîaya kîrî Aabu mûnene wa Isiraeri na kîauga, “Mwathani ariuga ûûgû, ‘N'ûkwona njûûrî îno nene ûûgû ya anthû? Raitha nkamînenkanîra njaraani ciaku îmunthî, naawe ûkaamenya atî i niû Mwathani.’ ” 14 Aabu aûria, “N'ûû ûgaatongoria ndûa?” Kîroria kîamûcookeria kîamwîra, “Mwathani ariuga n'aruti ngûgî ba mangabana ma iteere bibi.” Rîru aûria, “N'ûû ûkambîîria ndûa?” Nwe kîroria amûcookia amwîra, “I woû.”
15 Kwoogu Aabu eethîrania aruti ngûgî ba mangabana ba iteere bibu, nabo baarî magana maîrî ma mîrongo îthatû na baîrî, nyuma yoogu acooka eethîrania bara bangî bonthe ba Isiraeri, bonthe baarî antû arûme ngiri mûgwanja. 16 Na baumagarûka thaa thiita, rîra Mbeni-Andandi na anene bara mîrongo îthatû na baîrî bara baateethanagia nwe baarî baatogoonu na nwa baanyuunyaga barî maremaani maao. 17 Aruti ngûgî ba mangabana ba iteere bibu baumagarûka barî mbere. Îgiita rîru Mbeni-Andandi n'arî akwira acikaarî ba kûthûûya, nabo bamwîra atî, i kwarî na acikaarî baayîîte baumîîte Samaria. 18 Nwe Mbeni-Andandi auga, “Wegua baayîîte gûcwa ûkiri, kana baayîîte n'ûntû bwa ndûa, ibagwatwe barî mwoyo.”
19 Kwoogu aruti ngûgî ba mangabana ba iteere bibu baumagarûka ntûûra, na njûûrî îrî nyuma yao. 20 Nabo woora ûmwe aûraga muntû ûmwe wa anthû baao. Asîîria baugia, na Aisiraeri beengana nabo. Îndî Mbeni-Andandi mûnene wa Asîîria atoorooka arî mbarathiini na antû ba mbaraathi. 21 Na mûnene wa Isiraeri aathi, aagwata mbaraathi na nkaarî cia ndûa, na aûraga Asîîria baingî.
22 Nyumaani, kîroria kîra kîathi kîrî mûnene wa Isiraeri na kîamwîra ata rî, “Îthi gwîthuuranîre bwega wone bûra ûkaarûtha, n'ûntû mwanjîîrioni wa mwanka ûyu ûthiîte kwambîîria, mûnene wa Asîîria agakuithûkîra kaîrî.” 23 Na aruti ngûgî ba mûnene wa Asîîria bamwîra, “ngai cia Isiraeri i ngai cia irîma, na i kîo gîatûmire batûtura. Îndî ga tûrwîre nabo mwaranthî, na ûmma tûkabatura. 24 Îîndî ûûgû i bu ûkaarûtha, ruta anene bara mîrongo îthatû na baîrî itîîni biao na kaanyaani kaao gwîkîre atongoria ba njûûrî cia ndûa. 25 Rîru ûcooke ûtaare njûûrî ya ndûa ta îra yaûragirwe, mbaraathi na nkaarî cia ndûa rîru tûrwîre nabo mwaranthî, na ûmma tûkabatura.” Mûnene Mbeni-Andandi eegua mataaro maao, aarûtha woogu. 26 Mwanjîîrioni wa mwanka ûra wathingatire, mûnene Mbeni-Andandi eethîrania antû baake, na eetia mwanka Afeki kûrûa na Isiraeri. 27 Na antû ba Isiraeri beethîranua na baaneenkerwa into bira bionthe beendaga îgiita rîa ndûa. Rîru baathi kûrûa na Asîîria. Antû ba Isiraeri baamba marema mbere yao, baakari ta tûkundi tûniini twîrî twa mbûri, îndî Asîîria baûyûri gûntû kunthe. 28 Muntû ûra wa Ngai aathi kîrî mûnene wa Isiraeri amwîra, “Mwathani ariuga, ‘N'ûntû Asîîria ibaugîîte atî Mwathani i Ngai wa irîma îndî ti Ngai wa mîaranthî, n'ûntû bwa ûgu nkaanenkanîra njûûrî îno nene ûû yonthe njaraani ciaku, naawe ûkaamenya atî i niû Mwathani.’ ” 29 Aisiraeri na Asîîria baakara ntugû mûgwanja bathiiranîîte. Ntugû ya mûgwanja ndûa yanjîîria. Ntugû wenu antû ba Isiraeri baûraga acikaarî ba magûrû ngiri îgana rîmwe. 30 Na bara bangî baatigarire baatoorokera ntûûra ya Afeki na rûthingo rwagwîra bonthe bara baatigeere antû ngiri mîrongo îîrî na mûgwanja. Mbeni-Andandi kinya we atoorokera taûni, na eebitha kanyomba ka ndeeni. 31 Aruti ngûgî baake baathi kîr'we bamwîra, “Twegua anene ba Isiraeri ibeeganagîîrua kîao. Twîtîgîîrie tûthi kîrî mûnene wa Isiraeri twogeete mathango tuuna twetû na twogeete biongo na mîkanda, nwîgua aûmba gwîtîgîîria ûgatûûra.” 32 Kwoogu booga mathango tuuna twao, booga biongo biao na mîkanda, baathi kîrî mûnene wa Isiraeri, na bamwîra, “Mûruti ngûgî waku Mbeni-Andandi arîkwereka agîkwîraga, ‘Itû mbîtîgîîria ntûûre mwoyo.’ ” Aabu nwe aûria, “Anga arî mwoyo nendî? I mûruayia.” 33 Antû babu baaraithîîte na ûûme beegua kana mûnene naarî na mûbango ûmwega nabo. Kwoogu rîra augire Mbeni-Andandi i mûruagina bamûgwatîra na mpwî bauga, “Îî Mbeni-Andandi i mûruanyûkwe!” Aabu abeera, “Îthiini bûmûreete.”
Mbeni-Andandi agûkinya, Aabu amwîtîgîîria gûkara amwe nwe nkaarîîni yake ya ndûa. 34 Rîru Mbeni-Andandi amwîra, “Taûni ira baaba atuunyire abaagu cionthe ngagûcookeria, na ûkeerûthîra thoko Ndamasiki ta bûra baaba aarûthîîte Samaria.” Rîru Aabu amwîra, “Ngakûrekeeria wathiîtia wauga ûkaarûtha mantû mamu twarîîkanîra.” Kwoogu aarûtha kîrîîkanîro nwe na amûrekeeria aathi.
Kîroria kîagiitîra Aabu îgamba
35 Na Ngai eera muntû ûmwe wa aana ba iroria eere ûra ûngî, “Itû ndinga.” Îndî muntû ûyu arega kûmûringa. 36 Rîru amwîra, “N'ûntû ûtiraathîkîra kayû ka Mwathani, wa îîndî wauma aaga ndî wathi, ûkaûragwa i cimba.” Akûmûtiga aathi, aakomana na cimba yamûûraga. 37 Rîru oona muntû ûngî, na amwîra, “Itû ngûkwereka ndinga.” Na muntû ûyu amûringa amûruta kîronda. 38 Kwoogu kîroria gîku kîathi gîakara gîeteera mûnene, nwe neegarûrîîte atikaamenyeke eekunîka meetho na kîmûtaame. 39 Na rîra mûnene aakûrûkîîte, amuugîîria amwîra ata rî, “Niû mûruti ngûgî waku ndaraumagarûkire ndaathi ndaathûngîra ndûani gatîgatî. Na mûcikaarî ûmwe aandeetera mûgwate ambîîra, ‘Karia muntû ûyû. Akaaya kûûra n'ûntû bwa ûntû nwa bûrîkû, ûgaakua bantû aake kana ûrîe mûthere wa ngiri ithatû wa fetha.’ 40 Îndî mûruti ngûgî waku akîrutaga ngûgî imbingî aaga na aara, mûgwate ûyu aathi.” Rîru mûnene ûyu wa Isiraeri amwîra, “I bu îgamba rîaku rîgaatuîgwa ûgu. Ûkwîgambithia wengwa.”
41 Rîru aruta mûtaame ûra oogeete nau meetho na mpwî, na mûnene wa Isiraeri aamenya n'ûmwe wa iroria. 42 Kîroria kîamwîra, “Mwathani ariuga ûûgû, ‘N'ûntû n'ûrekeereetie muntû ûra ndaraathanîîte akue, i woû ûgaakua bantû aake, na antû baaku bakue bantû a baake.’ ” 43 Na mûnene wa Isiraeri aathi gwake Samaria amakîîte na ainyîîrîkîîte.